ຂປລ. ວິທະຍາໄລ ເຕັກນິກ ລາວ-ເຢຍລະມັນ (ວຕລຢ)  ກໍາລັງຝຶກຊ້ອມນັກສຶກສາ ສາຂາ ມີຄາໂທຣນິກຢ່າງເຂັ້ມຂຸ້ນມາເປັນເວລາ 2 ເດືອນ ນັບແຕ່ເດືອນ ມິຖຸນາ 2026 ເປັນຕົ້ນມາ ເພື່ອກຽມຄວາມພ້ອມສົ່ງນັກສຶກສາ ເຂົ້າຮ່ວມແຂ່ງຂັນ  "ມີຄາໂທຣນິກ" ລະດັບພາກພື້ນ ຊຶ່ງຈະຈັດຂຶ້ນຢູ່ທີ່ປະເທດໄທ ໃນເດືອນທັນວາ ປີ 2026 ໂດຍ ຄາດວ່າຈະມີຫລາຍປະເທດໃນເຂດລຸ່ມນ້ຳຂອງເຂົ້າຮ່ວມ.

ອາຈານ ເຕີ່ງ ມະຫາວົງ ໃຫ້ຮູ້ວ່າ: ສຳລັບການແຂ່ງຂັນຄັ້ງນີ້ ຖືວ່າເປັນຄັ້ງທຳອິດທີ່ວິທະຍາໄລ ເຕັກນິກ ລາວ-ເຢຍລະມັນ ໄດ້ສົ່ງນັກສຶກສາ ເຂົ້າຮ່ວມແຂ່ງຂັນໃນລະດັບພາກພື້ນ ໂດຍການ ແຂ່ງຂັນ ແມ່ນເນັ້ນໃສ່ການຕິດຕັ້ງ ແລະ ອອກແບບລະບົບຄວບຄຸມອັດໂຕໂນມັດ ທີ່ເຊື່ອມໂຍງ 3 ພາກສ່ວນຫລັກ ເຂົ້າກັນຢ່າງເປັນລະບົບ ຄື: ລະບົບ PLC, ລະບົບກົນໄກ (Mechanics) ແລະ ຫຸ່ນຍົນອຸດສາຫະກຳ (Industrial Robots) ໃຫ້ສາມາດເຮັດວຽກຮ່ວມກັນໄດ້ຢ່າງມີປະສິດທິພາບ. ທັງນີ້,​ການແຂ່ງຂັນມີຄວາມທ້າທາຍຫລາຍ ເນ່ືອງຈາກຫາກສ່ວນໃດສ່ວນໜຶ່ງມັນມີຄວາມຜິດພາດ ຫລື ບໍ່ລະອຽດ ໃນລະບົບນັ້ນກໍຄືບໍ່ສາມາດໃຊ້ງານໄດ້ເລີຍ. ສຳລັບໂຈດການແຂ່ງຂັນທີ່ໄດ້ຮັບມາ ເບື້ອງຕົ້ນປະມານ 60% ເທົ່ານັ້ນ, ສ່ວນທີ່ເຫລືອແມ່ນຕ້ອງອາໄສການແກ້ໄຂບັນຫາສະເພາະໜ້າຢູ່ສະໜາມແຂ່ງຂັນຕົວຈິງ. ປັດຈຸບັນ ການຝຶກຊ້ອມມີຄວາພ້ອມປະມານ 50% ແລະ ວຕລຢ ມີແຜນທີ່ຈະເຊີນນັກວິຊາການ ຈາກປະເທດໄທ ມາຊ່ວຍຝຶກຊ້ອມເພີ່ມເຕີມ ເພື່ອຍົກລະດັບທັກສະ ແລະ ຄວາມສາມາດຂອງນັກສຶກສາໃຫ້ມີຄວາມພ້ອມກ່ອນການແຂ່ງຂັນ.

ອາຈານ ເຕີ່ງ ມະຫາວົງ ກ່າວຕື່ມວ່າ: ນອກຈາກຄວາມຫວັງທີ່ຈະຍາດເອົາລາງວັນກັບຄືນມາສູ່ປະເທດຊາດແລ້ວ, ສິ່ງສໍາຄັນກວ່າແມ່ນການຍົກລະດັບປະສົບການ ໃຫ້ທັງຄູ-ອາຈານ ແລະ ນັກສຶກສາ ໄດ້ຮັບປະສົບການໃໝ່, ແລກປ່ຽນຄວາມຮູ້ ແລະ ຮຽນຮູ້ເຕັກນິກທີ່ທັນສະໄໝ ເພື່ອນຳປາປັບປຸງການຮຽນ-ການສອນ ຕະຫລອດຮອດການພັດທະນາທັກສະຂອງນັກສຶກສາໃນອະນາຄົດ.

ນາງ ສາຍສະໝອນ ໄຊຍະຫົງສາ ນັກສຶກສາ ວິຊາ ມີຄາໂທຣນິກ ປີ 2 ໃຫ້ຮູ້ວ່າ:  ຕົນເອງຮູ້ສຶກດີໃຈຫລາຍ ທີ່ໄດ້ເປັນໜຶ່ງໃນສາມຄົນ ທີ່ໄດ້ເຂົ້າຮ່ວມການແຂ່ງຂັນໃນຄັ້ງນີ້  ຊຶ່ງຖືວ່າເປັນໂອກາດທີ່ດີໃນການຫາປະສົບການ ແລະ ແລກປ່ຽນທັກສະໃໝ່ໆ ດ້ານເຕັກໂນໂລຊີໃຫ້ຫລາຍຂຶ້ນ. ແຕ່ເຖິງຢ່າງໃດ, ທີມຕົນເອງກໍຈະເຮັດສຸດຄວາມສາມາດ ເພື່ອສະແດງໃຫ້ເຫັນວ່າ ນັກສຶກສາລາວເຮົາ ກໍມີຄວາມຮູ້, ຄວາມສາມາດບໍ່ແພ້ຊາດໃດຄືກັນ. ສໍາລັບ ຄວາມຄາດຫວັງໃນການແຂ່ງຂັນຄັ້ງນີ້ ຕົນເອງກໍຫວັງສ້າງຜົນງານໃຫ້ດີທີ່ສຸດ, ເຖິງວ່າຜົນອອກມາຈະເປັນແນວໃດ ກໍພ້ອມຈະນໍາມາພັດທະນາເຂົ້າໃນການຮຽນ ແລະ ພັດທະນາຕົນເອງຕໍ່ໄປ.

ວິທະຍາໄລ ເຕັກນິກ ລາວ-ເຢຍລະມັນ ສ້າງຕັ້ງຂຶ້ນໃນປີ 1964, ປັດຈຸບັນມີ 2 ວິທະຍາເຂດ , ມີ 5 ພາກວິຊາ ແລະ15 ສາຂາວິຊາຊີບ ໂດຍເນັ້ນໃສ່ສາຂາ ຊ່າງອຸດສາຫະກໍາເປັນຫລັກ. ໃນໄລຍະຜ່ານມາ ໄດ້ຈັດການຮຽນ-ການສອນແບບຄວບຄູ່ ທຸກສາຂາວິຊາ ຮ່ວມກັບ 100 ກວ່າບໍລິສັດ ເພື່ອໃຫ້ນັກສຶກສາມີທັກສະສອດຄ່ອງກັບຕະຫລາດແຮງງານ.

KPL