ຂປລ
ທ່ານ ສີ ຈິ້ນຜິງ ປະທານ ປະເທດຈີນ ພ້ອມດ້ວຍ ພັນລະຍາ ຄື: ທ່ານ ນາງ ເຜີງລີ້ຢວນ ໄດ້ພົບປະກັບ ສົມເດັດ ໂນໂຣດົມ ສີຫາໂມນີ ເຈົ້າຊີວິດ ກຳປູເຈຍ ພ້ອມດ້ວຍ ພະລາຊີນີ ໂນໂຣດົມ ໂມນີນຽດ ຢູ່ທຳນຽບ ຈົ່ງນານໄຫ ນະຄອນຫລວງປັກກິ່ງ.
ຂປລ.ວິທະຍຸສາກົນແຫ່ງ ສປ ຈີນ, ວັນທີ 26 ສິງຫານີ້, ທ່ານ ສີ ຈິ້ນຜິງ ປະທານ ປະເທດຈີນ ພ້ອມດ້ວຍ ພັນລະຍາ ຄື: ທ່ານ ນາງ ເຜີງລີ້ຢວນ ໄດ້ພົບປະກັບ ສົມເດັດ ໂນໂຣດົມ ສີຫາໂມນີ ເຈົ້າຊີວິດ ກຳປູເຈຍ ພ້ອມດ້ວຍ ພະລາຊີນີ ໂນໂຣດົມ ໂມນີນຽດ ຢູ່ທຳນຽບ ຈົ່ງນານໄຫ ນະຄອນຫລວງປັກກິ່ງ. ໃນໂອກາດນີ້ ທ່ານ ສີ ຈິ້ນຜິງ ກ່າວວ່າ, ສາຍພົວພັນລະຫວ່າງ ສປ ຈີນ-ກຳປູເຈຍ ໄດ້ຜ່ານການທົດສອບ ຈາກການປ່ຽນແປງ ຢ່າງສັບສົນ ຂອງສະພາບການສາກົນ, ໄດ້ສ້າງມິດຕະພາບ ອັນແຂງແກ່ນ ທີ່ຮ່ວມທຸກ ຮ່ວມສຸກ, ກາຍເປັນ ຊັບສົມບັດ ທີ່ລ້ຳຄ່າ ຂອງປະຊາຊົນ ສອງຊາດ, ແລະ ສົມຄວນໄດ້ຮັບ ການທະນຸຖະໜອມຈາກ ສອງຝ່າຍ ເປັນພິເສດ. ເມື່ອຜະເຊີນໜ້າກັບ ສະພາບການສາກົນ ທີ່ມີຄວາມສັບສົນວຸ້ນວາຍ, ໂດຍສອງປະເທດ ຈີນ-ກຳປູເຈຍ ຕ້ອງຢືນຄຽງບ່າຄຽງໄຫລ່ ຢູ່ຮ່ວມກັນ ຢ່າງເດັດດ່ຽວ ກວ່າເກົ່າ, ສືບທອດມິດຕະພາບ ອັນເປັນມູນເຊື້ອ, ເພີ່ມທະວີ ຄວາມສາມັກຄີ ແລະ ການປະສານງານ, ເລັ່ງລັດສ້າງຄູ່ຮ່ວມ ຊາຕາກຳຈີນ-ກຳປູເຈຍ ທີ່ມີອະນາຄົດ ຮ່ວມກັນ ໃນຍຸກໃໝ່, ສ້າງຜົນປະໂຫຍດ ໃຫ້ແກ່ ປະຊາຊົນສອງຊາດ ໄດ້ຫລາຍກວ່າເກົ່າ. ສປ ຈີນ ເດັດດ່ຽວສະໜັບ ສະໜູນ ປະຊາຊົນ ກຳປູເຈຍ ເດີນຕາມເສັ້ນທາງ ການພັດທະນາ ທີ່ສອດຄ່ອງກັບ ສະພາບຕົວຈິງ ຂອງປະເທດຕົນ, ບັນລຸ ຄວາມສຸກຊຸ່ມ ກຸ່ມເຢັນ ຍາວນານ ຂອງກຳປູເຈຍ.ຈາກນັ້ນ ສົມເດັດໂນໂຣດົມ ສີຫາໂມນີ ແລະ ພະລາຊີນີໂນໂຣດົມ ໂມນີນຽດ ກ່າວວ່າ ກຳປູເຈຍ ປະຕິບັດຕໍ່ສາຍພົວພັນ ກຳປູເຈຍ-ສປ ຈີນ ຈາກລະດັບສູງດ້ານຍຸດທະສາດ, ຍິນດີເສີມຂະຫຍາຍ ສາຍພົວພັນ ມິດຕະພາບ ອັນເປັນມູນເຊື້ອ ລະຫວ່າງ ກຳປູເຈຍ-ສປ ຈີນ ໃຫ້ດີ ແລະ ຮ່ວມກັນ ສ້າງຄູ່ຮ່ວມຊາຕາກຳ ຈີນ-ກຳປູເຈຍ ທີ່ມີອະນາຄົດຮ່ວມກັນ ໃນຍຸກໃໝ່./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
