ຂປລ. ກອງປະຊຸມກວດກາເນື້ອໃນຮອບດ້ານ ຮ່າງກົດໝາຍວ່າດ້ວຍພະນັກງານໄອຍະການ (ສະບັບປັບປຸງ) ຈັດຂຶ້ນ ໃນວັນທີ 16-17 ພຶດສະພາ 2025 ຜ່ານມາ ໂດຍການເປັນປະທານຂອງ ທ່ານ ຄໍາແພງ ວິລະພັນ ປະທານກໍາມາທິການກົດໝາຍ, ມີບັນດາຮອງປະທານກຳມາທິການ ທີ່ກ່ຽວຂ້ອງຂອງ ສະພາແຫ່ງຊາດ (ສພຊ), ມີຮອງລັດຖະ ມົນຕີຈາກກະຊວງ, ອົງການກ່ຽວຂ້ອງ, ຄະນະທີ່ປຶກສາທາງດ້ານກົດໝາຍ ຂອງຄະນະປະຈຳສະພາແຫ່ງຊາດ, ຫົວໜ້າກົມ, ຮອງກົມ, ຄະນະພະແນກ ແລະ ພະນັກງານ-ລັດຖະກອນ ຈາກພາກສ່ວນກ່ຽວຂ້ອງ ເຂົ້າຮ່ວມ.

ທ່ານ ຄໍາແພງ ວິລະພັນ ໃຫ້ຮູ້ວ່າ: ກອງປະຊຸມຄັ້ງນີ້, ແນໃສ່ຄົ້ນຄວ້າ, ວິເຄາະ, ວິໄຈ ເນື້ອໃນຕ່າງໆ ຂອງກົດໝາຍຢ່າງລະອຽດ, ເລິກເຊິ່ງ ຮັບປະກັນຄວາມພ້ອມທາງດ້ານເນື້ອໃນ ຂອງຮ່າງກົດໝາຍວ່າດ້ວຍ ພະນັກງານໄອຍະການ ກ່ອນນໍາເຂົ້າພິຈາລະນາ ໃນກອງປະຊຸມສະໄໝສາມັນ ເທື່ອທີ 9 ຂອງສະພາແຫ່ງຊາດ ຊຸດທີ IX ເຊິ່ງຈະໄດ້ພ້ອມກັນຄົ້ນຄວ້າ ແລະ ປະກອບຄຳເຫັນຢ່າງມີເຫດຜົນ, ກົງໄປກົງມາ ແນໃສ່ເຮັດໃຫ້ຮ່າງກົດໝາຍສະບັບນີ້ ມີເນື້ອໃນຄົບຖ້ວນ, ຮັດກຸມ ແລະ ສາມາດຈັດຕັ້ງປະຕິບັດໄດ້ຢ່າງມີປະສິດທິພາບ ແລະ ປະສິດທິຜົນ. ຖ້າຫາກມີເນື້ອໃນ, ບັນຫາໃດ ທີ່ກອງປະຊຸມບໍ່ສາມາດຕົກລົງເປັນເອກະພາບກັນໄດ້ນັ້ນ ຈະໄດ້ນໍາສະເໜີຂໍຄຳເຫັນຈາກ ກອງປະຊຸມຄະນະປະຈຳສະພາແຫ່ງຊາດ ເພື່ອພິຈາລະນາຕື່ມ.

ໂອກາດນີ້, ທ່ານ ນາງ ພອນເພັດ ອຸ່ນແກ້ວ ຮອງຫົວໜ້າອົງການໄອຍະການປະຊາຊົນສູງສຸດ ໄດ້ໃຫ້ຮູ້ວ່າ: ເພື່ອເຮັດໃຫ້ການຄຸ້ມຄອງ ພະນັກງານໄອຍະການ ໄດ້ຢ່າງລວມສູນ, ເປັນເອກະພາບ ແລະ ມີປະສິດທິຜົນ ຈຶ່ງມີຄວາມຈໍາເປັນຕ້ອງສ້າງເຄື່ອງມື ໃນການຄຸ້ມຄອງພະນັກງານໄອຍະການ ໃນຂອບເຂດທົ່ວປະເທດ ດ້ວຍການກໍານົດມາດຕະຖານ, ເງື່ອນໄຂ, ການສອບເສັງ, ການປະເມີນຜົນ, ການເລື່ອນຂັ້ນ, ການປົດຂັ້ນ, ການຍົກຍ້າຍ ລວມທັງກໍານົດນະໂຍບາຍຕໍ່ພະນັກງານ, ຈັນຍາບັນ, ຈັນຍາທຳ, ການປະຕິບັດວິໄນ, ການກວດກາ, ການປົກປ້ອງສິດ ແລະ ໜ້າທີ່ຂອງພະນັກງານ ໄອຍະການປະຊາຊົນແຕ່ລະຂັ້ນ ໃຫ້ຈະແຈ້ງ, ຄົບຖ້ວນ ເພື່ອຮັບປະກັນ ໃຫ້ພະນັກງານໄອຍະການ ໄດ້ຮັບການພັດທະນາຮອບດ້ານດ້ວຍຄຸນນະພາບ ທັງດ້ານທິດສະດີ ການເມືອງ-ການປົກຄອງ, ວຽກງານວິຊາສະ ເພາະ, ພາສາຕ່າງປະເທດ ແລະ ອື່ນໆ ເພື່ອປະກອບສ່ວນເຂົ້າໃນ ການປະຕິບັດໜ້າທີ່ການເມືອງ ໃຫ້ມີຜົນສໍາເລັດ ແລະ ຖືກຕ້ອງຕາມກົດໝາຍ.

ຂໍ້ມູນ-ພາບ: ສອນສັກ ວັນວິໄຊ

KPL