ຂປລ
ທ່ານ ເຟີດີນານ ໂຣມົວເດສ ມາຄອດ ປະທານາທິບໍດີຟີລິບປິນ ໄດ້ຢ້ຳຄືນໃນເວລາໃຫ້ສຳພາດຕໍ່ນັກຂ່າວວ່າ: ຟີລິບປິນ ຍຶດໝັ້ນນະໂຍບາຍປະເທດຈີນດຽວ ພ້ອມທັງເນັ້ນໜັກວ່າ: ຟິລິບປິນ ຈະບໍ່ແຊກແຊງ ວຽກງານທີ່ກ່ຽວຂ້ອງກັບ ໄຕ້ຫວັນ.
ຂປລ.ວິທະຍຸ-ໂທລະພາບ ສູນກາງຈີນ,ອີງຕາມຂ່າວສານ ຟີລິບປິນ ລາຍງານໃນວັນທີ 19 ພຶດສະພານີ້ວ່າ: ທ່ານ ເຟີດີນານ ໂຣມົວເດສ ມາຄອດ ປະທານາທິບໍດີຟີລິບປິນ ໄດ້ຢ້ຳຄືນໃນເວລາໃຫ້ສຳພາດຕໍ່ນັກຂ່າວວ່າ: ຟີລິບປິນ ຍຶດໝັ້ນນະໂຍບາຍປະເທດຈີນດຽວ ພ້ອມທັງເນັ້ນໜັກວ່າ: ຟິລິບປິນ ຈະບໍ່ແຊກແຊງ ວຽກງານທີ່ກ່ຽວຂ້ອງກັບ ໄຕ້ຫວັນ. ທ່ານເຟີດີນານ ໂຣມົວເດສ ມາຄອດ ກ່າວວ່າ: ຟີລິບປິນ ຈະບໍ່ແຊກແຊງ ເຂົ້າໃນວຽກງານທີ່ ສປ ຈີນ ຖືເປັນວຽກງານພາຍໃນຂອງຕົນ ແລະ ຈະສືບຕໍ່ຮຽກຮ້ອງ ໃຫ້ແກ້ໄຂ ສະຖານະການເຄັ່ງຕຶງ ໃນພາກພື້ນ ດ້ວຍສັນຕິວິທີ. ຕໍ່ກັບຖ້ອຍຄວາມທີ່ກ່ຽວຂ້ອງກັບໄຕ້ຫວັນ ຂອງຜູ້ນຳຟີລິບປິນ, ທ່ານ ກົ່ວເຈ່ຍຄຸ່ນ ໂຄສົກກະຊວງການຕ່າງປະເທດຈີນ ກ່າວໃນກອງປະຊຸມຖະແຫລງຂ່າວວ່າ: ສປ ຈີນ ໄດ້ຮັບຮູ້ກ່ຽວກັບ ຜູ້ນຳຟີລິບປິນ ຢ້ຳຄືນນະໂຍບາຍ ປະເທດຈີນດຽວ ແລະ ບໍ່ແຊກແຊງວຽກງານພາຍໃນຂອງ ສປ ຈີນ. ຫວັງວ່າ ຟີລິບປິນ ຈະປະຕິບັດຕາມຄຳໝັ້ນສັນຍາຂອງຕົນ, ຄຳເວົ້າ ແລະ ການກະທຳຕ້ອງສອດຄ່ອງກັນ ເພື່ອຍຶດໝັ້ນຫລັກໝັ້ນປະເທດຈີນດຽວ ດ້ວຍການກະທຳຕົວຈິງ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
