ຂປລ
ຂປລ. ເສັ້ນເຝີ ເປັນອາຫານປະເພເສັ້ນທີ່ໄດ້ຮັບຄວາມນິຍົມຈາກປະຊາຊົນ ແລະ ສາມາດນຳໄປປຸງແຕ່ງເປັນຫລາຍລາຍການອາຫານ. ດ້ວຍເຫດນີ້ ອາຊີບຜະລິດເສັ້ນເຝີ ຈຶ່ງມີການຂະຫຍາຍຕົວໃນຫລາຍທ້ອງຖິ່ນ ເຊິ່ງແຕ່ລະແຫ່ງຈະມີເອກະລັກສະເພາະທີ່ບໍ່ຄືໃຜ ເໝືອນດັ່ງ ເສັ້ນເຝີ ຈາກ ກຸ່ມຜະລິດເສັ້ນເຝີພັດທະນາຊຸມຊົນ ບ້ານ ດອນຂະເໝົາ ເມືອງໂຂງ ແຂວງຈຳປາສັກ
ຂປລ. ເສັ້ນເຝີ ເປັນອາຫານປະເພເສັ້ນທີ່ໄດ້ຮັບຄວາມນິຍົມຈາກປະຊາຊົນ ແລະ ສາມາດນຳໄປປຸງແຕ່ງເປັນຫລາຍລາຍການອາຫານ. ດ້ວຍເຫດນີ້ ອາຊີບຜະລິດເສັ້ນເຝີ ຈຶ່ງມີການຂະຫຍາຍຕົວໃນຫລາຍທ້ອງຖິ່ນ ເຊິ່ງແຕ່ລະແຫ່ງຈະມີເອກະລັກສະເພາະທີ່ບໍ່ຄືໃຜ ເໝືອນດັ່ງ ເສັ້ນເຝີ ຈາກ ກຸ່ມຜະລິດເສັ້ນເຝີພັດທະນາຊຸມຊົນ ບ້ານ ດອນຂະເໝົາ ເມືອງໂຂງ ແຂວງຈຳປາສັກ ກໍເປັນອີກກຸ່ມໜຶ່ງທີ່ໄດ້ນຳເອົາພູມປັນຍາຈາກຄົນຮຸ່ນກ່ອນມາພັດທະນາເປັນ ຈົນເຮັດໃຫ້ກຸ່ມສາມາດ ສ້າງລາຍຮັບ ໄດ້ເຖິງ 43.000 ລ້ານກີບ ໃນໄລຍະເວລາ 6 ເດືອນຜ່ານມາ.
ທ່ານ ໄພທອງ ແສງປະທຸມ ປະທານສະຫະກອນ ຜະລິດເສັ້ນເຝີ ພັດທະນາຊຸມຊົນ ດອນຂະເໝົາ ໃຫ້ຮູ້ວ່າ: ເສັ້ນເຝີດອນຂະເໝົາ ມີຈຸດເລີ່ມຕົ້ນຈາກພູມປັນຍາຊາວບ້ານທີ່ສືບທອດກັນມາແຕ່ລຸ້ນປູ່ຍ່າຕາຍາຍ ຊຶ່ງໃນອະດີດແມ່ນເຮັດແບບຄອບຄົວກະແຈກກະຈາຍ ຕໍ່ມາໃນປີ 2013 ໄດ້ໂຮມໂຕກັນສ້າງຕັ້ງເປັນກຸ່ມຜະລິດ ໂດຍມີ 17 ຄອບຄົວ, ດ້ວຍລົດຊາດ ແລະ ຄຸນນະພາບທີ່ເປັນເອກະລັກ, ໃນປີ 2015 ຈຶ່ງໄດ້ຮັບນາມມະຍົດເປັນສິນຄ້າ ໂອດັອບ (ODOP) ແຫ່ງຊາດ. ຈາກຄວາມເຂັ້ມແຂງ ແລະ ການຂະຫຍາຍຕົວຢ່າງໄວວາ, ໃນປີ 2025 ໄດ້ຍົກລະດັບສ້າງຕັ້ງເປັນ "ສະຫະກອນຜະລິດເສັ້ນເຝີພັດທະນາຊຸມຊົນ ດອນຂະເໝົາ" ຢ່າງເປັນທາງການ ຊຶ່ງປັດຈຸບັນມີສະມາຊິກເພີ່ມຂຶ້ນເຖິງ 48 ຄອບຄົວ, ມີກຳລັງແຮງງານທັງໝົດ 144 ຄົນ ຍິງ 48 ຄົນ ແລະ ມີໂຮງງານຜະລິດເສັ້ນເຝີ ກວມເອົາ 4 ບ້ານ ຄື: ບ້ານຂະເໝົາໂພນຈໍາປາ, ຂະເໝົາພູແມວ, ຂະເໝົາປາກເຊ ແລະ ບ້ານລົບປາກດີກາງ ລວມທັງໝົດ 22 ແຫ່ງ. ໃນໄລຍະ 6 ເດືອນຕົ້ນປີ 2026 ຜ່ານມາ, ສະຫະກອນສາມາດຜະລິດເສັ້ນເຝີໄດ້ສະເລ່ຍ 288 ໂຕນຕໍ່ເດືອນ ລວມ 6 ເດືອນ ສາມາດຜະລິດໄດ້ທັງໝົດ 1.728 ໂຕນ ສ້າງລາຍຮັບໄດ້ເຖິງ 43.000 ລ້ານກີບ, ປະຕິບັດໄດ້ 90% ຂອງແຜນການປີ ແລະ ເພີ່ມຂຶ້ນ 9% ຖ້າທຽບໃສ່ໄລຍະດຽວກັນຂອງປີກ່ອນ.
ທ່ານ ໄພທອງ ເວົ້າເສີມວ່າ: ນອກຈາກຕົວເລກທາງເສດຖະກິດທີ່ໂດດເດັ່ນແລ້ວ, ເສັ້ນເຝີດອນຂະເໝົາຍັງໄດ້ເຂົ້າຮ່ວມງານວາງສະແດງທັງລະດັບເມືອງ ແລະ ແຂວງ ລວມ 7 ຄັ້ງ, ທີ່ສໍາຄັນແມ່ນສາມາດຍາດໄດ້ອັນດັບທີ 1 ໃນງານວັດພູຈໍາປາສັກ ຈາກ 9 ຕົວເມືອງ ແລະ 1 ນະຄອນ ທົ່ວແຂວງຈຳປາສັກ. ພ້ອມກັນນັ້ນ, ສະຫະກອນຍັງໄດ້ແບ່ງປັນຜົນກຳໄລຄືນສູ່ສັງຄົມ ໂດຍໄດ້ປະກອບສ່ວນຊ່ວຍເຫລືອວຽກງານສ່ວນລວມພາຍໃນຕາແສງ ແລະ ເມືອງ ເປັນມູນຄ່າຫລາຍກວ່າ 180 ລ້ານກີບ. ຄວາມສໍາເລັດອັນຍິ່ງໃຫຍ່ນີ້ ແມ່ນເກີດຈາກການຊີ້ນຳ-ນຳພາຂອງພັກ-ລັດ, ຜ່ານມາໄດ້ຮັບການສະໜັບສະໜູນອຸປະກອນການຜະລິດຈາກໂຄງການພັດທະນາເຂື່ອນໄຟຟ້າດອນສະໂຮງ ເຊັ່ນ: ຈັກຊອຍເສັ້ນເຝີ 5 ເຄື່ອງ, ຜ້າຢາງເຮືອນຕາກ 10 ມັດ ແລະ ເຄື່ອງອັດສູນຍາກາດ 1 ເຄື່ອງ ມູນຄ່າ 250 ລ້ານກີບ. ຄຽງຄູ່ກັບຜົນງານຕ່າງໆທີ່ກ່າວມານັ້ນສະຫະກອນກໍຍັງເຫັນເຖິງຂໍ້ຫຍຸ້ງຍາກ ເປັນຕົ້ນ: ແມ່ນການຂາດເຂີນເຂົ້າທີ່ເປັນວັດຖຸດິບ ເຂົ້າທີ່ຊາວບ້ານຜະລິດເອງໃຊ້ໄດ້ພຽງ 3 ເດືອນ ຈຳເປັນຕ້ອງຊື້ເພີ່ມຈາກບ້ານໃກ້ຄຽງ ແລະ ສະພາບເສດຖະກິດສິນຄ້າລາຄາແພງ ເຮັດໃຫ້ສະມາຊິກບາງຄອບຄົວຕ້ອງຢຸດຕິການຜະລິດຊົ່ວຄາວ. ແຕ່ເຖິງຢ່າງໃດກໍຕາມ, ສະຫະກອນ ຜະລິດເສັ້ນເຝີພັດທະນນຊຸມຊົນ ດອນຂະເໝົາ ຍັງຄົງມຸ່ງໝັ້ນທີ່ຈະປັບປຸງ ແລະ ເດີນໜ້າສູ້ຕໍ່ເພື່ອຮັກສາຄຸນນະພາບເສັ້ນເຝີດອນຂະເໝົາ ໃຫ້ເປັນສິນຄ້າພູມປັນຍາທີ່ສ້າງລາຍໄດ້ ແລະ ຊື່ສຽງໃຫ້ເມືອງໂຂງຢ່າງຍືນຍົງ.
ໂດຍ: ພຸດທະສິນ ວົງວິໄລທອງ ສະຖານີວິທະຍຸ-ໂທລະພາບເມືອງໂຂງ
KPL
