ຂປລ
ຂປລ. ໃນວັນທີ 13-14 ກຸມພາ 2025 ຜ່ານມາ, ສະຖາບັນເລືອດແຫ່ງຊາດ ອົງການກາແດງ ແຫ່ງຊາດລາວ ຈັດກິດຈະກຳຮັບບໍລິຈາກເລືອດ ເພື່ອຊ່ວຍເຫລືອສັງຄົມ ແບບສະໝັກໃຈ, ບໍ່ຮຽກຮ້ອງສິ່ງຕອບແທນ ໂດຍມີບັນດານັກຮຽນ-ນັກສຶກສາ, ພະນັກງານ-ລັດຖະກອນ, ກົມກອງລວມໝູ່ ແລະ ພາກສ່ວນຕ່າງໆ ພາຍໃນນະຄອນຫລວງວຽງຈັນ ເຂົ້າຮ່ວມບໍລິຈາກເລືອດ ເປັນຈຳນວນຫລາຍ.
ຂປລ. ໃນວັນທີ 13-14 ກຸມພາ 2025 ຜ່ານມາ, ສະຖາບັນເລືອດແຫ່ງຊາດ ອົງການກາແດງ ແຫ່ງຊາດລາວ ຈັດກິດຈະກຳຮັບບໍລິຈາກເລືອດ ເພື່ອຊ່ວຍເຫລືອສັງຄົມ ແບບສະໝັກໃຈ, ບໍ່ຮຽກຮ້ອງສິ່ງ ຕອບແທນ ໂດຍມີບັນດານັກຮຽນ-ນັກສຶກສາ, ພະນັກງານ-ລັດຖະກອນ, ກົມກອງລວມໝູ່ ແລະ ພາກສ່ວນຕ່າງໆ ພາຍໃນນະຄອນຫລວງວຽງຈັນ ເຂົ້າຮ່ວມບໍລິຈາກເລືອດ ເປັນຈຳນວນຫລາຍ.
ທ່ານ ຈັນທະລາ ສຸກສາຄອນ ຫົວໜ້າສະຖາບັນເລືອດແຫ່ງຊາດ ອົງການກາແດງແຫ່ງຊາດລາວ ໄດ້ໃຫ້ຮູ້ວ່າ: ເພື່ອເປັນການສ້າງຂະບວນການ ຂໍ່ານັບຮັບຕ້ອນ ວັນສຳຄັນຂອງຊາດ, ຂອງພັກ ໂດຍສະ ເພາະ ວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 70 ປີ, ວັນສະຖາປະນາ ສປປ ລາວ ຄົບຮອບ 50 ປີ ແລະ ວັນສຳຄັນຕ່າງໆໃນຕໍ່ໜ້າ ໂດຍສະເພາະ ເປັນການປະກອບສ່ວນເຂົ້າໃນ ການສະໜອງເລືອດທີ່ປອດໄພ ໃຫ້ກັບຄົນເຈັບ ທີ່ນອນຮັກສາຕົວ ຢູ່ຕາມໂຮງໝໍແຫ່ງຕ່າງໆ ຢູ່ສູນກາງ-ທ້ອງຖິ່ນ ໄດ້ມີເລືອດພຽງພໍ ແລະ ປອດໄພ.
ທ່ານ ຈັນທະລາ ສຸກສາຄອນ ຍັງໄດ້ເນັ້ນອີກວ່າ: ການບໍລິຈາກເລືອດ ບໍ່ສະເພາະແຕ່ໃນຍາມທີ່ມີກິດຈະກຳ ເທົ່ານັ້ນ, ແຕ່ບັນດາທ່ານ ຍັງສາມາດປະກອບສ່ວນບໍລິຈາກເລືອດ ໄດ້ທຸກວັນ ບໍ່ເວັ້ນວັນພັກທາງ ລັດຖະການ, ພຽງແຕ່ທ່ານມີອາຍຸ 18 ປີຂຶ້ນໄປ, ມີນ້ຳໝັກ 45 ກິໂລຂຶ້ນໄປ, ມີສຸຂະພາບຮ່າງກາຍແຂງແຮງ ກໍສາມາດມາຮ່ວມບໍລິຈາກເລືອດໄດ້ ທີ່ສະຖາບັນເລືອດແຫ່ງຊາດ ຫລື ສູນເລືອດແຂວງ ທີ່ໃກ້ບ້ານທ່ານ ໃນຂອບເຂດທົ່ວປະເທດ ເພາະການໃຫ້ເລືອດແມ່ນການໃຫ້ຊີວິດ, ຊ່ວຍເຫລືອເພື່ອນມະນຸດດ້ວຍກັນ ເຊິ່ງໜຶ່ງໃນນັ້ນ, ອາດເປັນຍາດພີ່ນ້ອງ ຫລື ຄົນທີ່ທ່ານຮັກ ແລະ ນອກຈາກເປັນການ ຮ່ວມສ້າງບຸນກຸສົນແລ້ວ ຍັງເປັນການປະຕິບັດໜ້າທີ່ ພັນທະຂອງພົນລະເມືອງລາວ ແລະ ໜ້າທີ່ທາງດ້ານມະນຸດສະທຳ ຕື່ມອີກ.
ຂໍ້ມູນ-ພາບ: ວຽງຈັນໃໝ່
KPL
