ຂປລ. ພະທາດອີງຮັງ ແມ່ນຕັ້ງຢູ່ບ້ານທາດອີງຮັງ ແຂວງສະຫວັນນະເຂດ ເປັນມໍລະດົກຂອງຊາດ, ເປັນພະທາດທີ່ສັກສິດ ແລະ ເປັນທີ່ສັກກະລະບູຊາ ຂອງຊາວແຂວງສະຫວັນນະເຂດ. ພະທາດອົງນີ້ ສ້າງຂຶ້ນປະມານປີ ພສ 500 ຊຶ່ງນໍາພາໂດຍ ພະເຈົ້າສຸມິດຕະທໍາ ຜູ້ປົກຄອງເມືອງມະຣຸກຂະນະຄອນ (ອານາຈັກສີໂຄດຕະບູນ) ເພື່ອເປັນອະນຸສອນວ່າ ຄັ້ງໜຶ່ງພະພຸດທະເຈົ້າ ໄດ້ສະເດັດມາໂຜດສັດໃນດິນແດນສຸວັນນະພູມ ແລະ ໄດ້ນັ່ງສັນເຂົ້າອີງຕົ້ນຮັງ ຈຶ່ງໄດ້ເອີ້ນຊື່ວ່າ: ພະທາດອີງຮັງ, ພະທາດອົງນີ້ ໃນເບື້ອງຕົ້ນ ເປັນພະທາດນ້ອຍມີ 4 ລ່ຽມ, ໃນປີ ຄສ 1548, ພະເຈົ້າໄຊຍະເສດ ຖາຖິລາດ ແຫລ່ງອານາຈັກລ້ານຊ້າງ ໄດ້ນໍາພາປະຕິສັງຂອນໃຫ້ເປັນແບບສິລະປະລ້ານຊ້າງ ພະທາດອົງນີ້ ກວ້າງ 9 ແມັດ ແລະ ສູງ 25 ແມັດ ຊຶ່ງຍອດພະທາດ ມີລັກສະນະຄືກັບດອກບົວ, ມີ 3 ຖານຫລຸດກັນເປັນລຳດັບຖານລຸ່ມ, ຖານກາງ ເປັນສິລະປະດັ້ງເດີມ, ຖານເທິງ ແລະ ຍອດພະທາດເປັນສິລະປະສະໄໝລ້ານຊ້າງ.ທຸກໆປີ ຈະມີງານສະເຫລີມສະຫລອງ ເພື່ອສັກກະລະບູຊາ ເຖິງພະພຸດທະເຈົ້າ ແລະ ຜູ້ທີ່ສ້າງພະທາດ.

ທາດອິງຮັງ ຫລື ຄົນທົ່ວໄປມັກຮ້ອງວ່າ ອິນຮັງ ເປັນປູຊະນິຍະສະຖານເກົ່າແກ່ທີ່ສັກສິດ ແລະ ສຳຄັນ ເປັນທີ່ເຊີດໜ້າຊູຕາທາງວັດທະນະທຳຂອງແຂວງສະຫວັນນະເຂດ ພະທາດນີ້ຖືກສະຫລັກດ້ວຍລວດລາຍສິລະປະກຳສະໄໝບູຮານ ແລະ ຮັກສາໄວ້, ພະທາດດັ່ງຖືກປະຕິສັງຂອນມາແລ້ວຫລາຍຄັ້ງ.ພະທາດນີ້ຖືກສ້າງສະໄໝອານາຈັກສີໂຄດຕະບອງ (ປະມານສະຕະວັດທີ 6) ໂດຍພະເຈົ້າສຸມິນທະຣາຊ ຣາຊາແຫ່ງອານາຈັກສີໂຄດຕະບອງ ຊຶ່ງຖືກວາງຮາກຖານຈາກການແນະນຳຂອງພະເຖຣະ (ຄູບາອາຈານ) ຊາວອິນເດຍ ເພື່ອເປັນເຄື່ອງໝາຍເຖິງການສະເດັຈປະລິນິພານຂອງພະພຸດທະເຈົ້າທີ່ປ່າໄມ້ຮັງ ເມືອງກຸລິນາຣາຍ ປະເທດອິນເດຍ ເມື່ອສ້າງສຳເລັດ ເພິ່ນໄດ້ນຳເອົາກະດູກພະພຸດທະເຈົ້າມາໃສ່ໄວ້, ແຕ່ໜັງສືອຸລັງຄະທາດກ່າວວ່າ ສ້າງຂຶ້ນເພື່ອເປັນເຄື່ອງໝາຍສະຖານທີ່ບ່ອນນັ່ງຂອງພະພຸດທະເຈົ້າຄາວເພິ່ນມາຢ້ຽມຢາມພະຍາສີໂຄດຕະບອງ ແຕ່ຄວາມຈິງຄົງຈະມີຈຸດປະສົງເພື່ອໃຫ້ປະຊາຊົນເຫັນຄວາມສຳຄັນຂອງພະທາດອົງນີ້.ໃນລະຫວ່າງຂະເໝນມີອຳນາດພຣະທາດໜ່ວຍນີ້ ຖືກດັດແປງໃຫ້ເປັນເທວະສະຖານຂອງຊາວຮີນດູ ແລະ ໄດ້ເສີມສ້າງຕໍ່ຂຶ້ນໄປຕື່ມ ຊຶ່ງລິງລາຍຕົບແຕ່ງອອກມາໃນລັກສະນະຂອງຮີນດູ ໂດຍສະເພາະເລື່ອງເມຖຸນສັງວາດ ແລະ ອື່ນໆ ຈາກນັ້ນພະທາດອິງຮັງ ກໍຕົກຢູ່ໃຕ້ອິດທິພົນຂອງຜູ້ສືບຣາຊະການສະໄໝຕ່າງໆ.

ຄຽງຄູ່ກັນນັ້ນ, ສຳລັບຂໍ້ຫ້າມໃນການເຂົ້າກາບໄຫ້ວພະທາດແມ່ນຫ້າມແມ່ຍິງເຂົ້າໄປຊັ້ນໃນອົງພະທາດ ໄດ້ແຕ່ຂາບໄຫວ້ດ້ານນອກເທົ່ານັ້ນ ແລະ ກ່ອນເຂົ້າບໍລິເວນວັດຈະຕ້ອງນຸ່ງສິ້ນເທົ່ານັ້ນ.ແມ່ຍິງທີ່ນຸ່ງສົ້ງແອວຕ່ຳແອວສູງແມ່ນບໍ່ສາມາດເຂົ້າໄປກາບໄຫວ້ ແຕ່ສຳລັບແມ່ຍິງທີ່ຈະເຂົ້າໄປກາບໄຫວ້ແມ່ນຕ້ອງໄດ້ນຸ່ງສິ້ນ ແລະ ທາງຜູ້ດູແລພະທາດກໍຈະມີ ບໍລິການເຊົ່າສິ້ນພ້ອມ. ສ່ວນຜູ້ທີ່ຈະໄປຂາບໄຫວ້ພະທາດຫາກຕ້ອງການຊື້ເຄື່ອງບູຊາກໍມີຊາວບ້ານມາວາງຂາຍຢູ່ແຄມທາງກ່ອນເຖິງພະທາດ ສ່ວນຢູ່ບໍລິເວນວັດຈະມີແຕ່ທູບທຽນເທົ່ານັ້ນ. ໃກ້ໆອົງພະທາດຈະມີສາລາຫລັງນ້ອຍໆ ມີພະ ແລະ ແມ່ຊີໝູນວຽນກັນມາປະຈຳ ເພື່ອໃຫ້ຜູ້ມີສັດທາເຂົ້າໄປຂໍພອນ ຫລື ຜູກແຂນ ຈະບໍລິຈາກ ຫລື ບໍ່ກໍຕາມ.ດ້ານໜ້າຂອງອົງພະທາດຈະມີຜູ້ເຖົ້າມາຄອຍທຳພິທີພິເສດໃຫ້ທ່ານທີ່ຕ້ອງການ. ເຖິງແນວໃດກໍຕາມ, ເພິ່ນຈະຈັດບຸນສະເຫລີມສະຫລອງພະທາດໃນມື້ຂຶ້ນ15 ຄໍ່າ ເດືອນຈຽງ ( ເດືອນ 1 ລາວ ) ຂອງທຸກໆປີ ( ແຕ່ກ່ອນຈັດງານເດືອນ 12 ເພັງພ້ອມທາດຫລວງ ແຕ່ເນື່ອງຈາກວ່າ ເຈົ້າໄຊເຊດຖາທິລາດພະອົງມີພະຣາຊະກິດທີ່ພະທາດຫລວງ ເພິ່ນຈຶ່ງເລື່ອນມາຈັດງານໃນເດືອນຈຽງເພັງ).
ພາບປະກອບ

KPL