*ໃນໄລຍະ 5 ປີຜ່ານມາ, ເສດຖະກິດ ເມືອງວຽງໄຊ ແຂວງຫົວພັນ ມີຈັງຫວະເຕີບໂຕ ແລະ ຂະຫຍາຍຕົວຢ່າງຕໍ່ເນື່ອງສະເລ່ຍຢູ່ ໃນລະດັບ 3,85% ຕໍ່ປີ, ລວມມູນຄ່າຜະລິດຕະພັນພາຍໃນບັນລຸ 948 ຕື້ກວ່າກີບ, ທຽບໃສ່ແຜນປະຕິບັດໄດ້ 88,49% ສະເລ່ຍໃສ່ຫົວຄົນໄດ້ 6 ລ້ານກວ່າກີບຕໍ່ຄົນຕໍ່ປີ. ສຳລັບຂະແໜງກະສິກໍາຂະຫຍາຍຕົວ 1,84% ກວມເອົາ 64,05% ຂອງຈີດີພີ, ຂະແໜງອຸດສາຫະກຳ-ການຄ້າຂະຫຍາຍຕົວ 1% ກວມເອົາ 19,10% ຂອງຈີດີພີ, ຂະແໜງການບໍລິການຂະຫຍາຍຕົວ 1,01% ກວມເອົາ 16,99%. ທົ່ວເມືອງມີເນື້ອທີ່ປູກຝັງ 28 ພັນກວ່າເຮັກ ຕາ, ຜົນການຜະລິດ 149 ກວ່າ ໂຕນ, ທຽບແຜນການປະຕິບັດໄດ້ 107,95%.

     ສະຫາຍ ສິງພອນ ທິດສະຫວັນ ຮອງເລຂາພັກເມືອງວຽງໄຊ ໄດ້ລາຍງານຕໍ່ກອງປະຊຸມໃຫຍ່ຜູ້ແທນອົງຄະນະພັກເມືອງວຽງໄຊ ຄັ້ງ ທີ XII ເມ່ືອບໍ່ດົນມານີ້ວ່າ: ການ ນໍາພາ-ຊີ້ນໍາຜັນຂະຫຍາຍ ແລະ ຈັດຕ້ັງປະຕິບັດມະຕິກອງປະຊຸມໃຫຍ່ ອົງຄະນະພັກເມືອງ ຄັ້ງທີ XI, ແຜນພັດທະນາເສດຖະກິດ-ສັງຄົມ ຄັ້ງທີ IX ຂອງເມືອງໃນໄລຍະ 5 ປີຜ່ານມາ ໄດ້ດໍາເນີນໄປໃນເງື່ອນໄຂສະພາບແວດລ້ອມສາກົນ ແລະ ພາກພື້ນມີການຜັນແປໄປຢ່າງສັບສົນບວກກັບການລະບາດຂອງພະຍາດ, ແຕ່ດ້ວຍຄວາມຮັບຜິດຊອບສູງ ຂອງຄະນະພັກແຕ່ລະຂັ້ນ, ສະມາຊິກພັກ, ພະນັກງານ, ທະຫານ,  ຕຳຫລວດ ແລະ ປະຊາຊົນບັນດາເຜົ່າໄດ້ສືບຕໍ່ນຳໃຊ້ທຸກເງື່ອນໄຂອຳນວຍຄວາມສະດວກ, ແກ້ໄຂຂອດອຸດຕັນການພັດທະນາສາມາດຜ່ານຜ່າຂໍ້ຫຍຸ້ງຍາກ ແລະ ສິ່ງທ້າທາຍຕ່າງໆ ພ້ອມກັນຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ອົງຄະນະພັກເມືອງ ມີຜົນສຳເລັດຫລາຍດ້ານ ເປັນຕົ້ນສ້າງເມືອງວຽງໄຊ ເປັນເມືອງທີ່ມີຄວາມສະຫງົບ, ສັງຄົມມີຄວາມເປັນລະບຽບຮຽບຮ້ອຍ, ໄດ້ພ້ອມກັນຈັດຕັ້ງຕາມວາລະແຫ່ງຊາດ ແກ້ໄຂບັນຫາຢາເສບຕິດ, ດຳເນີນຍຸດທະສາດຫັນລົງກໍ່ສ້າງຮາກຖານການເມືອງ ສ້າງບ້ານພັດທະນາຕາມ 4 ເນື້ອໃນ 4 ຄາດໝາຍຕິດພັນກັບການພັດທະນາເສດຖະກິດ-ສັງຄົມ, ວຽກງານປ້ອງກັນຊາດ-ປ້ອງກັນຄວາມສະຫງົບ ໄດ້ສ້າງຄວາມໄວ້ວາງໃຈ ແລະ ອຳນວຍຄວາມສະດວກໃຫ້ປະຊາຊົນ, ຍູທ່າງທຳມາຫາກິນ, ໄປມາຫາສູ່, ແລກປ່ຽນຊື້-ຂາຍສະດວກ, ນັກທຸລະກິດ, ນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາເມືອງວຽງໄຊ ນັບມື້ຫລາຍຂຶ້ນ.

     ພ້ອມນີ້, ໄດ້ລົງເລິກ ຕິດແທດເຖິງຮາກຖານ, ແກ້ໄຂປະກົດການຫຍໍ້ທໍ້ໃນສັງຄົມ, ປະຕິບັດບ້ານປ້ອມໝັ້ນສູ້ຮົບໄດ້ 3 ບ້ານ, ບ້ານປ້ອງກັນຊາດເຂັ້ມແຂງ ໄດ້ 47 ບ້ານ ຂອງຈຳນວນບ້ານທັງໝົດ, ບ້ານປ້ອງກັນຄວາມສະຫງົບດີໄດ້ 78 ບ້ານ ປະຕິບັດໄດ້ 117,87%, ບ້ານປອດຢາເສບຕິດໄດ້ 67 ບ້ານ ທຽບໃສ່ມະຕິ XI ປະຕິບັດໄດ້ 100%, ເມືອງວຽງໄຊ ຍັງໄດ້ສ້າງຕັ້ງກອງທຶນຕ້ານຢາເສບຕິດ ເພື່ອໝູນໃຊ້ເຂົ້າໃນວຽກງານສະກັດກັ້ນ-ຕ້ານຢາເສບຕິດຢູ່ຂັ້ນເມືອງ. ພ້ອມນີ້, ທົ່ວເມືອງສ້າງລາຍຮັບໄດ້ 18 ຕື້ກວ່າກີບ ທຽບໃສ່ແຜນ ປະຕິບັດໄດ້ 115,60%, ປະຕິບັດ ລາຍຈ່າຍໄດ້ 46 ຕື້ກວ່າກີບ ທຽບ ໃສ່ແຜນປະຕິບັດໄດ້ 130,18%; ລະດົມເງິນຝາກ 168,8 ຕື້ກວ່າກີບ ທຽບໃສ່ແຜນປະຕິບັດໄດ້ 75,3%, ປ່ອຍກູ້ 69,9 ຕື້ກວ່າກີບ ທຽບ ໃສ່ແຜນປະຕິບັດໄດ້ 70,96%; ມີວິສາຫະກິດຂຶ້ນທະບຽນ 455 ຫົວໜ່ວຍ, ໂຮງງານນໍ້າດື່ມ 7 ແຫ່ງ, ໂຮງງານດິນຈີ່ 1 ແຫ່ງ, ໂຮງປັ້ນດິນບ໋ອກ 32 ຫົວໜ່ວຍ; ມູນຄ່າສົ່ງອອກສິນຄ້າບັນລຸ 104 ຕື້ກວ່າກີບ ທຽບໃສ່ແຜນປະຕິບັດ ໄດ້ 45,92%, ມູນຄ່ານໍາເຂົ້າສິນຄ້າ 37 ຕ້ືກວ່າກີບ ທຽບໃສ່ແຜນ ປະຕິບັດໄດ້ 21,46%, ມີເສັ້ນທາງ ທຽວໄດ້ 2 ລະດູກວມ 76,4% ຂອງບ້ານທົ່ວເມືອງ ມີບໍລິສັດເຂົ້າມາດໍາເນີນກິດຈະການແຮ່ທາດ 39 ໂຄງການ, ທ່ົວເມືອງມີໄຟຟ້າໃຊ້ 99 ບ້ານກວມ 95,19% ຂອງບ້ານທົ່ວເມືອງ, ອອກໃບຕາດິນຖາວອນໃຫ້ແກ່ບຸກຄົນ, ນິຕິ ບຸກຄົນໄດ້ 7.429 ຕອນທຽບ ແຜນປະຕິບັດໄດ້ 148,58%, ມີ ສັນຍານໂທລະສັບຄວບຄຸມພື້ນທີ່ກວມເອົາ 86,4% ຂອງບ້ານທົ່ວເມືອງ. ນອກຈາກນີ້, ຄະນະບໍລິຫານງານພັກເມືອງຍັງໄດ້ເອົາໃຈໃສ່ນໍາພາຊີ້ນໍາຂົງເຂດວັດທະນະທໍາ, ວຽກງານກໍ່ສ້າງຮາກຖານການ ເມືອງ ແລະ ພັດທະນາຊົນນະບົດ, ປັບປຸງ ແລະ ເພີ່ມທະວີການຄຸ້ມຄອງລັດໃຫ້ເຂ້ັມແຂງ, ສັກສິດຕາມກົດໝາຍ, ເຕົ້າໂຮມຄວາມສາມັກຄີປະຊາຊົນບັນດາເຜົ່າ ເປັນຈິດໜຶ່ງໃຈດຽວປະກອບສ່ວນເຂົ້າໃນວຽກງານປົກປັກຮັກສາ ແລະ ພັດທະນາເມືອງວຽງໄຊຕະຫລອດມາ ພ້ອມທັງເປີດກວ້າງການພົວພັນຮ່ວມມືກັບຕ່າງປະເທດ ບົນພື້ນຖານແນວທາງການຕ່າງປະເທດຂອງພັກ, ສຶກສາອົບຮົມການເມືອງ-ແນວຄິດ ສອດຫ້ອຍເຂົ້າໃນທຸກຂົງເຂດວຽກງານຂອງ-ລັດ, ອົງການຈັດຕັ້ງມະຫາຊົນ ແລະ ອົງການຈັດຕັ້ງສັງຄົມ. 

      ສະຫາຍ ສິງພອນ ທິດສະຫວັນ ກ່າວຕື່ມວ່າ: ສຳລັບທິດທາງແຜນການໃນຕໍ່ໜ້າ, ເມືອງວຽງໄຊ ຈະສືບຕໍ່ເສີມຂະຫຍາຍໝາກຜົນທີ່ຍາດມາໄດ້, ພ້ອມແກ້ໄຂຈຸດຄົງຄ້າງ ແລະ ສືບຕໍ່ພັດທະນາເມືອງວຽງໄຊຕາມ 5 ຄຸນລັກສະນະ; 5 ວິໄສທັດ; 4 ທ່າແຮງ; 5 ມູນເຊື້ອໃຫ້ປະກົດເປັນຈິງ ພັດທະນາເມືອງວຽງໄຊ ຕາມຄໍາຂວັນ “ເສີມຂະຫຍາຍມູນເຊື້ອປະຕິວັດ, ພັດທະນາເປັນເມືອງກະສິກໍາ, ການທ່ອງທ່ຽວປະຫວັດສາດ-ທຳມະຊາດແບບຍືນຍົງ, ສົ່ງເສີມການຜະລິດສິນຄ້າຫັດຖະກຳ ແລະ ອຸດສາຫະກຳປຸງແຕ່ງຂະໜາດນ້ອຍ”.

ໂດຍ: ໄອແກ້ວ

KPL