ຂປລ. ໃນໂອກາດເຂົ້າຮ່ວມງານວາງສະແດງສິນຄ້າ ສະຫະກອນ ກຸ່ມ ແລະ ຜູ້ປະກອບການ ຮ່ວມສະເຫລີມສະຫລອງວັນສະຫະກອນ (11 ພຶດສະພາ 1978) ຄົບຮອບ 48 ປີ ທີ່ນະຄອນຫລວງວຽງຈັນ ສະຫະກອນ ຮ່ວມ​ໃຈ​ພັດທະນາກະສິກໍາ ໄດ້ນໍາເອົາຜະລິດຕະພັນຂອງຕົນມາວາງຈໍາໜ່າຍ ເປັນຕົ້ນແນວພັນເຂົ້າຫອມທ່າດອກຄຳ 1, ຫອມທ່າດອກຄຳ 8, ຫອມທ່າດອກຄຳ 15, ທ່າດອກຄຳ 8 ແລະ  ຫອມເຊບັ້ງໄຟ 4 ເພື່ອຈໍາໜ່າຍ ແລະ ໃຫ້ສັງຄົມໄດ້ຮັບຮູ້ຫລາຍຂຶ້ນ.

 ທ່ານ ຂັນ​ຄໍາ ​ເຂັມ​ພາ​ວັນ ປະທານ​ສະຫະກອນ ຮ່ວມ​ໃຈ​ພັດທະນາກະສິກໍາ​ໃຫ້​ຮູ້​ວ່າ:  ການເຂົ້າຮ່ວມງານໃນຄັ້ງນີ້ ​ສະ ຫະກອນ ຮ່ວມ​ໃຈ​ພັດທະນາ ໄດ້ສ້າງຕັ້ງຂຶ້ນໃນ 26 ກໍລະກົດ 2012 ມີສະມາຊິກເຂົ້າຮ່ວມເບື້ອງຕົ້ນທັງໝົດ 22 ຄອບຄົວ ​ແຕ່​ມາ​ປັດຈຸບັນ 161 ຄອບຄົວ ​ເລີ່​ມຕົ້ນ ກຸ່ມພວກເຮົາໄດ້ຮັບທຶນສະໜັບສະໜູນດ້ານປັດ​ໄຈການຜະລິດ ແລະ ອຸປະກອນກົນຈັກກະສິກຳ ຈຳນວນ 10 ກວ່າລາຍການ ເຊັ່ນ: ເຄື່ອງຂັດເມັດ, ເຄື່ອງອົບແຫ້ງ, ຈັກປັ່ນເຂົ້າ, ລົດດຳນາຢ່າງຕາມ ແລະ ອື່ນ, ພ້ອມທັງໄດ້ຮັບການຝຶກອົບຮົມດ້ານເຕັກນິກການປູກເຂົ້າສິນຄ້າ, ການຜະລິດເຂົ້າແນວພັນ, ເຕັກນິກການບໍລິຫານກຸ່ມ,ຈາກໂຄງການຜະລິດກະສິກຳເປັນສິນຄ້າຂອງລັດຖະບານ ໂດຍແມ່ນຂະແໜງການກະສິກຳ ແລະ ປ່າໄມ້ໄດ້ຊຸກຍູ້-ສົ່ງເສີມນໍາພາຈັດຕັ້ງປະຕິບັດເຊິ່ງເຮັດໃຫ້ກຸ່ມການຜະລິດເຂົ້າຂອງຂອງພວກເຮົາໄດ້ມີການຫັນປ່ຽນ, ຈາກທີ່ເຄີຍຜະລິດແບບທຳມະຊາດ, ນຳໃຊ້ແນວພັນເຂົ້າພື້ນບ້ານທີ່ຊາວນາເກັບຮັກສາເອງເອົາມາປູກ ຊຶ່ງມີຜົນຜະລິດຄຸນນະພາບເຂົ້າບໍ່ດີ, ເປັນເຂົ້າແຂງ ແຕ່ຜ່ານການຝຶກອົບຮົມດ້ານເຕັກນິກຕ່າງໆ, ຊາວນາກຸ່ມບ້ານຕຶງ ສາມາດຜະລິດເຂົ້າແນວພັນທີ່ມີຄຸນນະພາບດີຕອບສະໜອງໃຫ້ແກ່ສັງຄົມຢ່າງຕໍ່ເນື່ອງ, ເຮັດໃຫ້ກຸ່ມພວກເຮົາໄດ້ເຕີບໃຫຍ່ຂະຫາຍຕົວຢ່າງຕັ້ງໜ້າ, ເນື້ອທີ່ການຜະລິດເພີ່ມ, ນາປີ, ນາແຊງ ຈາກ 42,19 ເຮັກຕາ, ໃນປີ 2012 ມາເປັນ 56,2 ເຮັກຕາ ໃນປີ 2021, ສະມັດຕະພາບ 3-4 ໂຕນຕໍ່ເຮັກຕາ, ຂາຍເປັນແນວພັນ 10-15 ໂຕນຕໍ່ປີ, ເຫລືອນັ້ນແມ່ນຂາຍເປັນເຂົ້າສິນຄ້າທີ່ຄຸນນະພາບດີ, ການຜະລິດແນວພັນເຂົ້າຂອງກຸ່ມ ປະກອບມີ 5 ແນວພັນຄື: ແນວພັນເຂົ້າຫອມທ່າດອກຄຳ 1, ເຂົ້າຫອມທ່າດອກຄຳ 8, ເຂົ້າຫອມທ່າດອກຄຳ 15, ເຂົ້າທ່າດອກຄຳ 8 ແລະ ເຂົ້າຫອມເຊບັ້ງໄຟ 4 ຊຶ່ງເປັນທີ່ນິຍົມຂອງຊາວນາ ແລະ ຕະຫລາດຕ້ອງການ, ຜ່ານການຜະລິດແນວພັນເຂົ້າ ແລະ ການຈຳໜ່າຍແນວພັນເຂົ້າ, ກຸ່ມບ້ານຕຶງ ພວກເຮົາໄດ້ມີເງິນທ້ອນສະສົມ 800 ກວ່າລ້ານກີບ, ສະມາຊິກພາຍໃນກຸ່ມມີລາຍຮັບເພີ່ມຂຶ້ນເລື້ອຍໆ.

ທ່ານ ຂັນ​ຄໍາ ​ເວົ້າ​ເສີມ​ວ່າ:  ການ​ເຂົ້າ​ຮ່ວມ​ງານ​ໃນ​ຄັ້ງ​ນີ້ ຕົນ​ກໍ​ຮູ້​ສຶກດີ​ໃຈ​ຫລາຍ ​ເພາະ​ໄດ້​ເອົາ​ສິນຄ້າ​ມາ​ວາງສະ​ແດງ​ຂາຍ​ໃຫ້ສັງຄົມ​ໄດ້​ຮັບ​ຮູ້​ຫລາຍ​ຂຶ້ນ​ວ່າ​ເມືອງ​ເຊ​ບັ້ງ​ໄຟ ​ແຂ​ວງຄໍາ​ມ່ວນ ກໍ​ມີ​ສູນ​ລວມ​ແນວ​ເຂົ້າ ສໍາລັບຊາວ​ກະ​ສິກ​ອນລາວ ​​ໂດຍ​ການ​ຜະລິດແນວ​ພັນ​ແມ່ນ​ເຮົາ​ຈະ​ມີ​ການ​ຄັດ​​ເລືອກ​ເຂົ້າປົນ, ໝາກຫຍ້າ​ລະອຽດ ​ກ່ອນ​ຂາຍ, ສ່ວນ​ລາຄາ​ຂາຍ​ແມ່ນ 15.000 ​ກີບ​ຕໍ່ກິ​ໂລ  ​ຊຶ່ງ​ໂດຍ​ສະ​ເລ່ຍ​ແລ້ວ ສະມາຊິກ​ພາຍ​ໃນ​ກຸ່ມ ສາມາດ​ສ້າງຮັບ 20.000.000 ​ກີບ​ຕໍ່ປີ.  

          ​ເອົາ​ເປັນ​ວ່າ​ຖ້າ​ທ່ານ​​ໃດ​ຢາກ​ໄດ້​ແນວ​ພັນ​ເຂົ້າ​ຄຸນ​ນະພາ​ບດີ ກໍ​ສາມາດ​ເຂົ້າ​ມາ​ຊື່​ໄດ້​ທີ່ສູນ ຕັ້ງ​ຢູ່​ບ້ານ​ຕຶງ ​ເມືອງ​ເຊ​ບັ້ງ​ໄຟ ​ແຂວງ​ຄໍາ​ມ່ວນ ຫລື ຕິດຕໍ່​ໄດ້​ທີ່​ເບີ 02095280645.
ໂດຍ:ມາລີ​ດາ

KPL