ຂປລ.ປັດຈຸບັນນີ້, ໄດ້ກ້າວສູ່ລະດູຝົນແລ້ວ ເຊິ່ງເປັນໄລຍະທີ່ນ້ຳສັດ ໂດຍສະເພາະແມ່ນປາໄດ້ຂຶ້ນມາວາງໄຂ່ຢູ່ໃນແມ່ນ້ຳສາຍຕ່າງໆ, ຫ້ວຍຮ່ອງ, ໜອງ, ບຶງອື່ນໆ. ດັ່ງນັ້ນ, ຢູ່ໃນໄລຍະດັ່ງກ່າວ ພວກເຮົາ ຕ້ອງເປັນເຈົ້າການໃນການປົກປັກຮັກສາ ໂດຍຫ້າມນຳໃຊ້ວັດຖຸໃນການຫາປາແບບດັບສູນເຊັ່ນວ່າ: ທາດລະເບີດ, ໄຟຟ້າຊ໊ອດ, ທາດເບື່ອອື່ນໆ. ແນວໃດກໍດີ ມື້ນີ້, ຄໍລຳ “ຊີວິດ ແລະ ກົດໝາຍ” ໜັງສືພິມປະເທດລາວ ຂໍມາສະເໜີກົດໝາຍ ວ່າດ້ວຍສັດນ້ຳ ແລະ ການປະມົງ (ສະບັບປັບປຸງ) ປີ 2023 ໃນພາກທີVII ຂໍ້ຫ້າມ ມາສະເໜີໃຫ້ພວກເຮົາໄດ້ຮັບຮູ້ໄປພ້ອມໆກັນ.   

ຢູ່ໃນພາກທີ VII ຂໍ້ຫ້າມ. ໃນນັ້ນ, ມາດຕາ 81 (ປັບປຸງ) ຂໍ້ຫ້າມທົ່ວໄປ; ຫ້າມບຸກຄົນ, ນິຕິບຸກ ຄົນ ແລະ ການຈັດຕັ້ງມີພຶດຕິກໍາໃດໜຶ່ງດັ່ງນີ້:

1. ນໍາໃຊ້ທາດເບື່ອ, ລະເບີດ, ອາວຸດ, ເຄື່ອງໄຟຟ້າ, ຄື້ນ, ເຄື່ອງແສງ, ສຽງ ເພື່ອຫາ ຫລື ຈັບສັດນໍ້າແບບດັບສູນ.

2. ນໍາໃຊ້ເຄື່ອງມືຫາສັດນໍ້າ ທີ່ມີຄວາມສ່ຽງເຮັດໃຫ້ສັດນໍ້າສູນພັນ ເຊັ່ນ: ອວນ, ລີ, ມອງຕາຖີ່, ໂຕ່ງ, ລອບຂະໜາດໃຫຍ່ ແລະ ອື່ນໆ.

3. ຫາສັດນໍ້າ ຈາກແຫລ່ງນໍ້າທໍາມະຊາດ ດ້ວຍການຕັນຫ້ວຍ, ໂສກ, ບຸ່ງ, ຄອງນໍ້າ, ຂຸດໜອງ ຫລື ດູດໜອງທໍາມະຊາດທີ່ມີນໍ້າຕະຫລອດປີ.

4. ຮັບເອົາ, ຊື້-ຂາຍ, ຄອບຄອງ ຫລື ຂົນສົ່ງ ສັດນ້ຳບັນຊີ I ໂດຍບໍ່ໄດ້ຮັບອະນຸຍາດ.

5. ສ້າງສິ່ງກີດຂວາງທາງເດີນຂອງສັດນໍ້າ ໂດຍບໍ່ໄດ້ຮັບອະນຸຍາດ.

6. ລ້ຽງ ຫລື ປ່ອຍສັດນໍ້າ ຕ່າງຖິ່ນທີ່ມີຄວາມສ່ຽງທໍາລາຍສັດນ້ຳພື້ນເມືອງ ແລະ ລະບົບນິເວດ.

7. ປູກພືດນ້ຳ ທີ່ຈະເປັນການທໍາລາຍລະບົບນິເວດ ຫລື ແຫລ່ງລ້ຽງສັດນໍ້າ ໂດຍບໍ່ໄດ້ຮັບອະນຸຍາດ.

8. ບຸກລຸກວັງສະຫງວນ ຫລື ເຂດອະນຸລັກພັນສັດນໍ້າ, ເຂດປາອໍ, ແຫລ່ງສັດນໍ້າວາງໄຂ່, ເຂດຈະເລີນເຕີບໂຕຂອງລູກສັດນໍ້າໄວອ່ອນ.

9. ຫາສັດນໍ້າໃນລະດູວາງໄຂ່.

10. ບໍລິໂພກ, ຊື້-ຂາຍ ສັດນໍ້າ ທີ່ຕາຍໂດຍບໍ່ຮູ້ສາເຫດ, ເປັນພະຍາດ ຫລື ປົນເປື້ອນສານເຄມີຕົກຄ້າງ.

 11. ມີພຶດຕິກໍາອື່ນ ທີ່ເປັນການລະເມີດກົດໝາຍ.

ມາດຕາ 82 (ໃໝ່) ຂໍ້ຫ້າມສໍາລັບຜູ້ດໍາເນີນທຸລະກິດ; ຫ້າມຜູ້ດໍາເນີນທຸລະກິດ ກ່ຽວກັບສັດນ້ຳ ແລະ ການປະມົງ ມີພຶດຕິກໍາໃດໜຶ່ງດັ່ງນີ້:

1. ດໍາເນີນທຸລະກິດ ບໍ່ຖືກຕ້ອງຕາມກົດໝາຍ ແລະ ຕາມການອະນຸຍາດ.

2. ໂອນ ຫລື ມອບໃບອະນຸຍາດດໍາເນີນທຸລະກິດໃຫ້ຜູ້ອື່ນນໍາໃຊ້.

3. ຊື້-ຂາຍ, ຫາ, ນໍາເຂົ້າ, ສົ່ງອອກ, ສົ່ງຜ່ານ ຫລື ເຄື່ອນຍ້າຍ ສັດນໍ້າ, ຊາກ, ຊິ້ນສ່ວນ ແລະ ຜະລິດຕະພັນສັດນ້ຳ, ຜະລິດຕະພັນສິນຄ້າກ່ຽວກັບການປະມົງ ໂດຍບໍ່ໄດ້ຮັບອະນຸຍາດ.

4. ປອມແປງເອກະສານ ຫລື ນໍາໃຊ້ເອກະສານປອມ.

5. ນາບຂູ່, ໃຊ້ຄວາມຮຸນແຮງ ແລະ ວາຈາທີ່ບໍ່ເໝາະສົມ ຕໍ່ພະນັກງານ-ລັດຖະກອນ ແລະ ເຈົ້າໜ້າທີ່ ທີ່ກ່ຽວຂ້ອງ.

6. ປະຕິເສດຄວາມຮັບຜິດຊອບ, ຫລົບຫລີກ, ບິດເບືອນ ຫລື ຊຸກເຊື່ອງຂອງກາງ.

7. ໃຫ້ສິນບົນແກ່ພະນັກງານ-ລັດຖະກອນ ແລະ ເຈົ້າໜ້າທີ່ ທີ່ກ່ຽວຂ້ອງ.

8. ມີພຶດຕິກໍາອື່ນ ທີ່ເປັນການລະເມີດກົດໝາຍ.

ມາດຕາ 83 (ປັບປຸງ) ຂໍ້ຫ້າມ ສໍາລັບພະນັກງານ-ລັດຖະກອນ ແລະ ເຈົ້າໜ້າທີ່ສັດນໍ້າ ແລະ ການປະມົງ   

ຫ້າມສໍາລັບພະນັກງານ-ລັດຖະກອນ ແລະ ເຈົ້າໜ້າທີ່ສັດນໍ້າ ແລະ ການປະມົງມີພຶດຕິກໍາໃດໜຶ່ງດັ່ງນີ້:

1. ສວຍໃຊ້ສິດ, ໜ້າທີ່, ຕໍາແໜ່ງ, ບັງຄັບ, ນາບຂູ່ ເພື່ອຫາຜົນປະໂຫຍດແກ່ຕົນ, ຄອບຄົວ, ຍາດພີ່ນ້ອງ ແລະ ພັກພວກຂອງຕົນ;

2. ເປີດເຜີຍຄວາມລັບຂອງລັດ ຫລື ທາງລັດຖະການ.

3. ທວງເອົາ, ຂໍເອົາ, ຮັບເອົາສິນບົນ.

4. ປະຕິບັດໜ້າທີ່ດ້ວຍຄວາມປະໝາດ, ເມີນເສີຍ, ຂາດຄວາມຮັບຜິດຊອບ.

5. ກົດໜ່ວງ, ຖ່ວງດຶງ, ປອມແປງເອກະສານ, ອອກເອກະສານ ຫລື ທໍາລາຍເອກະສານ ໂດຍບໍ່ຖືກຕ້ອງ.

6. ຮຽກເອົາຄ່າທໍານຽມ, ຄ່າບໍລິການ ເເລະ ນໍາໃຊ້ລາຍຮັບວິຊາການ ໂດຍບໍ່ຖືກຕ້ອງ.

KPL