ຂປລ. ແຫລ່ງທ່ອງທ່ຽວ ຕາດເລາະ-ຕາດຮັງ ເປັນແຫ່ງທ່ອງທ່ຽວ ທາງທໍາມະຊາດ ທີ່ສວຍງາມອີີກແຫ່ງໜຶ່ງ ຕັ້ງຢູ່ບ້ານຫົວຂົວເສັດ ເມືອງເລົ່າງາມ ແຂວງສາລະວັນ, ຫ່າງຈາກເທສະບານ ເມືອງສາລະວັນ 30 ກວ່າກິໂລແມັດ, ເປັນສະຖານທີ່ທ່ອງທ່ຽວ ທີ່ໄດ້ຮັບຄວາມນິຍົມຊົມຊອບ ຈາກນັກທ່ອງທ່ຽວ ທັງພາຍໃນ ແລະ ຕ່າງປະເທດ ເຂົ້າມາທ່ຽວຊົມເປັນຈຳນວນຫລາຍ ໂດຍສະເພາະ ໃນໄລຍະສະ ຫລອງປີໃໝ່ລາວ ພສ 2568 ທີ່ຈະມາເຖິງນີ້, ຜູ້ພັດທະນາສະຖານທີ່ທ່ອງທ່ຽວແຫ່ງນີ້ ໄດ້ກຽມຄວາມພ້ອມດ້ານຕ່າງໆ ເພື່ອຕ້ອນຮັບນັກທ່ອງທ່ຽວ ທີ່ຈະເຂົ້າມາທ່ຽວຊົມ.

ທ່ານ ນາງ ສອນທິດາ ອຸນາພົມ ປະທານບໍລິສັດພັດທະນາ ແຫລ່ງທ່ອງທ່ຽວຕາດເລາະ-ຕາດຮັງ ຈໍາກັດ ໄດ້ໃຫ້ສໍາພາດເມື່ອບໍ່ດົນນີ້ວ່າ: ປັດຈຸບັນ, ສະຖານທີ່ທ່ອງທ່ຽວ ຕາດເລາະ-ຕາດຮັງ ມີຄວາມພ້ອມຮອບດ້ານ ເພື່ອຕ້ອນຮັບນັກທ່ອງທ່ຽວ ທັງພາຍໃນ ແລະ ຕ່າງປະເທດ ທີ່ຈະເຂົ້າມາທ່ຽວໃນໄລຍະບຸນປີໃໜ່ລາວ ພສ 2568 ນີ້. ໃນສະຖານທີ່ທ່ອງທ່ຽວ, ນອກຈາກ ມີທຳມະຊາດ, ມີນ້ຳຕົກ ທີ່ສວຍງາມແລ້ວ, ຍັງມີສິ່ງອຳນວຍຄວາມສະດວກຕ່າງໆ ໄວ້ໃຫ້ບໍລິການແກ່ນັກທ່ອງທ່ຽວ ເປັນຕົ້ນ ມີຮ້ານອາຫານ, ມີຈຸດຊົມວິວ, ມີສະຖານທີ່ພັກຜ່ອນ ແລະ ອື່ນໆ. ນອກນັ້ນ, ຍັງມີຮ້ານວາງສະແດງສິນຄ້າໜຶ່ງ​ເມືອງ ໜຶ່ງ​ຜະລິດ​ຕະພັນ ສຳລັບບັນດາເມືອງ ພາຍໃນແຂວງສາລະວັນ ແລະ ຍັງມີຮ້ານວາງ ສະແດງ ຫລື ງານຕະຫລາດນັດ ໃຫ້ຊຸມຊົນທີ່ຢູ່ໃກ້ຄຽງ ຫລື ຕິດກັບແຫລ່ງທ່ອງທ່ຽວ ​ແລະ ມວນຊົນ ຊາວຄ້າ-ຂາຍໄດ້ນຳເອົາສິນຄ້າປະເພດຕ່າງໆ ​ເປັນ​ຕົ້ນ ພືດຜັກ, ອາຫານການກິນ ທີ່ຫາໄດ້ຕາມທ້ອງຖິ່ນ, ຕາມທຳມະຊາດ ໂດຍສະເພາະ ເຂົ້າຫລາມ ແລະ ປິ້ງໄກນາປົ່ງ ມາຂາຍ ໃຫ້ກັບນັກທ່ອງທ່ຽວ ເປັນການສ້າງສີສັນ ໃຫ້ແກ່ການທ່ອງທ່ຽວແບບປະຊາຊົນມີສ່ວນຮ່ວມ ຕື່ມ​ອີກ.

ພິເສດ ສຳລັບ ສິນຄ້າທີ່ເປັນເອກະລັກຂອງບັນດາເມືອງ ພາຍໃນແຂວງສາລະວັນ ໂດຍສະເພາະ ສິນຄ້າຜະລິດຕະພັນ ທີ່ເປັນໂອດັອບ ທີ່ນຳເຂົ້າມາວາງຈຳໜ່າຍ ເປັນຕົ້ນ ສິນຄ້າປະເພດ ເຄື່ອງຫັດຖະກຳຕຳແຜ່ນແພ, ເຄື່ອງຈັກສານ, ເຄື່ອງທີ່ລະນຶກ ແລະ ຜະລິດຕະພັນອື່ນໆ ຈະບໍ່ໄດ້ເສຍຄ່າເຊົ່່າສະຖານທີ່ ແນໃສ່ຊຸກຍູ້ສົ່ງເສີມ, ໂຄສະນາຜະລິດຕະພັນ ທີ່ເປັນເອກະລັກ ຂອງບັນດາເມືອງ ໃຫ້ເປັນທີ່ຮູ້ຈັກ ຂອງມວນຊົນ ກໍຄື ນັກທ່ອງທ່ຽວ ທັງພາຍໃນ ແລະ ຕ່າງປະເທດ ໄດ້ຮັບຮູ້ຢ່າງທົ່ວເຖິງ, ທັງເປັນການຊຸກຍູ້ການຊື້-ຂາຍສິນຄ້າ ໃຫ້ມີບັນຍາກາດຄຶກຄື້ນ.

ປັດຈຸບັນ, ແຫລ່ງທ່ອງທ່ຽວ ຕາດເລາະ-ຕາດຮັງ ພວມໄດ້ຮັບການພັດທະນາຄືນໃໝ່ ໃຫ້ມີຄວາມສວຍງາມ ແລະ ໂດດເດັ່ນຂຶ້ນກວ່າເກົ່າ, ຄາດວ່າຈະໃຫ້ສໍາເລັດ 100% ແລະ ເປີດໃຫ້ບໍລິການ ທ່ອງທ່ຽວເຕັມຮູບແບບ ແລະ ເປັນທາງການ ໃນທ້າຍປີ 2025 ນີ້, ເພື່ອດຶງດູດເອົານັກທ່ອງທ່ຽວ ທັງພາຍໃນ ແລະ ຕ່າງປະເທດ ເຂົ້າມາທ່ອງທ່ຽວ ສປປ ລາວ ກໍຄື ຕາດເລາະ-ຕາດຮັງ ​ໃຫ້ຫລາຍຂຶ້ນໃນແຕ່ລະປີ.

ຂ່າວ-ພາບ: ທະນູທອງ

KPL