ຂປລ. ໜັງສືພິມຊາວໜຸ່ມ ແມ່ນໜັງສືພິມໜຶ່ງທີ່ມີຕົ້ນກຳເນີດຂອງສື່ມວນຊົນຫວຽດນາມ ຊຶ່ງໄດ້ຮັບການສ້າງຕັ້ງຂຶ້ນໃນວັນທີ 21 ມິຖຸນາ ປີ 1925 ສ້າງຕັ້ງໂດຍປະທານ ໂຮ່ຈິມິນ. ການສ້າງຕັ້ງໜັງສືພິມດັ່ງກ່າວ ເພື່ອເປັນກະບອກສຽງໃຫ້ແກ່ພັກ ແກ່ລັດໃນການຕໍ່ສູ້ກູ້ຊາດ ເພື່ອຍາດເອົາເອກະລາດມາໃຫ້ປະເທດຊາດ, ການເຕົ້າໂຮມຄວາມສາມັກຄີຂອງປະຊາຊົນຊາວຫວຽດນາມ ໃນໄລຍະຕໍ່ສູ້ກູ້ຊາດ, ໂຄສະ ນາແນວທາງນະໂຍບາຍຂອງພັກ. ດ້ວຍຜົນງານອັນຍິ່ງໃຫຍ່ຂອງໜັງສືພິມຊາວໜຸ່ມນັ້ນ, ສຳນັກງານເລ ຂາທິການສູນກາງພັກກອມມູນິດຫວຽດນາມ ໄດ້ອອກມະຕິຕົກລົງເລກທີ 52 ລົງວັນທີ 5 ກຸມພາ 1985 ໄດ້ກຳນົດວັນທີ 21 ມິຖຸນາຂອງທຸກໆປີເປັນວັນສື່ມວນຊົນຫວຽດນາມ ເພື່ອເສີມຂະຫຍາຍບົດບາດ ແລະ ຄວາມຮັບຜິດຊອບຕໍ່ສັງຄົມຂອງສື່ມວນຊົນ, ເສີມສ້າງສາຍພົວພັນລະຫວ່າງສື່ມວນຊົນ ແລະ ປະຊາຊົນ ແລະ ເສີມຂະຫຍາຍຄວາມເປັນຜູ້ນຳຂອງພັກຕໍ່ສື່ມວນຊົນ.
      ທ່ານ ບຸ່ຍ ຊວັນ ຕູ໊ ຫົວໜ້າຫ້ອງການຜູ້ຕາງໜ້າຂ່າວສານປະຈຳລາວ ໄດ້ໃຫ້ສຳພາດຕໍ່ນັກຂ່າວສຳນັກຂ່າວສານປະເທດລາວທ້າຍອາທິດມານີ້ວ່າ: ບໍ່ວ່າ ໃນໄລຍະຕໍ່ສູ້ກູ້ຊາດ ແລະ ໄລຍະພັດທະນາປະເທດຊາດ ສື່ມວນຊົນຫວຽດນາມ ແມ່ນມີຄວາມສຳຄັນຫລາຍໃນການໂຄສະນາເຜີຍແນວທາງຂອງພັກ, ໂຄສະນາເຕົ້າໂຮມຄວາມສາມັກຄີຂອງປະຊາຊົນ ເພື່ອຕໍ່ ສູ້ຍາດເອົາເອກະລາດ, ເສລີພາບ ມາສູ່ປະຊາຊົນຫວຽດນາມ. ຂະນະທີ່ໃນປັດຈຸບັນ ສື່ມວນຊົນຍິ່ງມີຄວາມສຳຄັນໃນການເປັນກະບອກສຽງຂອງພັກຂອງລັດ ໃນການໂຄສະນາແນວທາງນະໂຍບາຍຕ່າງໆລະຫວ່າງພັກ-ລັດກັບປະຊາຊົນ, ການພັດທະນາປະເທດຊາດ, ການດຶງດູດການທ່ອງທ່ຽວ, ການລົງທຶນ, ການຊຸກຍູ້ດ້ານເສດຖະກິດ, ການຄ້າ, ດຶງດູດການລົງທຶນຂອງຕ່າງປະເທດ. ໃນຍຸກປັດຈຸບັນໄດ້ມີສື່ສັງຄົມອອນໄລໄດ້ອອກມາມີຫລາຍ. ສະນັ້ນ, ພວກເຮົາຕ້ອງໄດ້ພັດທະນາຕົນເອງໃຫ້ມັນທັນກັບການພັດທະນາປະເທດຊາດກໍຄືໃນຍຸກດີຈິຕອນ. ສື່ມວນຊົນແຕ່ລະຄົນຕ້ອງສຶກສາຮ່ຳຮຽນ ເພື່ອຕອບສະໜອງຄວາມຮຽກຮ້ອງຕ້ອງການຂອງວຽກງານຕາມທີ່ພັກ-ລັດມອບໝາຍໃຫ້ ທັງສ້າງໄດ້ຄວາມໜ້າເຊື່ອຖື, ລາຍງານຂ່າວມີມູນຄວາມຈິງ. ນອກຈາກນີ້, ສື່ມວນຊົນ ຍັງຊ່ວຍຊຸກຍູ້ການຮ່ວມມືລະຫວ່າງພັກ-ລັດຖະບານ ກັບບັນດາປະເທດເພື່ອນມິດ, ບັນດາປະເທດໃນໂລກ ແລະ ອື່ນໆ.
        ສຳລັບດ້ານການຮ່ວມມືລະຫວ່າງສື່ມວນຊົນຫວຽດນາມ ແລະ ສື່ມວນຊົນລາວ, ນັບແຕ່ໄລຍະຕໍ່ສູ້ ກໍຄືໄລຍະສ້າງສາພັດທະນາປະເທດຊາດ, ສື່ມວນຊົນສອງປະເທດໄດ້ມີການພົວພັນຢ່າງສະໜິດແໜ້ນ, ມີການຊ່ວຍເຫລືອເຊິ່ງກັນ ແລະ ກັນ ຕາມການສັ່ງສອນຂອງຜູ້ນຳທີ່ຍິ່ງໃຫຍ່ສອງປະເທດ ນັບແຕ່ສູນກາງຂອງທ້ອງຖິ່ນ. ສຳລັບຢູ່ຂັ້ນສູນກາງກໍມີສຳນັກຂ່າວສານຫວຽດນາມ, ໂທລະພາບຫວຽດນາມ, ວິທະຍຸຫວຽດນາມ ແລະ ໜັງສືພິມປະຊາຊົນ. ປັດຈຸບັນສື່ມວນຊົນຫວຽດນາມມີຫ້ອງການຜູ້ຕ່າງໜ້າປະຈຳຢູ່ ສປປ ລາວ 4 ແຫ່ງ. ບັນດາຫ້ອງການຜູ້ຕ່າງໜ້າລ້ວນແຕ່ເປັນຂົວຕໍ່ຊຸກຍູ້ບັນດາການຮ່ວມມືລະຫວ່າງສື່ມວນຊົນ ຂອງສອງປະເທດໃນການແລກປ່ຽນຄວາມຮູ້ເຊິ່ງກັນ ແລະ ກັນ, ໄປມາຫາສູ່ກັນ, ຊ່ວຍເຫລືອດ້ານອຸປະ ກອນ, ຊ່ວຍເຫລືອຝຶກອົບຮົມທາງດ້ານວິຊາການ, ຊ່ວຍກັນໂຄສະນາໃນດ້ານຮ່ວມມືທາງດ້ານເສດຖະກິດ, ການລົງທຶນ, ການຄ້າຂາຍ ແລະ ອື່ນໆດ້ວຍດີຕະຫລອດມາ. ທ່ານ ບຸ່ຍ ຊວັນ ຕູ໊  ກ່າວ.