ຂປລ
ກອງປະຊຸມພົບປະ ລະຫວ່າງ ຄະນະນໍາຈາກສະພາທິດສະດີສູນກາງພັກ, ຄະນະໂຄສະນາອົບຮົມສູນກາງພັກ ແລະ ຄະນະພັກ, ຄະນະນໍາ ນະຄອນຫຼວງວຽງຈັນ (ນວ) ຈັດຂຶ້ນໃນວັນທີ 2 ກັນຍາ 2026 ໂດຍການເປັນປະທານຂອງທ່ານ ຄໍາມອນ ຈັນທະຈິດ ຮອງຫົວໜ້າຄະນະໂຄສະນາອົບຮົມສູນກາງພັກ, ຮອງປະທານສະພາທິດສະດີສູນກາງພັກ (ຜູ້ປະຈໍາການ), ມີຫົວໜ້າກົມ, ຮອງກົມ, ຫົວໜ້າພະແນກ, ຮອງພະແນກ ພ້ອມດ້ວຍຄະນະກໍາມະການປົກຄອງເມືອງອ້ອມຂ້າງ ນວ ເຂົ້າຮ່ວມ.
ທ່ານ ຄໍາມອນ ຈັນທະຈິດ ໄດ້ກ່າວວ່າ: ການພົບປະຄັ້ງນີ້ ເພື່ອແລກປ່ຽນບົດຮຽນ, ປະສົບການ ແລະ ວິທີການພັດທະນານະຄອນຫຼວງວຽງຈັນ ທັງໃນດ້ານທິດສະດີ ແລະ ດ້ານການຈັດຕັ້ງປະຕິບັດຕົວຈິງ ໂດຍເນັ້ນໃສ່ການຮຽນຮູ້ຈາກປະສົບການຕົວຈິງ, ຜົນສໍາເລັດ, ບັນດາບົດຮຽນທີ່ມີຄຸນຄ່າ ລວມທັງບັນຫາ, ອຸປະສັກ ແລະ ແນວທາງແກ້ໄຂທີ່ໄດ້ຜ່ານການທົດລອງ ແລະ ນໍາໃຊ້ມາແລ້ວ, ທັງເປັນການເປີດໂອກາດໃຫ້ບັນດາວິຊາການ ແລະ ພາກສ່ວນກ່ຽວຂ້ອງ ໄດ້ຮ່ວມກັນສົນທະນາເຖິງແນວຄິດ, ຫຼັກການ ແລະ ວິທີການພັດທະນານະຄອນຫຼວງວຽງຈັນ ໃຫ້ມີຄວາມເໝາະສົມກັບສະພາບຕົວຈິງ, ສາມາດນໍາໄປໝູນໃຊ້ໃນວຽກງານ ແລະ ສ້າງຜົນປະໂຫຍດໄດ້ຢ່າງເປັນຮູບປະທໍາ.
ພ້ອມນີ້, ທ່ານ ຄໍາສະຫວັນ ໂຄດໄຊ ຫົວໜ້າຄະນະໂຄສະນາອົບຮົມ ນະຄອນຫຼວງວຽງຈັນ ກໍໄດ້ຍົກໃຫ້ເຫັນການຂະຫຍາຍຕົວດ້ານເສດຖະກິດຂອງນະຄອນຫຼວງວຽງຈັນ ຊຶ່ງຢູ່ໃນລະດັບ 4,2% (ແຜນການປີ ໃຫ້ບັນລຸ 8%), ລວມຍອດຜະລິດຕະພັນພາຍໃນ (GDP) ບັນລຸ 55.194,57 ຕື້ກີບ, ເທົ່າກັບ 54,95% (ແຜນການປີໃຫ້ບັນລຸ 100.427 ຕື້ກີບ), GDP ສະເລ່ຍຕໍ່ຫົວຄົນ 40,01 ລ້ານກີບ (ແຜນການປີໃຫ້ໄດ້ 94,10 ລ້ານກີບ) ຊຶ່ງປັດໄຈຕົ້ນຕໍທີ່ເຮັດໃຫ້ GDP ຂະຫຍາຍຕົວ ແມ່ນຂະແໜງກະສິກໍາ ຂະຫຍາຍຕົວໃນລະດັບ 3,1%, ວຽກງານທີ່ພົ້ນເດັ່ນແມ່ນການປູກຝັງ ຂະຫຍາຍຕົວ 3,84%, ຂະແໜງອຸດສາຫະກໍາ ຂະຫຍາຍຕົວ 6,54%. ໃນນັ້ນ, ການຜະລິດອຸດສາຫະກໍາ ຂະຫຍາຍຕົວໃນລະດັບ 5,36%, ຂະແໜງການບໍລິການ ຂະຫຍາຍຕົວ 2,52%.
ຂໍ້ມູນ-ພາບ: ໜັງສືພິມວຽງຈັນໃໝ່
KPL
