ຂປລ
ຂປລ. ປັດຈຸບັນການສຶກສາສາຍອາຊີວະສຶກສາ ຫລື ທີ່ຫລາຍຄົນເອີ້ນວ່າ: ສາຍວິຊາຊີບ ນັບວ່າເປັນອີກຂະແໜງການສຳຄັນໃນການສ້າງ ແລະ ພັດທະນາ ກຳລັງແຮງງານໃຫ້ມີຄວາມຮູ້, ຄວາມສາມາດ ແລະ ທັກສະວິຊາຊີບ ສອດຄ່ອງກັບຄວາມຕ້ອງການຂອງຕະຫລາດແຮງງານພາຍໃນ ແລະ ສາກົນ.
ຂປລ. ປັດຈຸບັນການສຶກສາສາຍອາຊີວະສຶກສາ ຫລື ທີ່ຫລາຍຄົນເອີ້ນວ່າ: ສາຍວິຊາຊີບ ນັບວ່າເປັນອີກຂະແໜງການສຳຄັນໃນການສ້າງ ແລະ ພັດທະນາ ກຳລັງແຮງງານໃຫ້ມີຄວາມຮູ້, ຄວາມສາມາດ ແລະ ທັກສະວິຊາຊີບ ສອດຄ່ອງກັບຄວາມຕ້ອງການຂອງຕະຫລາດແຮງງານພາຍໃນ ແລະ ສາກົນ. ການສຶກສາສາຍນີ້ ນອກຈາກເນັ້ນການຮຽນຮູ້ພາກທິດສະດີແລ້ວ, ຍັງມີຄວາມສຳຄັນຕໍ່ການຝຶກຝົນພາກປະຕິບັດຕົວຈິງ ເພື່ອໃຫ້ນັກຮຽນສາມາດນຳຄວາມຮູ້ໄປໃຊ້ປະກອບອາຊີບ ຫລື ເຂົ້າສູ່ຕະຫລາດແຮງງານໄດ້ຫລັງຈາກຮຽນຈົບ.
ໃນສົກຮຽນ 2026-2027 ນີ້ , ວິທະຍາໄລເຕັກນິກ ລາວ-ເຢຍລະມັນ (ວຕລຢ) ໄດ້ກະກຽມຄວາມພ້ອມໃນຫລາຍດ້ານ ເພື່ອຮອງຮັບນັກຮຽນໃໝ່ ແລະ ຍົກລະດັບຄຸນນະພາບການຮຽນ-ການສອນ. ໂດຍໄດ້ເນັ້ນໃສ່ການກະກຽມພື້ນຖານໂຄງລ່າງ, ຫ້ອງຮຽນ, ໂຮງຊ່າງ, ຫ້ອງທົດລອງ, ຊຸດທົດລອງ ແລະ ສິ່ງອຳນວຍຄວາມສະດວກຕ່າງໆ ໃຫ້ພຽງພໍຕໍ່ການຮຽນທັງພາກທິດສະດີ ແລະ ພາກປະຕິບັດ. ຈຸດເດັ່ນສຳຄັນໃນສົກຮຽນ ແມ່ນວິທະຍາໄລຈະຍົກເວັ້ນຄ່າຮຽນ ແລະ ຄ່າທຳນຽມຕ່າງໆໃຫ້ແກ່ນັກຮຽນຍິງທີ່ສະໝັກເຂົ້າຮຽນຢູ່ວິທະຍາໄລໃນທຸກສາຂາວິຊາ. ນະໂຍບາຍດັ່ງກ່າວຖືເປັນການເພີ່ມໂອກາດໃຫ້ແກ່ນັກຮຽນຍິງໃນການເຂົ້າເຖິງການສຶກສາສາຍວິຊາຊີບ ໂດຍສະເພາະສາຂາວິຊາດ້ານ ຊ່າງອຸດສາຫະກຳ.
ທ່ານ ສຸລິຍາ ປ່າໄຊ ຜູ້ອໍານວຍການວິທະຍາໄລ ເຕັກນິກ ລາວ-ເຢຍລະມັນ ໄດ້ໃຫ້ສຳພາດຕໍ່ນັກຂ່າວສຳນັກຂ່າວສານປະເທດລາວວ່າ: ວິທະຍາໄລ ເຕັກນິກ ລາວ-ເຢຍລະມັນ ສ້າງຕັ້ງຂຶ້ນໃນປີ 1964 ແລະ ປັດຈຸບັນມີ 2 ວິທະຍາເຂດ ຄື: ສໍານັກງານໃຫຍ່ ຕັ້ງຢູ່ ກິໂລແມັດທີ 3, ຖະໜົນທ່າເດື່ອ, ບ້ານວັດນາກ, ເມືອງສີສັດຕະນາກ, ນະຄອນຫລວງວຽງຈັນ ແລະ ວິທະຍາເຂດທີ 2 ຕັ້ງຢູ່ຖະໜົນດົງໂພສີ, ບ້ານຊຽງດາ, ເມືອງໄຊເສດຖາ, ນະຄອນ ຫລວງວຽງຈັນ. ປັດຈຸບັນວິທະຍາໄລມີ 5 ພາກວິຊາ ແລະ 15 ສາຂາວິຊາຊີບ ໂດຍເນັ້ນໃສ່ສາຂາ ຊ່າງອຸດສາຫະກໍາເປັນຫລັກ, ໃນໄລຍະຜ່ານມາ ການຮຽນ-ການສອນມີການປະສານງານກັບພາກທຸລະກິດທຸກສາຂາວິຊາ ໂດຍໄດ້ ຮ່ວມມືກັບ 100 ກວ່າບໍລິສັດ. ນັກຮຽນນອກຈາກຈະຮຽນທິດສະດີ ແລະ ທົດລອງຕົວຈິງໃນວິທະຍາໄລແລ້ວ, ຍັງໄດ້ລົງປະຕິບັດງານຈິງຢູ່ບັນດາບໍລິສັດ ຊຶ່ງຮູບແບບການຮຽນຄວບຄູ່ນີ້ ຊ່ວຍໃຫ້ຜູ້ຮຽນໄດ້ສະສົມປະສົບການຈາກສະພາບວຽກງານຕົວຈິງ ແລະ ພັດທະນາທັກສະທີ່ສອດຄ່ອງກັບຄວາມຕ້ອງການຂອງຕະຫລາດແຮງງານ.ໃນສົກຮຽນຜ່ານມາ ມີນັກຮຽນ-ນັກສຶກສາ ທັງໝົດ 1.428 ຄົນ , ຍິງ 67 ຄົນ ແລະ ມີຜູ້ຮຽນຈົບອອກສູ່ຕະຫລາດແຮງງານ ທັງໝົດ 486 ຄົນ (ລວມທັງຫລັກສູດໄລຍະສັ້ນ ແລະ ໄລຍະຍາວ). ພ້ອມນີ້ວິທະຍາໄລມີພະນັກງານຄູ-ອາຈານ ທັງໝົດ 76 ທ່ານ, ຍິງ 27 ທ່ານ. ແນວໃດກໍດີ, ຈາກການຈັດການຮຽນ-ການສອນຕົວຈິງ ຍັງເຫັນວ່າຄູ-ອາຈານ ດ້ານວິຊາສະເພາະຍັງບໍ່ພຽງພໍ. ຄູ 1 ທ່ານ ຕ້ອງຮັບຜິດຊອບສອນສອນຫລາຍວິຊາ ແລະ ສອນເກີນຊົ່ວໂມງ ເຮັດໃຫ້ມີເວລາບໍ່ພຽງພໍໃນການກະກຽມບົດສອນ ແລະ ຄົ້ນຄວ້າ ຊຶ່ງບັນຫານີ້ ເປັນອີກບັນຫາໜຶ່ງທີ່ທາງວິທະຍາໄລກຳລັງເລັ່ງໃສ່ແກ້ໄຂຕະຫລອດມາ ເພື່ອຍົກຄຸນນະພາບການສອນ.
ສໍາລັບການຮັບນັກຮຽນໃໝ່ໃນສົກຮຽນ 2026-2027 ນີ້, ທາງວິທະຍາໄລໄດ້ຕັ້ງເປົ້າໝາຍຈະຮັບນັກຮຽນເຂົ້າໃໝ່ຫລາຍກວ່າ 800 ຄົນ ແລະ ໄດ້ເປີດຮັບສະໝັກດ້ວຍຫລາຍຮູບແບບ ເພື່ອອຳນວຍຄວາມສະດວກໃຫ້ແກ່ຜູ້ສົນໃຈ. ມາຮອດ ວັນທີ 26 ສິງຫາ 2026 ມີຜູ້ສະໝັກເຂົ້າຮຽນທັງໝົດ 1.000 ກວ່າຄົນ.ໃນນັ້ນ ຮູບແບບສອບເສັງ ສຳລັບສາຂາເຕັກໂນໂລຊີລົດຍົນ ແລະ ກົນຈັກໜັກລະບົບຊັ້ນສູງມີສອບເສັງ 604 ຄົນ, ສໍາພາດ 434 ຄົນ ແລະ ທຶນແບ່ງປັນ 35 ຄົນ ໂດຍແບ່ງຕາມຮູບແບບດັ່ງນີ້:
ຮູບແບບສອບເສັງ: ສໍາລັບສາຂາວິຊາ ເຕັກໂນໂລຊີລົດຍົນ ແລະ ກົນຈັກໜັກ ໃນລະບົບຊັ້ນສູງ ມີຜູ້ສະ
ໝັກ 604 ຄົນ, ມາສອບເສັງຕົວຈິງ 502 ຄົນ, ແຜນຮັບຂອງວິທະຍາໄລ 300 ຄົນ. ຮູບແບບນີ້ ໄດ້ຈັດການສອບເສັງຮຽບຮ້ອຍແລ້ວ ໃນຕອນເຊົ້າຂອງວັນທີ 26 ສິງຫາ 2026, ຄາດວ່າຈະປະກາດຜົນໃນອາທິດຕໍ່ໄປ.
ຮູບແບບສໍາພາດ: 13 ສາຂາວິຊາ ລວມທັງລະບົບຊັ້ນກາງ ແລະ ຊັ້ນສູງ ມີຜູ້ສະໝັກ 434 ຄົນ, ສໍາພາດຜ່ານ ແລະ ລົງທະບຽນແລ້ວ 311 ຄົນ, ຮູບແບບນີ້ ຈະສືບຕໍ່ຮັບສະໝັກໄປຈົນຮອດກາງເດືອນ ກັນຍາ 2026 ແລ້ວຈະປະເມີນຄືນພິເສດ ສໍາລັບນ້ອງໆ ທີ່ເປັນຜູ້ຍິງ ຖ້າສະໝັກຮຽນຢູ່ວິທະຍາໄລແຫ່ງນີ້ ທາງວິທະຍາໄລຈະມີການຍົກເວັ້ນຄ່າຮຽນ, ຄ່າທໍານຽມຕ່າງໆ ຖືວ່າບໍ່ໄດ້ຈ່າຍຄ່າຮຽນ.
ຮູບແບບທຶນແບ່ງປັນ ພວກເຮົາໄດ້ແບ່ງປັນທຶນເຂົ້າຮຽນ ຈໍານວນ 450 ທຶນ ໂດຍຜ່ານພະແນກສຶກສາທິການ ແລະ ກິລາ 17 ແຂວງ 1 ນະຄອນຫລວງໃນທົ່ວປະເທດ. ປັດຈຸບັນໄດ້ຮັບໃບນໍາສົ່ງນັກຮຽນ ຈໍານວນ 8 ສະບັບ ຈາກ 8 ແຂວງລວມ 35 ຄົນ, ຖືວ່າຍັງລໍຖ້າ ອີກ 10 ແຂວງ. ນັກຮຽນກຸ່ມນີ້ ຈະເປີດໃຫ້ລົງທະບຽນໃນວັນທີ 7-18 ກັນຍາ 2026 ທີ່ຈະມາເຖິງນີ້.
ທ່ານ ສຸລິຍາ ກ່າວຕື່ມວ່າ: ສໍາລັບການຈັດຕັ້ງການຮຽນ-ການສອນໃນສົກຮຽນ 2026-2027 ນັກຮຽນປີທີ 2 ແລະ ປີທີ 3 ຈະໄດ້ເລີ່ມຮຽນຕັ້ງແຕ່ວັນທີ 7 ກັນຍາ 2026 ເປັນຕົ້ນໄປ ແລະ ນັກຮຽນປີທີ 1 ທຸກສາຂາວິຊາ ຈະໄດ້ເລີ່ມຮຽນຕັ້ງແຕ່ວັນທີ 5 ຕຸລາ 2026 ເປັນຕົ້ນໄປ. ແນວໃດກໍດີ, ໃນນາມຜູ້ບໍລິຫານການສຶກສາ ສະຖານອາຊີວະສຶກສາ, ຂ້າພະເຈົ້າ ຂອບໃຈ ແລະ ຮຽກຮ້ອງມາຍັງສັງຄົມ, ຜູ້ປົກຄອງ ແລະ ສື່ມວນຊົນທັງຫລາຍທີ່ຊ່ວຍຊຸກຍູ້, ສົ່ງເສີມ ແລະ ກະຈາຍຂ່າວ ໃຫ້ນ້ອງໆ ນັກຮຽນ ຜູ້ທີ່ຮຽນຈົບ ມັດທະຍົມຕອນຕົ້ນ ແລະ ມັດທະຍົມຕອນປາຍ ຫັນມາຮຽນວິຊາຊີບໃຫ້ຫລາຍຂຶ້ນ ເພາະການຮຽນວິຊາຊີບຈະຊ່ວຍໃຫ້ນ້ອງໆ ມີອາຊີບ, ມີອະນາຄົດທີ່ສົດໃສ ແລະ ໝັ້ນຄົງ. ພ້ອມດຽວກັນນັ້ນ, ຂໍຂອບໃຈ ມາຍັງ ຄະນະລັດຖະບານ ທີ່ໄດ້ມີນະໂຍບາຍ ສະໜັບສະໜູນ ເບ້ຍລ້ຽງ ໃຫ້ນັກຮຽນສາຍ ອາຊີວະສຶກສາຈໍານວນ 15.000 ຄົນ ໃນທົ່ວປະເທດ ຢ່າງທົ່ວເຖິງ, ນີ້ຖືເປັນໂອກາດທີ່ດີຫລາຍ ສໍາລັບນ້ອງໆທຸກຄົນ.
ການກະກຽມຄວາມພ້ອມຂອງວິທະຍາໄລເຕັກນິກ ລາວ-ເຢຍລະມັນ ໃນສົກຮຽນ 2026-2027 ຈຶ່ງບໍ່ພຽງແຕ່ສະແດງເຖິງການຂະຫຍາຍໂອກາດການຮຽນຮູ້ໃຫ້ແກ່ໄວໜຸ່ມເທົ່ານັ້ນ ແຕ່ຍັງເປັນການວາງຮາກຖານໃນການສ້າງກຳລັງແຮງງານວິຊາຊີບທີ່ມີສີມື, ມີຄຸນນະພາບ ແລະ ສາມາດຕອບສະໜອງຕໍ່ຕະຫລາດແຮງງານທັງພາຍໃນ ແລະ ສາກົນ. ໂດຍສະເພາະນະໂຍບາຍຍົກເວັ້ນຄ່າຮຽນໃຫ້ນັກຮຽນຍິງທຸກສາຂາ ຈະເປັນອີກກົນໄກສຳຄັນໃນການສ້າງໂອກາດ ແລະ ຊຸກຍູ້ໃຫ້ເພດຍິງເຂົ້າມາມີບົດບາດໃນສາຍວິຊາຊີບຫລາຍຂຶ້ນ.
ໂດຍ: ມາລີດາ
KPL
