ຂປລ
ທ່ານ ຮານເຈີ້ງ ຮອງປະທານປະເທດຈີນ ໄດ້ພົບປະເຈລະຈາກັບ ທ່ານ ອາຈິດ ຄູມາ ໂດວານ ຜູ້ຕາງໜ້າພິເສດຝ່າຍອິນເດຍ ກ່ຽວກັບບັນຫາຊາຍແດນ ອິນເດຍ-ຈີນ ທັງເປັນ ທີ່ປຶກສາ ດ້ານຄວາມໝັ້ນຄົງ ແຫ່ງຊາດອິນເດຍ.
ຂປລ.ວິທະຍຸ-ໂທລະພາບສູນກາງຈີນ, ວັນທີ 25 ສິງຫານີ້, ຢູ່ນະຄອນຫລວງປັກກິ່ງຂອງ ສປ ຈີນ, ທ່ານ ຮານເຈີ້ງ ຮອງປະທານປະເທດຈີນ ໄດ້ພົບປະເຈລະຈາກັບ ທ່ານ ອາຈິດ ຄູມາ ໂດວານ ຜູ້ຕາງໜ້າພິເສດຝ່າຍອິນເດຍ ກ່ຽວກັບ ບັນຫາຊາຍແດນ ອິນເດຍ-ຈີນ ທັງເປັນ ທີ່ປຶກສາ ດ້ານຄວາມໝັ້ນຄົງ ແຫ່ງຊາດອິນເດຍ. ທ່ານ ຮານເຈີ້ງ ກ່າວວ່າ: ສປ ຈີນ ແລະ ອິນເດຍ ໃນຖານະເປັນປະເທດ ບ້ານໃກ້ເຮືອນຄຽງ ທີ່ພວມພັດທະນາແລະ ເປັນກຸ່ມເສດຖະກິດ ຈະເລີນຂຶ້ນໃໝ່ ທີ່ສຳຄັນ,ຄວນປະຕິບັດ ແລະ ແກ້ໄຂການພົວພັນ ລະຫວ່າງ ສອງປະເທດ ຈາກທາງດ້ານຍຸດທະສາດ ແລະ ໄລຍະຍາວ, ຮ່ວມກັນຈັດຕັ້ງປະຕິບັດ ຄວາມຮັບຮູ້ ທີ່ເປັນເອກະພາບກັນ ອັນສຳຄັນລະຫວ່າງ ຜູ້ນຳຂອງສອງປະເທດໃຫ້ດີ, ເພີ່ມທະວີຄວາມໄວ້ເນື້ອເຊື່ອໃຈກັນ ທາງຍຸດທະສາດ, ຂຸດຄົ້ນຄວາມສາມາດບົ່ມຊ້ອນດ້ານການຮ່ວມມື, ຮັດແໜ້ນ ການປະສານງານ ຫລາຍຝ່າຍ, ແກ້ໄຂ ແລະ ຄວບຄຸມຄວາມຂັດແຍ້ງກັນ ຢ່າງເໝາະສົມ ແລະ ຊຸກຍູ້ການພົວພັນລະຫວ່າງ ສປ ຈີນ-ອິນເດຍ ໃຫ້ພັດທະນາ ຢ່າງໝັ້ນທ່ຽງ ແລະ ຕໍ່ເນື່ອງ. ທ່ານ ອາຈິດ ຄູມາ ໂດວານ ກ່າວວ່າ: ອິນເດຍ ຍິນດີລົງເລິກ ການຮ່ວມມື ແບບຕ່າງຝ່າຍຕ່າງ ໄດ້ຮັບຜົນປະໂຫຍດກັບ ສປ ຈີນ, ແກ້ໄຂບັນຫາຊາຍແດນ ລະຫວ່າງ ສອງປະເທດ ຢ່າງເໝາະສົມ ແລະ ຍູ້ການຂະຫຍາຍການພົວພັນ ລະຫວ່າງ ສອງຝ່າຍ ໃຫ້ໄດ້ຮັບຄວາມຄືບໜ້າໃໝ່./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
