ຂປລ.  ເປັນກຽດເຂົ້າຮ່ວມຂອງ ສະຫາຍ ພົນເອກ ວິໄລ ຫລ້າຄຳຟອງ ກຳມະການກົມການເມືອງສູນກາງພັກ, ຜູ້ປະຈໍາການຄະນະເລຂາທິການສູນກາງພັກ, ຮອງນາຍົກລັດຖະມົນຕີ, ມີຄະນະປະຈຳພັກ, ກຳມະການຄະນະບໍລິຫານງານພັກກະຊວງ ແລະ ພະນັກງານກ່ຽວຂ້ອງເຂົ້າຮ່ວມ.

     ໃນພິທີ ສະຫາຍ ວຽນທອງ ສິງຄຳພັນ ຄະນະພັກ, ຫົວໜ້າກົມຈັດຕັ້ງຄະນະຈັດຕັ້ງສູນກາງພັກໄດ້ຜ່ານຄຳສັ່ງ ແລະ ມະຕິຕົກລົງຂອງກົມການເມືອງສູນກາງພັກ ວ່າດ້ວຍການຍົກຍ້າຍສະຫາຍ ໄພວີ ສີບົວລິພາ ກຳມະການສູນກາງພັກເລຂາຄະນະບໍລິຫານງານພັກ, ລັດຖະມົນຕີກະຊວງຍຸຕິທຳ ໄປຮັບໜ້າທີ່ໃໝ່ຢູ່ສານປະຊາຊົນສູງສຸດ ແລະ ແຕ່ງຕັ້ງ ສະຫາຍ ຄໍາພັນ ພົມມະທັດ ກຳມະການກົມການເມືອງສູນກາງພັກ ເປັນເລຂາຄະນະບໍລິຫານງານພັກ, ລັດຖະມົນຕີກະຊວງຍຸຕິທຳ (ຜູ້ໃໝ່). ຈາກນັ້ນກໍໄດ້ເຊັນມອບ-ຮັບໜ້າທີ່ລະຫວ່າງລັດຖະມົນຕີກະຊວງຍຸຕິທຳຜູ້ເກ່ົາ ແລະ ຜູ້ໃໝ່ຢ່າງເປັນທາງການ, ໃຫ້ກຽດມອບໃບຍົກຍ້າຍ ແລະ ໃບແຕ່ງຕັ້ງໂດຍສະ ຫາຍ ພົນເອກ ວິໄລ ຫລ້າຄຳຟອງ.

      ໂອກາດນີ້, ສະຫາຍ ພົນເອກ ວິໄລ ຫລ້າຄຳຟອງ ໄດ້ໃຫ້ຄະນະພັກ-ຄະນະນໍາ ກໍຄື ພະນັກງານຫລັກແຫລ່ງກະຊວງຍຸຕິທຳ ເອົາໃຈໃສ່ຮັກສາຄວາມສາມັກຄີພາຍໃນ, ປະຕິບັດຖືກຕ້ອງຄົບຖ້ວນຕາມຫລັກການນຳພາຂອງພັກ ມີຄວາມເປັນເອກະພາບໃນການຄົ້ນຄວ້າຕັດສິນບັນຫາ, ແບບແຜນວິທີເຮັດວຽກຕ້ອງແທດຕົວຈິງ, ໂປ່ງໃສ; ມີການແບ່ງງານ, ມອບໝາຍຄວາມຮັບຜິດຊອບຢ່າງຈະແຈ້ງ; ເປັນແບບຢ່າງໃນການນຳພາ, ມີທັດສະນະ ແລະ ແບບແຜນດຳລົງຊີວິດທີ່ປອດໃສ, ປະຕິບັດໜ້າທີ່ດ້ວຍຄວາມບໍລິສຸດສັດຊື່, ມີຈັນຍາບັນ, ມີຄວາມສະດຸ້ງໄວຕໍ່ສະພາບການໃນເງື່ອນໄຂໃໝ່, ຍາມໃດກໍຕ້ອງມີສະຕິກຽມພ້ອມປະຕິບັດໜ້າທີ່ ທີ່ໄດ້ຮັບມອບໝາຍ ແລະ ຕ້ອງເຂັ້ມງວດຕໍ່ຕົນເອງ, ຕໍ່ໜ້າທີ່ການເມືອງທີ່ໄດ້ຮັບມອບໝາຍ.  

      ສະຫາຍ ໄພວີ ສີບົວລິພາ ໄດ້ຜ່ານບົດສະຫລຸບການນຳພາ-ຊີ້ນຳວຽກງານຮອບດ້ານໄລຍະຜ່ານມາວ່າ: ຜົນການຈັດຕັ້ງປະຕິບັດວຽກງານໄລຍະ 5 ປີຜ່ານມາ ໄດ້ຖືສຳຄັນວຽກງານສຶກສາອົບຮົມນຳພາການເມືອງ-ແນວຄິດໃຫ້ສະມາຊິກພັກ, ພະນັກງານ-ລັດຖະກອນດ້ວຍການຈັດຕັ້ງເຊື່ອມຊຶມບັນດາມະຕິ, ຄຳສັ່ງ ແລະ ເອກະສານສຳຄັນຕ່າງໆຂອງພັກ-ລັດ, ຜ່ານຜ່າຄວາມຫຍຸ້ງຍາກດ້ານຕ່າງໆ ໃຫ້ມີຄວາມສະຫງົບ ພ້ອມກັນເຮັດສຳເລັດໜ້າທ່ີການເມືອງຂອງຕົນ ແລະ ສ້າງຄວາມເຊື່ອໝັ້ນຂອງສັງຄົມຕໍ່ວຽກງານຍຸຕິທຳນັບມື້ນັບຫລາຍຂຶ້ນ; ໄດ້ເອົາໃຈໃສ່ນຳພາ-ຊີ້ນຳການສ້າງ ແລະ ປັບປຸງກົດໝາຍທີ່ຢູ່ໃນຄວາມຮັບຜິດຊອບຂອງກະຊວງຍຸຕິທໍາລວມມີ 5 ກົດໝາຍ, ໄດ້ຖືກຮັບຮອງ ແລະ ປະກາດໃຊ້ແລ້ວທັງ 5 ສະບັບ; ເອົາໃຈໃສ່ປະຕິບັດໜ້າທີ່ເປັນໃຈກາງປະສານສົມທົບກັບບັນດາກະຊວງ, ອົງການທີ່ຮັບຜິດຊອບໃນການສ້າງ ແລະ ປັບປຸງກົດໝາຍພ້ອມທັງຄົ້ນຄວ້າ, ຮຽບຮຽງ, ກວດກາຄວາມສອດຄ່ອງທາງດ້ານກົດໝາຍຂອງຮ່າງກົດໝາຍທັງໝົດ 87 ສະບັບ, ກົດໝາຍສ້າງໃໝ່ 24 ສະບັບ ແລະ ປັບປຸງ 63 ສະບັບ. ໃນນີ້, ມີກົດໝາຍທີ່ນອນໃນແຜນການສ້າງ ແລະ ປັບປຸງກົດໝາຍ 5 ປີ (2021-2025) ມີ 76 ສະບັບ, ກົດໝາຍສ້າງໃໝ່ 23 ສະບັບ ແລະ ປັບປຸງ 53 ສະບັບ. ນອກຈາກນີ້, ຍັງໄດ້ເຂົ້າຮ່ວມປັບປຸງລັດຖະທຳມະນູນ ສະບັບປີ 2025, ໄດ້ກວດ ກາຄວາມສອດຄ່ອງທາງດ້ານ ກົດໝາຍຂອງຮ່າງລັດຖະບັນຍັດໄດ້ 8 ສະບັບ, ຮ່າງດຳລັດໄດ້ 104 ສະບັບ, ໃນນີ້ມີດຳລັດທີ່ຢູ່ໃນຄວາມຮັບຜິດຊອບຂອງກະຊວງຍຸຕິທໍາຈໍານວນ 7 ສະບັບ; ຄົ້ນຄວ້າ ແລະ ປະກອບຄຳເຫັນຕ່ໍສັນຍາການລົງທຶນ, ສັນຍາສຳປະທານ ແລະ ສັນຍາກູ້ຢືມທີ່ລັດຖະບານເປັນຄູ່ສັນຍາໃຫ້ມີຄວາມສອດຄ່ອງກັບນະໂຍບາຍ ແລະ ກົດໝາຍໄດ້ທັງໝົດ 56 ສະບັບ; ເອົາໃຈໃສ່ຊີ້ນຳພະແນກຍຸຕິທຳຂັ້ນແຂວງ, ຫ້ອງການຍຸຕິທໍາເມືອງ ເຮັດໜ້າທີ່ເປັນເສນາທິການໃຫ້ອົງການປົກຄອງທ້ອງຖິ່ນ ໃນການກວດກາຮ່າງນິຕິກຳຕ່າງໆກ່ອນຈະສະເໜີອົງການ ຊຶ່ງເປັນການປະກອບສ່ວນສຳຄັນເຂົ້າໃນການຄຸ້ມຄອງລັດດ້ວຍກົດໝາຍເທື່ອລະກ້າວ.

KPL