ຂປລ
ໃນໄລຍະປະຕິບັດ ແຜນພັດທະນາ ເສດຖະກິດ-ສັງຄົມແຫ່ງຊາດ 5 ປີຄັ້ງທີ 15, ສປ ຈີນ ຈະຖືການພັດທະນາ ກະສິກຳຂະໜາດໃຫຍ່ ແບບທັນສະໄໝ ເປັນຈຸດສຸມຕົ້ນຕໍ, ຊຸກຍູ້ການປະຕິຮູບ ດ້ານການບຸກເບີກດິນເຮື້ອ ຂອງລັດ ຢ່າງຕໍ່ເນື່ອງ
ຂປລ.ວິທະຍຸ-ໂທລະພາບ ສູນກາງຈີນ, ກະຊວງກະສິກຳ ແລະ ຊົນນະບົດຈີນ ໄດ້ແຈ້ງໃຫ້ຮູ້ ເມື່ອບໍ່ດົນມານີ້ວ່າ: ໃນໄລຍະປະຕິບັດ ແຜນພັດທະນາ ເສດຖະກິດ-ສັງຄົມແຫ່ງຊາດ 5 ປີຄັ້ງທີ 15, ສປ ຈີນ ຈະຖືການພັດທະນາ ກະສິກຳຂະໜາດໃຫຍ່ ແບບທັນສະໄໝ ເປັນຈຸດສຸມຕົ້ນຕໍ, ຊຸກຍູ້ການປະຕິຮູບ ດ້ານການບຸກເບີກດິນເຮື້ອ ຂອງລັດ ຢ່າງຕໍ່ເນື່ອງ,ເລັ່ງລັດການຫັນປ່ຽນຮູບແບບ ແລະ ຍົກລະດັບອຸດສາຫະກຳ ການຜະລິດ, ເສີມຂະຫຍາຍບົດບາດ ທີ່ສຳຄັນ ຂອງການບຸກເບີກ ດິນເຮື້ອ ໃນຂະບວນການ ສ້າງກະສິກຳ ໃຫ້ເປັນແບບ ທັນສະໄໝ ຢ່າງແທ້ຈິງ. ກະຊວງກະສິກຳ ແລະ ຊົນນະບົດຈີນ ໄດ້ຈັດກອງປະຊຸມ ກ່ຽວກັບ ການພັດທະນາ ແລະ ການປະຕິຮູບ ດ້ານການບຸກເບີກດິນເຮື້ອຂອງລັດ ໂດຍໄດ້ສະຫລຸບຜົນງານ ດ້ານການພັດທະນາ ແລະ ການປະຕິຮູບ, ຈັດວາງໜ້າທີ່ທີ່ສຳຄັນ ໃນໄລຍະປະຕິບັດ ແຜນພັດທະນາ ເສດຖະກິດ-ສັງຄົມແຫ່ງຊາດ 5 ປີຄັ້ງທີ 15 ຂອງ ສປ ຈີນ. ກອງປະຊຸມຄັ້ງນີ້ ໄດ້ຢືນຢັນວ່າ: ໄລຍະປະຕິບັດ ແຜນພັດທະນາ ດັ່ງກ່າວຂອງ ສປ ຈີນ ແມ່ນຢູ່ໄລຍະທີ່ສຳຄັນ ຂອງການບຸກເບີກດິນເຮື້ອ ຂອງລັດໃນການປັບປຸງ ແລະ ເປີດກວ້າງໝາກຜົນ ດ້ານການປະຕິຮູບ, ເລັ່ງລັດການພັດທະນາ ກະສິກຳຂະໜາດໃຫຍ່ ແບບທັນສະໄໝ ແລະ ພັດທະນາກະສິກຳ ໃຫ້ກາຍເປັນອຸດສາຫະກຳ ຂະໜາດໃຫຍ່ ແບບທັນສະໄໝ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
