ຂປລ. ເມື່ອລະດູຝົນໝູນວຽນມາຮອດ, ສາຍຝົນທີ່ຕົກ ລົງມາບໍ່ພຽງແຕ່ໃຫ້ນ້ຳ ແລະ ຄວາມສົດຊື່ນແກ່ ທຳມະຊາດເທົ່ານັ້ນ, ແຕ່ຍັງນຳພາເອົາຄວາມສ່ຽງທາງ ດ້ານສຸຂະພາບ ແລະ ສິ່ງແວດລ້ອມມາພ້ອມ, ໂດຍສະເພາະແມ່ນບັນຫາຂີ້ເຫຍື້ອຕົກຄ້າງ. ການຮັກ ສາຄວາມສະອາດ ແລະ ການຄຸ້ມຄອງຂີ້ເຫຍື້ອຢ່າງຖືກຕ້ອງໃນຍາມຝົນ ຈຶ່ງເປັນພັນທະ ແລະ ໜ້າທີ່ສຳຄັນຂອງພວກຮົາທຸກຄົນໃນສັງຄົມ.

    ໃນຊ່ວງລະດູຝົນ, ຂີ້ເຫຍື້ອທີ່ຖືກຖິ້ມສະຊາຍຕາມຮ່ອງນ້ຳ, ເສັ້ນທາງ ຫລື ເຂດຊຸມຊົນ ຈະຖືກນ້ຳຝົນ ພັດໄຫລໄປອຸດຕັນທໍ່ລະບາຍນ້ຳ, ເຮັດໃຫ້ນ້ຳຖ້ວມ ຂັງຕາມເຂດຊຸມຊົນ ແລະ ເສັ້ນທາງສັນຈອນ. ນອກຈາກນັ້ນ, ພາຊະນະເກົ່າໆເຊັ່ນ: ກະໂປ່ງ, ຢາງລົດເກົ່າ ຫລື ກວດປລາສຕິກ ທີ່ມີນ້ຳຝົນຂັງຢູ່ ຈະກາຍເປັນບ່ອນແພ່ພັນຢ່າງດີຂອງຍຸງລາຍ ຊຶ່ງເປັນພາຫະນະນຳເຊື້ອພະຍາດໄຂ້ເລືອດອອກມາສູ່ພວກເຮົາ. ຂີ້ເຫຍື້ອທີ່ເປິເປື້ອຍ ແລະ ເນົ່າເໝັນໃນຍາມອົບເອົ້າ ຍັງເປັນແຫລ່ງສະສົມຂອງເຊື້ອແບັກທີເຣຍ ເຮັດໃຫ້ເກີດພະຍາດທາງເດີນອາຫານ ແລະ ພະຍາດຜິວໜັງໄດ້ງ່າຍ.

   ເພື່ອປ້ອງກັນບັນຫາດັ່ງກ່າວ, ພວກເຮົາຄວນຮ່ວມແຮງຮ່ວມໃຈກັນປະຕິບັດຕາມ 4 ມາດຕະການຕົ້ນຕໍ ດັ່ງນີ້:

1.ເກັບກວດ ແລະ ທຳລາຍພາຊະນະຂັງນ້ຳ: ໝັ່ນກວດກາອ້ອມເຮືອນ ແລະ ຊຸມຊົນ ເພື່ອເທນ້ຳຂັງ ຫລື ເກັບກູ້ພາຊະນະທີ່ສາມາດຂັງນ້ຳຝົນໄດ້ອອກໄປທຳລາຍ ຫລື ເກັບໄວ້ໃນບ່ອນຮົ່ມ; 2. ອະນາໄມຮ່ອງນ້ຳໄຫລ: ພ້ອມກັນເກັບຂີ້ເຫຍື້ອອອກຈາກຮ່ອງລະບາຍນ້ຳອ້ອມຂ້າງເຮືອນ ແລະ ເຂດຊຸມຊົນ ເພື່ອໃຫ້ນ້ຳໄຫລໄດ້ສະດວກ, ຫລຸດຜ່ອນບັນຫານ້ຳຖ້ວມຂັງ;3. ຄັດແຍກ ແລະ ຖິ້ມຂີ້ເຫຍື້ອໃຫ້ຖືກບ່ອນ: ຄັດແຍກຂີ້ເຫຍື້ອເພື່ອນຳກັບມາໃຊ້ໃໝ່, ມັດຖົງຂີ້ເຫຍື້ອໃຫ້ແໜ້ນໜາ ກ່ອນນຳໄປໄວ້ບ່ອນເກັບຮວບຮວມ, ບໍ່ໃຫ້ສັດເຂົ້າມາເຂ່ຍ ຫລື ນ້ຳຝົນພັດໄຫລ ສະຊາຍ; 4. ສ້າງຂະບວນການອອກແຮງງານທົ່ວຊຸມຊົນ: “ຈັດກິດຈະກຳ ວັນອະນາໄມຊຸມຊົນ” ໂດຍການເຊີນຊວນພໍ່ແມ່ປະຊາຊົນ, ຊາວໜຸ່ມ, ເຍົາວະຊົນ ອອກມາຮ່ວມກັນປັດກວາດຖະໜົນຫົນທາງ ແລະ ເຂດສາທາລະນະຢ່າງເປັນປະຈຳ.

 ການຮັກສາຄວາມສະອາດໃນລະດູຝົນ ບໍ່ແມ່ນໜ້າທີ່ຂອງໃຜຜູ້ໜຶ່ງ, ແຕ່ແມ່ນຄວາມຮັບຜິດຊອບ ຮ່ວມກັນຂອງທຸກຄົນ. ການເລີ່ມຕົ້ນຈາກຈຸດນ້ອຍໆ ເຊັ່ນ: ການບໍ່ຖິ້ມຂີ້ເຫຍື້ອຊະຊາຍ, ໝັ່ນອະນາໄມຮ່ອງນ້ຳ ແລະ ກຳຈັດບ່ອນຂັງນ້ຳ ຈະຊ່ວຍຫລີກເວັ້ນ ນ້ຳຖ້ວມຂັງຢູ່ເຮືອນຂອງຕົນເອງ  ແລະ ຈະຊ່ວຍໃຫ້ຊຸມຊົນຂອງພວກຮົາມີຄວາມສະອາດ, ງາມຕາ ແລະ ປອດໄພຈາກໂລກໄພໄຂ້ເຈັບຕະຫລອດລະດູຝົນນີ້.

KPL