ຂປລ. ງານຈັດຂຶ້ນຢ່າງສົມກຽດໃນວັນທີ 12 ສິງຫາ 2026 ຢູ່ເດີ່ນພະທາດຫລວງວຽງຈັນ ໂດຍມີສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດ ແຫ່ງ ສປປ ລາວ, ສະຫາຍ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ, ສະຫາຍ ເຈ່ີນ ເກີມ ຕູ໊  ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກກອມມູນິດຫວຽດນາມ, ມີບັນດາການນຳຂ້ັນສູງພັກ, ລັດ, ບັນດາທູຕານຸທູດ, ຜູ້ຕາງໜ້າອົງການຈັດຕັ້ງສາກົນ, ພ້ອມດ້ວຍມວນຊົນພາຍໃນນະຄອນຫລວງວຽງຈັນ ເຂົ້າຮ່ວມ.

    ໂອກາດດັ່ງກ່າວ, ສະຫາຍ ທອງລຸນ ສີສຸລິດ ໄດ້ຂຶ້ນອ່ານບົດສະດຸດີເຖິງສະຫາຍ ໄຊສົມພອນ ພົມວິຫານ ໂດຍມີເນ້ືອໃນບາງຕອນເນັ້ນເຖິງຊີວິດ, ການອຸທິດຕົນ ແລະ ຜົນງານຂອງສະຫາຍ ໄຊສົມພອນ ພົມວິຫານ ຕະຫລອດກວ່າ 5 ທົດສະວັດໃນພາລະກິດຮັບໃຊ້ຊາດ, ຮັບໃຊ້ພັກ ແລະ ປະຊາຊົນ, ສະຫາຍ ໄຊສົມພອນ ພົມວິຫານ ເກີດວັນທີ 12 ທັນວາ 1956 ຢູ່ບ້ານນາແມວ ເມືອງຊຳເໜືອ ແຂວງຫົວພັນ, ສະຫາຍໄດ້ສຶກສາຢູ່ ສສ ຫວຽດນາມ, ສປ ຈີນ ແລະ ສະຫະພາບ ໂຊວຽດ ຈົນສຳເລັດລະດັບປະລິນຍາເອກດ້ານເສດຖະສາດການເມືອງ. ຕະຫລອດໄລຍະການຮັບໃຊ້ປະເທດຊາດ, ສະຫາຍ ໄດ້ດຳລົງຫລາຍຕຳແໜ່ງສຳຄັນເປັນຕົ້ນຮອງເຈົ້າແຂວງ ແລະ ເຈົ້າແຂວງສະຫວັນນະເຂດ, ລັດຖະມົນຕີກະຊວງການເງິນ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ປະທານກຳມາທິການການຕ່າງປະເທດຂອງສະພາແຫ່ງຊາດ, ຮອງປະທານສະພາແຫ່ງຊາດ, ປະທານສູນກາງແນວລາວສ້າງຊາດ ແລະ ປະທານສະພາແຫ່ງຊາດ ຈົນສິ້ນລົມຫາຍໃຈ.

      ຕະຫລອດໄລຍະ 5 ທົດສະວັດກວ່າທ່ີສະຫາຍ ໄຊສົມພອນ ພົມວິຫານ ໄດ້ເຂົ້າຮ່ວມໃນພາລະກິດລວມຂອງພັກ-ລັດ ແລະ ໄດ້ຮັບການຢັ້ງຢືນວ່າ ສະຫາຍແມ່ນນັກຮຽນຮູ້ປັນຍາຊົນປະຕິວັດ ທ່ີມີຄວາມຮູ້ຄວາມສາມາດທີ່ເລິກເຊິ່ງຫລາຍດ້ານ, ມີວິໄສທັດກວ້າງໄກ, ມີທັດສະນະຫລັກໝັ້ນການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ມີມະໂນທຳ, ມີຈິດໃຈຮັກເຊື້ອແພງຊາດ, ມີນໍ້າໃຈເສຍສະລະອັນສູງສົ່ງ, ມີຄວາມຈົງຮັກພັກດີ-ບໍລິສຸດຕໍ່ພັກ ຕ່ໍປະເທດຊາດ ແລະ ຕໍ່ປະຊາຊົນ, ຍາມໃດກໍມີຄວາມມຸ່ງໝັ້ນ ແລະ ຍຶດໝັ້ນໃນອຸດົມການອັນສູງສົ່ງຂອງພັກ; ມີຄວາມທຸ່ນທ່ຽງ, ສຸຂຸມ- ຮອບຄອບ ແລະ ມີໄຫວພິບໃນການຈັດຕັ້ງປະຕິບັດວຽກງານທີ່ຕົນຮັບຜິດຊອບ, ກໍາແໜ້ນແນວທາງ, ນະໂຍບາຍຂອງພັກ ແລະ ເປັນແບບຢ່າງນໍາໜ້າໃນການຈັດຕັ້ງປະຕິບັດເຂົ້າສູ່ວຽກງານຕົວຈິງ; ສະຫາຍ ໄດ້ຜ່ານການຝຶກຝົນ, ທົດສອບໃນຫລາຍຂົງເຂດວຽກງານ ຊຶ່ງໃນແຕ່ລະວຽກທີ່ຖືກມອບໝາຍລ້ວນແຕ່ໄດ້ຮັບຜົນສໍາເລັດ ແລະ ມີຜົນງານຢ່າງເປັນຮູບປະທໍາ. 

    ຕະຫລອດຊີວິດແຫ່ງການປະຕິວັດຮັບໃຊ້ຊາດ, ຮັບໃຊ້ປະຊາຊົນ, ສະຫາຍ ໄຊສົມພອນ ພົມວິຫານ ໄດ້ອຸທິດຕົນເພ່ືອພາລະກິດປົກປັກຮັກສາ ແລະ ພັດທະນາປະເທດຊາດ, ເວລາໃດກໍຖືຜົນປະໂຫຍດຂອງພັກ, ຂອງຊາດ ແລະ ຂອງປະຊາຊົນ ເໜືອກວ່າສິ່ງອື່ນໃດ; ເວລາໃດສະຫາຍກໍດໍາລົງຊີວິດແບບລຽບງ່າຍ, ປອດໃສຂາວສະອາດ, ປະຢັດມັດທະຍັດ, ໃກ້ຊິດຕິດແທດກັບມະຫາຊົນ, ຈິງໃຈຕໍ່ເພື່ອນສະຫາຍ, ເອ້ືອເຟ້ືອເພ່ືອແຜ່ກັບທຸກຄົນຢູ່ອ້ອມຂ້າງຕົນ; ເຂັ້ມງວດໃນດ້ານຫລັກການ, ເຄັ່ງຄັດຕໍ່ລະບຽບວິໄນ; ໄດ້ຮັບຄວາມເຄົາລົບນັບຖື, ເຊື່ອໝັ້ນຈາກເພື່ອນສະຫາຍ ແລະ ປະຊາຊົນລາວບັນດາເຜົ່າ ກໍຄື ຈາກເພື່ອນມິດສາກົນ.

   ດ້ວຍຜົນງານ ແລະ ຄຸນງາມຄວາມດີຂອງສະຫາຍ ໄຊສົມພອນ ພົມວິຫານ ທີ່ໄດ້ເສຍສະລະເຫື່ອແຮງ, ທຸ່ມເທສະຕິປັນຍາເຂົ້າໃນພາລະກິດປົກປັກຮັກສາ ແລະ ພັດທະນາປະເທດຊາດ ຕະຫລອດຊີວິດຂອງສະຫາຍນັ້ນ, ສະຫາຍຈຶ່ງໄດ້ຮັບການຍ້ອງຍໍສັນລະເສີນຈາກ ພັກ ແລະ ລັດ ຂອງພວກເຮົາ ແລະ ຈາກເພ່ືອນມິດສາກົນ ເປັນຈຳນວນຫລວງຫລາຍ.

   ການຈາກໄປຂອງສະຫາຍ ໄຊສົມພອນ ພົມວິຫານ ເປັນການສູນເສຍທີ່ໃຫຍ່ຫລວງສຳລັບພັກ, ລັດ ແລະ ປະຊາຊົນລາວບັນດາເຜົ່າ, ເຮັດໃຫ້ພັກ-ລັດ ກໍຄື ປະເທດເຮົາສູນເສຍພະນັກງານການນຳຂ້ັນສູງ, ການນຳຍຸດທະສາດທີ່ສໍາຄັນໄປອີກສະຫາຍໜຶ່ງ ຊຶ່ງໄດ້ນຳເອົາຄວາມໂສກເສົ້າ, ເສຍດາຍ ແລະ ອາໄລອາວອນອັນສຸດຊຶ້ງໃຫ້ແກ່ພັກ- ລັດ ແລະ ຄອບຄົວ, ຍາດພີ່ນ້ອງ, ເພື່ອນມິດຜູ້ຢູ່ໃກ້ ແລະ ໄກຢ່າງຫາອັນປຽບບໍ່ໄດ້. 

         ຂ່າວ: ທະນູທອງ

KPL