ຂປລ
ຂປລ. ເມື່ອບໍ່ດົນມານີ້, ທະນາຄານແຫ່ງ ສປປ ລາວ (ທຫລ) ຈັດກອງປະຊຸມພົບປະສອງຝ່າຍລະຫວ່າງ ທ່ານ ສັນຕິພາບ ພົມວິຫານ ລັດຖະມົນຕີກະຊວງ ການເງິນ
ຂປລ. ເມື່ອບໍ່ດົນມານີ້, ທະນາຄານແຫ່ງ ສປປ ລາວ (ທຫລ) ຈັດກອງປະຊຸມພົບປະສອງຝ່າຍລະຫວ່າງ ທ່ານ ສັນຕິພາບ ພົມວິຫານ ລັດຖະມົນຕີກະຊວງ ການເງິນ ພ້ອມຄະນະ ແລະ ທ່ານ ອາລຸນ ບຸນຍົງ ຮອງຜູ້ວ່າການທະນາຄານແຫ່ງ ສປປ ລາວ ພ້ອມຄະນະ ເພື່ອສືບຕໍ່ປະສານງານລະຫວ່າງ ສອງຂະແໜງການ, ສືບຕໍ່ແກ້ໄຂຂໍ້ຫຍຸ້ງຍາກ ດ້ານການປະສານງານ ແລະ ຮ່ວມກັນປະຕິບັດໜ້າທີ່ ການ ເມືອງໃນການຈັດຕັ້ງປະຕິບັດແຜນງົບປະມານ ແລະ ແຜນເງິນຕາ ທີ່ກໍານົດໄວ້ໃນປີ 2025 ໃຫ້ມີຜົນສໍາເລັດ.
ກອງປະຊຸມ ໄດ້ຮັບຟັງການລາຍງານ ຄວາມຄືບໜ້າຜົນການຈັດຕັ້ງປະຕິບັດ ວຽກງານຮ່ວມກັນຂອງທັງສອງຂະແໜງການ ຕາມຜົນຂອງກອງປະຊຸມໃນຄັ້ງຜ່ານມາ, ພ້ອມທັງໄດ້ປຶກສາຫາລື, ແລກ ປ່ຽນຄວາມຄິດເຫັນກ່ຽວກັບການຈັດຕັ້ງປະຕິບັດວຽກງານຈໍານວນໜຶ່ງ ເປັນຕົ້ນ ການຈັດຕັ້ງປະຕິບັດ ການລວມສູນງົບປະມານແຫ່ງລັດ ຜ່ານບັນຊີລວມສູນຄັງເງິນແຫ່ງຊາດ ຢູ່ ທຫລ (TSA); ການຈັດຕັ້ງປະຕິບັດ ການຈັດເກັບລາຍຮັບງົບປະມານແຫ່ງລັດ ເປັນເງິນກີບ; ການສໍາຮອງເງິນຕາຕ່າງປະເທດຂອງ ທຫລ ໃຫ້ກະຊວງການເງິນ; ການຈັດຕັ້ງປະຕິບັດ ການດັດສົມສິນຄ້ານໍາເຂົ້າ ແລະ ຫົວໜ່ວຍນໍາເຂົ້າ, ແລະ ບັນຫາອື່ນໆ.
ນອກຈາກນີ້, ທັງສອງຝ່າຍຍັງໄດ້ສຸມໃສ່ ການຄົ້ນຄວ້າພິຈາລະນາ ແລະ ປະກອບຄໍາຄິດເຫັນ ຕໍ່ກັບບັນຫາຕ່າງໆ ເຮັດໃຫ້ກອງປະຊຸມ ໄດ້ຮັບຜົນສໍາເລັດຕາມຄາດໝາຍທີ່ວາງໄວ້ ແລະ ຈະພ້ອມກັນສືບຕໍ່ນໍາໄປຈັດຕັ້ງຜັນຂະຫຍາຍ ເຂົ້າສູ່ພາກປະຕິບັດຕົວຈິງໃນຕໍ່ໜ້າ ໃຫ້ເກີດໝາກຜົນໃນແຕ່ລະດ້ານ ແລະ ມີປະສິດທິຜົນສູງ.
ຂໍ້ມູນຈາກ: ທຫລ
KPL
