ຂປລ. ອີງຕາມຂ່າວ​ຈາກ​ ສະ​ມາ​ຄົມ​ການ​ຈໍ​ລະ​ຈອນ​ ແລະ ຈັດ​ຊື້​ສິນ​ຄ້າ​ຈີນ ໃຫ້​ຮູ້​ວ່າ: ໃນ​ໄລ​ຍະ ​ແຜນ​ພັດ​ທະ​ນາ ​ເສດ​ຖະ​ກິດ-ສັງ​ຄົມ ​ແຫ່ງ​ຊາດ 5 ປີ​ຄັ້ງ​ທີ 14 ຂອງ​ ສປ ຈີນ, ຍອດ​ມູນ​ຄ່າ ການ​ຈໍ​ລະ​ຈອນ​ສິນ​ຄ້າ​ ໃນ​ສັງ​ຄົມ​ຈີນ​ ໄດ້​ຮັກ​ສາ​ການ​ພັດ​ທະ​ນາ ​ຢ່າງ​ໝັ້ນ​ທ່ຽງ. ປີ 2025, ​ຍອດ​ມູນ​ຄ່າ​ ການ​ຈໍ​ລະ​ຈອນ​ສິນ​ຄ້າ ​ໃນ​ທົ່ວ​ສັງ​ຄົມ​ຈີນ​ ຈະ​ບັນ​ລຸ​ເຖິງ 380.000 ຕື້ຢວນ, ໄດ້​ເພີ່ມ​ຂຶ້ນ​ ປະ​ມານ 80.000 ຕື້ຢວນ​ ໃນ​ຮອບ 5 ປີ. ຂະ​ໜາດ ​ລາຍ​ຮັບ​ລວມ ​ຈາກອຸດ​ສາ​ຫະ​ກຳ ຈໍ​ລະ​ຈອນ​ສິນ​ຄ້າ​ ຂອງ​ ສປ ຈີນ ​ໄດ້​ຂະ​ຫຍາຍ ກວ້າງ​ອອກ ​ຢ່າງ​ຕໍ່​ເນື່ອງ, ໄດ້​ເພີ່ມ​ຂຶ້ນ​ ປະ​ມານ 4.000 ຕື້ຢວນ​ ໃນ​ຮອບ 5 ປີ ແລະ ຄ​າດ​ວ່າ​ຈະ​ມີຫລາຍກວ່າ 14.000 ຕື້ຢວນ​ໃນ​ປີ 2025, ຂະ​ໜາດ​ຕະຫລາດ​ ອາດ​ຈະ​ສາ​ມາດ ຄອງ​ອັນ​ດັບ​ໜຶ່ງ​ຂອງ​ໂລກ​ເປັນປີ​ທີ 10 ​ຕິດ​ຕໍ່​ກັນ. ອຸດ​ສາ​ຫະ​ກຳ ​ຈໍ​ລະ​ຈອນ​ສິນ​ຄ້າ​ສາ​ກົນ​ ມີ​ຄວາມ​ຕ້ອງ​ການ​ນັບ​ມື້ ​ນັບຫລາຍ​ຂຶ້ນ ແລະ ເຄືອ​ຂ່າຍ​ການ​ຈໍ​ລະ​ຈອນ ສິນ​ຄ້າ​ສາ​ກົນ ​ນັບ​ມື້​ນັບ​ຖີ່​ຖ້ວນ. ຂະ​ບວນ​ລົດ​ໄຟ​ຈີນ-ເອີ​ຣົບ ​ໄດ້​ເດີນ​ທາງ​ໄປ​ເຖິງ 229 ຕົວ​ເມືອງ​ໃນ​ເອີ​ຣົບ ແລະ 100 ກວ່າ​ຕົວ​ເມືອງ ​ໃນ​ອາ​ຊີ. ສ່ວນ​ແບ່ງ​​ຕະຫລາດ​ ຂົນ​ສົ່ງ ​ສິນ​ຄ້າ​ສາ​ກົນ ​ຂອງວິ​ສາ​ຫະ​ກິດ​ ການ​ບິນ​ ໄດ້​ບັນ​ລຸ​ເຖິງ 44%, “ເສັ້ນ​ທາງ​ ສາຍ​ໄໝ​ ທາງ​ອາ​ກາດ” ໄດ້​ປົກ​ຄຸມ 213 ຕົວ​ເມືອງ​ໃນ 83 ປະ​ເທດ. ຂະ​ໜາດ​ ຂະ​ບວນ​ກຳ​ປັ່ນຂົນ​ສົ່ງ​ຂອງ ສປ ​ຈີນ ​ເປັນ​ອັນ​ດັບ​ໜຶ່ງ​ ຂອງ​ໂລກ ແລະ ໄດ້​ເປີດ​ເສັ້ນ​ທາງ​ ເດີນ​ກຳ​ປັ່ນ​ກັບ 100 ກວ່າ​ປະ​ເທດ ແລະ ເຂດ​ແຄວ້ນ​ໃນ​ໂລກ. ການ​ຂົນ​ສົ່ງ​ສິນ​ຄ້າ​ ທາງ​ທະ​ເລ​ຂອງ​ ສປ ຈີນ ​ເປັນ​ອັນ​ດັບ​ໜຶ່ງ​ ຂອງ​ໂລກ​ຫລາຍ​ປີ ​ຕິດ​ຕໍ່​ກັນ./.

KPL