ຂປລ
“ງານວາງສະແດງ ໝາກຜົນ ດິຈິຕອນ ອັດສະລິຍະ ຊຸກຍ ການພັດທະນາ ຂອງແມ່ຍິງ ແລະ ເດັກຍິງ” ເຊິ່ງເປັນ ກິດຈະກຳໜຶ່ງ ພາຍໃຕ້ ກອງປະຊຸມ ສຸດຍອດ ແມ່ຍິງໂລກ ໄດ້ຈັດຂຶ້ນ ຢູ່ນະຄອນຫລວງ ປັກກິ່ງ ຂອງ ສປ ຈີນ
ຂປລ.ວິທະຍຸ-ໂທລະພາບ ສູນກາງຈີນ, ວັນທີ 14 ຕຸລານີ້, “ງານວາງສະແດງ ໝາກຜົນ ດິຈິຕອນ ອັດສະລິຍະ ຊຸກຍ ການພັດທະນາ ຂອງແມ່ຍິງ ແລະ ເດັກຍິງ” ເຊິ່ງເປັນ ກິດຈະກຳໜຶ່ງ ພາຍໃຕ້ ກອງປະຊຸມ ສຸດຍອດ ແມ່ຍິງໂລກ ໄດ້ຈັດຂຶ້ນ ຢູ່ນະຄອນຫລວງ ປັກກິ່ງ ຂອງ ສປ ຈີນ, ທ່ານ ນາງ ເພີງລີ້ຢວນ ພັນລະຍາຂອງ ທ່ານ ສີ ຈິ້ນຜິງ ປະທານ ປະເທດຈີນ, ທູດພິເສດ ຊຸກຍູ້ການສຶກສາ ເດັກຍິງ ແລະ ແມ່ຍິງ ຂອງອົງການ ການສຶກສາ ວິທະຍາສາດ ແລະ ວັດທະນະທຳ ຂອງອົງການ ສະຫະ ປະຊາຊາດ ຫລື UNESCO ພ້ອມດ້ວຍ ທ່ານ ນາງ ຊີມາ ຊາມີ ບາຮຸສ ຮອງເລຂາທິການໃຫຍ່ ທັງເປັນຫົວໜ້າ ບໍລິຫານງານ ຂອງອົງການ ແມ່ຍິງ ສປຊ ຈະເຂົ້າຮ່ວມງານ ພ້ອມທັງ ກ່າວຄຳປາໄສ ແລະ ມີບັນດາພັນລະຍາ ຂອງຜູ້ນຳຕ່າງປະເທດ ທີ່ກ່ຽວຂ້ອງ, ຜູ້ຮັບຜິດຊອບ ອົງການແມ່ຍິງ, ຜູ້ຕາງໜ້າບຸກຄົນ ທີ່ມີໄມຕີຈິດ ມິດຕະພາບຕໍ່ ສປ ຈີນ ແລະ ແຂກອື່ນໆ ໄດ້ເຂົ້າຮ່ວມງານ ດັ່ງກ່າວ. ທ່ານ ນາງ ເພີງລີ້ຢວນ ກ່າວວ່າ: ປັດຈຸບັນ, ປະເທດຕ່າງໆ ໃນໂລກພວມ ຕັ້ງໜ້າ ຊອກຄົ້ນຮູບແບບ ທີ່ມີປະສິດທິຜົນ, ເພື່ອເຮັດໃຫ້ ໝາກຜົນ ແຫ່ງການປະດິດສ້າງໃໝ່ ດ້ານວິທະຍາສາດ ເຕັກໂນໂລຊີ ນຳເອົາຜົນປະໂຫຍດ ຫລາຍກວ່າເກົ່າ ໃຫ້ແກ່ ແມ່ຍິງ ແລະ ເດັກຍິງ. ນອກນີ້ ຍັງເພີ່ມຄວາມຮ່ວມມືກັບ ເພື່ອນມິດທັງຫລາຍ, ພະຍາຍາມເພື່ອບຸກເບີກ ສ້າງອະນາຄົດ ດິຈິຕອນ ອັດສະລິຍະ ທີ່ເຕັມໄປດ້ວຍໂອກາດ ໃຫ້ແມ່ຍິງ ແລະ ເດັກຍິງທັງຫລາຍ, ຮ່ວມກັນຊຸກຍູ້ ໃຫ້ພາລະກິດແມ່ຍິງ ທົ່ວໂລກ ກ້າວຂຶ້ນສູ່ ລະດັບໃໝ່ ຢ່າງບໍ່ຢຸດຢັ້ງ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
