ໂຄງການໄຟຟ້າພະລັງງາມລົມ ເຈື່ອງເຊີນ ມີທີ່ຕັ້ງກວມເອົາເມືອງຄຳເກີດ ແລະ ເມືອງໄຊຈຳພອນ ແຂວງບໍລິຄຳໄຊ ເຊິ່ງເປັນໂຄງການໜຶ່ງທີ່ໃຫຍ່ ແລະ ໃຫ້ການຊ່ວຍເຫລືອໃຫ້ແກ່ປະຊາຊົນໃນເຂດພື້ນທີ່ຂອງໂຄງການຫລາຍໆດ້ານ ເຊັ່ນວ່າ: ຖະໜົນຫົນທາງ, ສຶກສາ, ສາທາລະນະສຸກ, ກະສິກຳ ແລະ ປູກຕົ້ນໄມ້ໃຫ້ເປັນປ່າ. ໃນນັ້ນ, ສຳລັບດ້ານການປັບປຸງຊີວິດການເປັນຢູ່ ແມ່ນຈະສຸມໃສ່ພັດທະນາຊີວິດການເປັນຢູ່ຂອງປະຊາຊົນທ້ອງຖິ່ນ ໂດຍສະເພາະແມ່ນຍົກສູງສະມັດຕະພາບການຜະລິດ ແລະ ຄຸນນະພາບ ເພີ່ມລາຍຮັບເພື່ອປັບປຸງຊີວິດການເປັນຢູ່ຂອງປະຊາຊົນໃນເຂດໂຄງການໃຫ້ນັບມື້ດີຂຶ້ນ ແລະ ກ້າວໄປສູ່ການຫລຸດພົ້ນອອກຈາກຄວາມທຸກຍາກເທື່ອລະກ້າວ.

ຢູ່ໃນບົດ​ລາຍ​ງານ​ລວມ​ ກ່ຽວ​ກັບ​ການ​ຈັດ​ຕັ້ງ​ປະ​ຕິ​ບັດ​ ຮູບ​ແບບ​ການ​ສ້າງ​ຊີ​ວິດ​ການ​ເປັນ​ຢູ່​ຂອງ​ປະ​ຊາ​ຊົນ​ຢູ່​ໃນ​ເຂດ​ໂຄງ​ການ​ພະ​ລັງ​ງານ​ລົມ​ເຈື່ອງເຊີນ (ໜ່ວຍງານຈັດຕັ້ງປະຕິບັດ ບໍລິສັດ ພູຊວນ ກໍ່ສ້າງ ແລະ ການຄ້າ ຈຳກັດ) ໃຫ້ຮູ້ວ່າ: ໃນ​ແຕ່ລະ​ປີ​ເນື້ອ​ທີ່​ປູກ​ເຂົ້າ​ສ່ວນ​ຫລາຍ​ແມ່ນຍັງ​ຂາດ​ນ້ຳ​ ແລະ ຜະລິດເຂົ້າໄດ້ພຽງລະດູດຽວ (ລະດູຝົນ) ບວກໃສ່ວິທີການປູກເຂົ້າຂອງປະຊາຊົນ ແມ່ນຂຶ້ນກັບທຳມະຊາດເກືອບທັງໝົດ ຈຶ່ງເຮັດໃຫ້ຜົນຜະລິດເຂົ້າໄດ້ຕໍ່າ ແລະ ບໍ່ໝັ້ນຄົງ. ການໃສ່ປຸ໋ຍແມ່ນໜ້ອຍ ຍ້ອນການລ້ຽງສັດເຄິ່ງປ່າ ເຮັດໃຫ້ການຊົມໃຊ້ແຫລ່ງຝຸ່ນຊີວະພາບຂອງທ້ອງຖິ່ນມີຄວາມຫຍຸ້ງຍາກ. ນອກຈາກນັ້ນ, ຄົວເຮືອນສ່ວນໃຫຍ່ຍັງບໍ່ມີແຫລ່ງທຶນ ເພື່ອລົງທຶນໃສ່ຝຸ່ນເຄມີ ແລະ ຢາປາບສັດຕູພືດຢ່າງພຽງພໍ ແລະ ວິທີການປູກຝັງຍັງຈຳກັດ, ການຂາດທຶນລົງທຶນ ເຮັດໃຫ້ມີຄວາມສ່ຽງສູງໃນການຮັບປະກັນຄວາມໝັ້ນຄົງດ້ານສະບຽງອາຫານໃຫ້ແກ່ປະຊາຊົນທ້ອງຖິ່ນ. ຂະນະທີ່ການປູກມັນຕົ້ນ, ບັນດາບ້ານໄດ້ນຳໃຊ້ວິທີການປູກຝັງທີ່ແຕກຕ່າງກັນ ສ່ວນຫລາຍແມ່ນດິນເປັນເປີ້ນພູ, ການຄັດເລືອກແນວພັນແມ່ນບໍ່ໄດ້ເຮັດຢ່າງລະມັດລະວັງ, ຫລາຍພື້ນທີ່ຕິດເຊື້ອພະຍາດ ເຮັດໃຫ້ຜົນຜະລິດໄດ້ໜ້ອຍ. ວິທີການປູກມັນຕົ້ນ ແມ່ນຂຶ້ນກັບທໍາມະຊາດທັງໝົດ ແລະ ການຂາດຄວາມຮູ້ໃນການປູກມັນຕົ້ນ ເຮັດໃຫ້ຜົນຜະລິດຂອງມັນຕົ້ນຢູ່ໃນທ້ອງຖິ່ນຕໍ່າ.

ການສະໜັບສະໜູນຈາກບໍລິສັດພູຊວນ ສໍາລັບຊຸມຊົນທ້ອງຖິ່ນ ກໍໄດ້ມີການກະກຽມຫລາຍໜ້າວຽກ. ໃນນັ້ນ, ວຽກກະກຽມ ໄດ້​ຈັດ​ຕັ້ງ​ຊຸດ​ອົບຮົມ ​ແລະ ​ເຮັດ​ວຽກ 5 ​ແຫ່ງ ​ເພື່ອ​ຍົກ​ສູງ​ຄວາມ​ສາມາດ​ຂອງ​ພະນັກງານ ​ແລະ ປະຊາ ຊົນ​ທ້ອງ​ຖິ່ນ ​ໂດຍ​ມີ​ຜູ້​ເຂົ້າ​ຮ່ວມ 173 ຄົນ ​ໂດຍ​ສະ​ເພາະດຳເນີນການສຳຫລວດດິນ, ລະບົບຊົນລະປະທານ ແລະ ຄວາມຕ້ອງການພັດທະນາເສດຖະກິດທ້ອງຖິ່ນ. ໃນຕົ້ນປີ 2025 ໄດ້ລົງສຳຫລວດ ການສ້າງຕົວແບບພັດທະນາເສດຖະກິດທ້ອງຖິ່ນຢູ່ເມືອງໄຊຈຳພອນ ແລະ ເມືອງຄຳເກີດ. ວຽກງານການຈັດຕັ້ງປະຕິບັດທີ່ໄດ້ຮັບຄວາມເຫັນດີກັບອຳນາດການປົກຄອງທ້ອງຖິ່ນ ແລະ ປະຊາຊົນ ແມ່ນສະພາບການປູກຝັງ, ການປູກຝັງຂອງປະຊາຊົນແມ່ນໄດ້ແຕ່ລະດູດຽວ/ປີ, ໄລຍະທີ່ລູກຫລານບໍ່ມີອາຊີບໝັ້ນຄົງ ແມ່ນຍາວນານ, ເສດຖະກິດກໍຫຍຸ້ງຍາກນັ້ນ, ບໍລິສັດ ຈຶ່ງຕ້ອງການແບ່ງການລົງທຶນອອກເປັນຂັ້ນຕອນ ເພື່ອຊ່ວຍເຫລືອປະຊາຊົນ. ໃນນັ້ນ, ໄລຍະທີ 1 ກວດກາ ແລະ ປະເມີນຜົນຢ່າງລະອຽດ ກ່ຽວກັບສະພາບດິນ, ນ້ຳ, ສະພາບອາກາດ, ອຸທົກກະສາດ ແລະ ການປູກຝັງຂອງປະຊາຊົນ. ທົດສອບບາງຕົວແບບທົດລອງສໍາລັບການປຽບທຽບ ແລະ ໝັ້ນສັນຍາ ເພື່ອຮັບປະກັນຜົນຜະລິດຕ່ຳສຸດ ທີ່ເທົ່າກັບຜົນຜະລິດທີ່ປະຊາຊົນກໍາລັງປະຕິບັດ. ຖ້າຜົນຜະລິດບໍ່ດີເທົ່າທີ່ປະຊາຊົນປູກຝັງ, ບໍລິສັດຈະສະໜັບສະໜູນຄ່າໃຊ້ຈ່າຍ ເພື່ອຊົດເຊີຍ. ສຳລັບການປູກເຂົ້າສີນ້ຳຕານ ແນວພັນເຂົ້າທີ່ໄດ້ຄົ້ນຄວ້າ ແລະ ນຳມາ ນຳໃຊ້ໂດຍກະຊວງກະສິກຳ ແລະ ພັດທະນາຊົນນະບົດຫວຽດນາມ ສົມທົບກັບກະຊວງກະສິກຳ ແລະ ສິ່ງແວດລ້ອມຂອງລາວ, ແຂວງຊຽງຂວາງໃນປີ 2024 ແລະ ບັນລຸໄດ້ໝາກຜົນດີ. ນີ້​ແມ່ນ​ແນວພັນ​ເຂົ້າ​ທີ່​ມີ​ຄຸນຄ່າ, ມີ​ຄວາມ​ທົນ​ທານ​ຕໍ່​ພະຍາດ​ ​ແລະ ​ໄດ້​ຮັບ​ຜົນ​ຜະລິດ​ສູງ; ແນວພັນເຂົ້າພື້ນເມືອງ ແຕ່ໄດ້ຮັບການສະໜັບສະໜູນດ້ານຝຸ່ນ ແລະ ວິທີການປູກຝັງຈາກບໍລິສັດ; ການປູກມັນຕົ້ນແບບພື້ນເມືອງ ແຕ່ໄດ້ຮັບການສະໜັບສະໜູນດ້ານຝຸ່ນ ແລະ ວິທີການປູກຈາກບໍລິສັດ.

ໄລຍະທີ 2 ແມ່ນໄລຍະຂະຫຍາຍຮູບແບບການຜະລິດ ໂດຍບໍລິສັດຈະຊື້ຄືນບັນດາຜະລິດຕະພັນເຂົ້ານາແຊງທີ່ປະຊາຊົນປູກໃນລະດູຮ້ອນ-ລະດູໃບໄມ້ປົ່ງໃນປີ 2025, ເກັບຮັກສາ ແລະ ປຸງແຕ່ງແນວພັນຕາມຂະບວນການທີ່ຖືກຕ້ອງ ແລະ ມອບໃຫ້ບັນດາຄອບຄົວໃນບ້ານຕ່າງໆ ເພື່ອຂະຫຍາຍຮູບແບບການຜະລິດ; ກໍ່ສ້າງ​ລະບົບ​ຊົນລະ ປະທານ​ໃຫ້​ສຳ​ເລັດ​ໃນ​ປີ 2025 ​ໃຫ້​ໄດ້​ຜົນລະປູກ​ໃນ​ເບື້ອງ​ຕົ້ນ 2 ປີ​ຕໍ່​ປີ ໃນປີ 2026.

ໄລຍະທີ 3 ບໍລິສັດ ສົມທົບກັບກະຊວງກະສິກຳ ແລະ ພັດທະນາຊົນນະບົດ ຫວຽດນາມ ແລະ ມະຫາວິທະ ຍາໄລແຫ່ງຊາດຮ່າໂນ້ຍ ຄົ້ນຄວ້າ, ພັດທະນາ, ນຳພາປະຊາຊົນປູກ, ຜະລິດ, ເກັບກ່ຽວພືດຢາຈຳນວນໜຶ່ງຢູ່ໃຕ້ຮົ່ມປ່າໄມ້, ດ້ວຍເປົ້າໝາຍ “ປະຊາຊົນຍຶດດິນ, ຍຶດໝັ້ນ, ຮັກສາປ່າ ແລະ ພັດທະນາເສດຖະກິດ”.

ພາຍຫລັງການເຄື່ອນໄຫວຄົ້ນຄວ້າດິນ ແລະ ຝຶກອົບຮົມດ້ານວິຊາການ, ບໍລິສັດ ພູຊວນ ກໍ່ສ້າງ ແລະ ການຄ້າ ຈຳກັດ ໄດ້ມອບໃຫ້ 2 ອາຈານ ແລະ ແພດຊ່ຽວຊານດ້ານການປູກຝັງ ແລະ ພະຍາດພືດ ເປັນທີ່ປຶກສາ ໂດຍກົງກ່ຽວກັບຮູບແບບການປູກເຂົ້າ ແລະ ມັນຕົ້ນ. ນອກຈາກນັ້ນ, ຍັງໄດ້ສົມທົບກັບຄະນະວິສະວະກອນກະສິກຳ ແລະ ປ່າໄມ້ ຈຳນວນ 6 ທ່ານ ສືບຕໍ່ຕິດຕາມ ແລະ ຊ່ວຍເຫລືອປະຊາຊົນ, ສົມທົບກັນ ແລະ ກວດກາເຕັກນິກຢ່າງບໍ່ຢຸດຢັ້ງ ຕະ ຫລອດໄລຍະການປູກເຂົ້າ.     

KPL