ຂປລ. ໂດຍການເປັນປະທານຂອງທ່ານ ສັນຕິພາບ ພົມວິຫານ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ປະທານຄະນະຊີ້ນໍາລະດັບຊາດ ສໍາລັບການສຳຫລວດພົນລະເມືອງ ແລະ ທີ່ຢູ່ອາໄສ ຄັ້ງທີ V ປີ 2025, ມີບັນດາຮອງລັດຖະມົນຕີ, ຄະນະຊີ້ນໍາລະດັບຊາດສໍາລັບການສໍາຫລວດພົນລະເມືອງ ແລະ ທີ່ຢູ່ອາໄສທົ່ວປະເທດ ຄັ້ງທີ V ປີ 2025, ບັນດາປະທານປົກຄອງແຂວງ, ປະທານປົກຄອງນະຄອນຫລວງວຽງຈັນ, ປະທານຄະນະຊີ້ນຳການສຳຫລວດພົນລະເມືອງ ແລະ ທີ່ຢ່ອາໄສຂັ້ນແຂວງ, ນະຄອນຫລວງ ໃນໂອກາດດ່ັງກ່າວ, ທ່ານ ສັນຕິພາບ ພົມວິຫານ ໄດ້ກ່າວວ່າ:  ຜ່ານການຈັດຕັ້ງປະຕິບັດໃນງວດ I ປີ 2026 ຜ່ານມານ້ີ, ພວກເຮົາສາມາດບັນລຸຜົນສໍາເລັດຈຳນວນໜຶ່ງເປັນຕົ້ນອັດຕາເຕີບໂຕຂອງເສດຖະກິດຄາດວ່າຂະຫຍາຍຕົວ ຢູ່ໃນລະດັບ 5,5%, ອັດຕາເງິນເຟ້ີຢູ່ໃນລະດັບຕົວເລກດຽວ 7,0%.

     ນອກນັ້ນ, ການເກັບລາຍຮັບງົບ ປະມານກໍບັນລຸໄດ້ທັງໝົດ 28% ຂອງແຜນການປີ ( ຫລື 112% ຂອງແຜນໄຕມາດ1), ສຳລັບລາຍຈ່າຍປະຕິບັດ 11% ຂອງແຜນປີ ( 41% ຂອງແຜນໄຕມາດ1). ນອກນັ້ນ, ກໍຍັງມີຫລາຍຄາດໝາຍທ່ີຄາດວ່າສາມາດບັນລຸຕາມແຜນທ່ີວາງໄວ້. ເຖິງຢ່າງໃດກໍຕາມ, ປັດຈຸບັນພວກເຮົາກໍຍັງຜະເຊີນໜ້າກັບຄວາມບໍ່ສະຖຽນລະພາບທາງດ້ານເສດຖະກິດ-ສັງຄົມຂອງໂລກ ແລະ ພາກພື້ນມີການຜັນແປຢ່າງຄາດຄະເນໄດ້ຍາກ ໂດຍສະເພາະສະພາບຄວາມບໍ່ສະຫງົບຢູ່ຕາເວັນອອກກາງ ຊຶ່ງໄດ້ສ້າງຜົນກະທົບຕໍ່ແຫລ່ງການຜະລິດສິນຄ້າ ແລະ ການຂົນສົ່ງນໍ້າມັນເຊື້ອໄຟເຮັດໃຫ້ມີການປັບລາຄານໍ້າມັນຂຶ້ນ, ຄ່າຂົນສົ່ງໂດຍສານ, ໄຟຟ້າເພີ່ມຂຶ້ນຢ່ປະເທດເຮົາ. ສະເພາະເງິນເຟີ້ປະຈໍາເດືອນເມສາ 2026 ນີ້ ກໍຍັງສືບຕ່ໍເພ່ີມຂຶ້ນເຖິງ 10,2%  ຊຶ່ງຮຽກຮ້ອງໃຫ້ພວກເຮົາທຸກພາກສ່ວນສືບຕ່ໍເປັນເຈົ້າການປະຕິບັດມາດຕະການ ໃນການຊຸກຍູ້ການຜະລິດ ແລະ ຄຸ້ມຄອງເສດຖະກິດມະຫາພາກ. ການສຳຫລວດພົນລະເມືອງ ແລະ ທີ່ຢູ່ອາໄສທົ່ວປະເທດ ຄັ້ງທີ V ປີ 2025 ເປັນວຽກງານໜຶ່ງທີ່ສໍາຄັນທີ່ສຸດຊຶ່ງຈະສະໜອງຂໍ້ມູນອັນສໍາຄັນໃຫ້ແກ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ກໍຄືແຜນງົບປະມານແຫ່ງລັດໃນໄລຍະແຕ່ນ້ີ ຮອດປີ 2030.

    ນອກຈາກນິ້, ຜົນຂອງການສໍາຫລວດຄ້ັງນ້ີ, ກໍຈະໄດ້ນໍາໃຊ້ເຂ້ົາໃນການຄາດຄະເນຈໍານວນພົນລະເມືອງຂອງປະເທດເຮົາໃນ 30- 40 ປີຕໍ່ໜ້າຈົນຮອດປີ 2055- 2065. ໃນ 10 ປີຕໍ່ໜ້າ ໃນປິ 2033-2035 ຈະໄດ້ມີການກະກຽມສໍາຫລວດ ຄັ້ງທີ VI ຕື່ມອີກ ເພ່ືອຮັບໃຊ້ໃນການສ້າງ ແລະ  ຕີລາຄາການຈັດຕ້ັງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ5 ປີ ຄັ້ງທີ XI ແລະ ຄັ້ງທີ XII. 

     ທ່ານ ສັນຕິພາບ ພົມວິຫານ ຍັງໃຫ້ຮູ້ອີກວ່າ: ລາຍງານຜົນເບື້ອງຕົ້ນຂອງການສຳຫລວດກວມເອົາບາງຕົວເລກຕົ້ນຕໍເທົ່ານັ້ນຄື: ຈໍານວນພົນລະເມືອງລາວທັງໝົດໃນ ປີ 2025. ໃນນັ້ນ, ແຍກໃຫ້ເຫັນຈໍານວນເພດຍິງ-ຊາຍ,ຈໍານວນພົນລະເມືອງແບ່ງຕາມແຂວງ, ແບ່ງຕາມໝວດອາຍຸ, ອັດຕາການຂະຫຍາຍຕົວຂອງພົນລະເມືອງໃນລະດັບຊາດ ແລະ ລະດັບແຂວງ, ຕົວເລກກ່ຽວກັບຈຳນວນທ່ີຢູ່ອາໄສ, ຈຳນວນຄົວເຮືອນ ແລະ ຂະໜາດສະເລ່ຍຂອງຄົວເຮືອນ. ສ່ວນຜົນການສໍາຫລວດກ່ຽວກັບສະພາບ ການຈະເລີນພັນ, ການເສຍຊີວິດ, ການຍົກຍ້າຍຂອງພົນລະເມືອງ, ການສຶກສາ-ການຮູ້ໜັງສື, ພົນລະເມືອງພິການ, ກຳລັງແຮງງານ ແລະ ການມີວຽກເຮັດງານທຳ, ລາຍລະອຽດກ່ຽວກັບຄຸນລັກສະນະທີ່ຢູ່ອາໄສແມ່ນທາງຫ້ອງການສຳຫລວດຂັ້ນສູນກາງ ແລະ ຄະນະຊ່ຽວຊານຍັງຈະສືບຕໍ່ເຮັດໃຫ້ສຳເລັດ.

KPL