ຂປລ
ຂປລ. ກະຊວງການເງິນ ອອກພັນທະບັດລັດຖະບານ ຊຸດໃໝ່ ປີ 2025 ຕະຫລາດຫລັກຊັບລາວ ປະກອບມີ ສະກຸນເງິນກີບ ຈໍານວນ 2.700 ຕື້ກີບ, ສະກຸນເງິນໂດລາສະຫະລັດ 100 ລ້ານໂດລາ, ສະກຸນເງິນບາດ 6.500 ລ້ານບາດ ແລະ ສະກຸນເງິນຢວນ ຈໍານວນ 200 ລ້ານຢວນ ໂດຍມີຕົວແທນຈຳໜ່າຍພັນລະບັດ ປະກອບມີ ບໍລິສັດຫລັກຊັບ ທຄຕລ-ກທ ຈຳກັດ, ບໍລິສັດຫລັກຊັບລາວ-ຈີນມະຫາຊົນ, ບໍລິສັດຫລັກຊັບ LDB-S.
ຂປລ. ກະຊວງການເງິນ ອອກພັນທະບັດລັດຖະບານ ຊຸດໃໝ່ ປີ 2025 ຕະຫລາດຫລັກຊັບລາວ ປະກອບມີ ສະກຸນເງິນກີບ ຈໍານວນ 2.700 ຕື້ກີບ, ສະກຸນເງິນໂດລາສະຫະລັດ 100 ລ້ານໂດລາ, ສະກຸນເງິນບາດ 6.500 ລ້ານບາດ ແລະ ສະກຸນເງິນຢວນ ຈໍານວນ 200 ລ້ານຢວນ ໂດຍມີຕົວແທນຈຳໜ່າຍພັນລະບັດ ປະກອບມີ ບໍລິສັດຫລັກຊັບ ທຄຕລ-ກທ ຈຳກັດ, ບໍລິສັດຫລັກຊັບລາວ-ຈີນມະຫາຊົນ, ບໍລິສັດຫລັກຊັບ LDB-S. ນອກນີ້, ຍັງມີ 7 ທະນາຄານທຸລະກິດຕົວແທນຈຳໜ່າຍຍ່ອຍຄື: ທະນາຄານການຄ້າຕ່າງປະເທດມະຫາຊົນ, ທະນາຄານສົ່ງເສີມກະສິກຳຈຳກັດ, ທະນາຄານພັດທະນາລາວ ຈໍາກັດ, ທະນາຄານເອັສທີ ຈໍາກັດ, ທະນາຄານພົງສະຫວັນ ຈຳກັດ, ທະນາຄານ ມາຣູຮານເຈແປນລາວ ຈໍາກັດ, ທະນາຄານແຫ່ງປະເທດຈີນ (ຮົງກົງ) ຈຳກັດ.
ທ່ານ ວິເລດ ກິນນາວົງ ຫົວໜ້າກົມຄຸ້ມຄອງໜີ້ສິນສາທາລະນະ ກະຊວງການເງິນ ໄດ້ໃຫ້ຮູ້ໃນໂອກາດຖະແຫລງຂ່າວ ໃນວັນທີ 14 ມີນາ 2025 ຜ່ານມານີ້ວ່າ: ກະຊວງການເງິນໄດ້ອອກພັນທະບັດ ລັດຖະບານ ຜ່ານຕະຫລາດຫລັກຊັບລາວ ປີນີ້ເປັນປີທີ 8 ເຊິ່ງເຫັນວ່າການຈໍາໜ່າຍ ພັນທະບັດລັດຖະບານ ຜ່ານຕະຫລາດ ຫລັກຊັບລາວ ແມ່ນໄດ້ຮັບການຕອບຮັບເປັນຢ່າງດີ ຈາກຜູ້ລົງທຶນທັງພາຍໃນ ແລະ ຕ່າງປະເທດ, ທັງບຸກຄົນ ແລະ ນິຕິບຸກຄົນ. ໃນເບື້ອງຕົ້ນການຈໍາໜ່າຍພັນທະບັດ ລັດຖະບານມີພຽງສະກຸນເງິນກີບເທົ່ານັ້ນ, ຕໍ່ມາຈຶ່ງມີການອອກຈໍາໜ່າຍສະກຸນເງິນໂດລາໃນປີ 2020, ສະກຸນເງິນບາດ ໃນປີ 2023 ແລະ ສະກຸນເງິນຢວນ ໃນປີ 2024 ຕາມລໍາດັບ.
ການອອກຈຳໜ່າຍພັນທະບັດດັ່ງກ່າວ, ເຫັນວ່າທຸກພາກສ່ວນໄດ້ມີການຮ່ວມມື ເອົາໃຈໃສ່ໃນການຈໍາໜ່າຍຈົນປະສົບຜົນສໍາເລັດ ແລະ ໄດ້ປະຕິບັດພັນທະໃນການຈ່າຍຕົ້ນທຶນ ແລະ ດອກເບ້ຍໃຫ້ຜູ້ລົງທຶນຢ່າງເຄັ່ງຄັດ ແລະ ຄົບຕາມຈໍານວນຖືກຕ້ອງຕາມເວລາທີ່ກຳນົດໄວ້, ນີ້ແມ່ນຂີດໝາຍສໍາຄັນອັນໜຶ່ງ ທີ່ເຮັດໃຫ້ຜູ້ລົງທຶນ ເຊື່ອໝັ້ນ ແລະ ເລືອກລົງທຶນໃນພັນທະບັດລັດຖະບານ. ຈາກຜົນງານອັນໂດດເດັ່ນຜ່ານມາ, ກະຊວງການເງິນ ຈຶ່ງເຫັນດີໃຫ້ສືບຕໍ່ໃຫ້ມີການຈໍາໜ່າຍພັນທະບັດລັດຖະບານ ປີ 2025 ຜ່ານຕະຫລາດຫລັກຊັບລາວ.
KPL
