ຂປລ. ໃນປີ 2024 ຜ່ານມາ, ການຈັດຕັ້ງປະຕິບັດກິດຈະກຳປີທ່ອງທ່ຽວລາວ ຢູ່ນະຄອນ ຫລວງວຽງຈັນ (ນວ) ໄດ້ມີຜົນສຳເລັດຕາມລະດັບຄາດໝາຍ, ສາມາດດຶງດູດນັກທ່ອງທ່ຽວ ຕ່າງປະ ເທດ ເຂົ້າມາທ່ອງທ່ຽວ ຢູ່ນະຄອນຫລວງວຽງຈັນ ຈໍານວນ 1,7 ລ້ານກວ່າເທື່ອຄົນ, ສ້າງລາຍຮັບທົ່ວສັງຄົມຈາກການທ່ອງທ່ຽວ ໄດ້ 490 ລ້ານກວ່າໂດລາສະຫະລັດ.

ທ່ານ ນາງ ວຽງພອນ ແກ້ວຄູນສີ ຫົວໜ້າພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວ ນວ ໄດ້ໃຫ້ຮູ້ ໃນກອງປະຊຸມສະຫລຸບວຽກງານການຈັດຕັ້ງປະຕິບັດ ກິດຈະກຳປີທ່ອງທ່ຽວລາວ 2024 ໃນວັນທີ 5 ກຸມພາ 2025 ນີ້ວ່າ: ໃນປີ 2024 ຜ່ານມາ, ນະຄອນຫລວງວຽງຈັນ ໄດ້ສຸມໃສ່ຈັດຕັ້ງປະຕິບັດກິດຈະກຳປີທ່ອງທ່ຽວລາວ 2024 ຢ່າງມີຜົນສຳເລັດ, ຜ່ານກິດຈະກຳຕ່າງໆ ເຊິ່ງສາ ມາດດຶງດູດນັກທ່ອງທ່ຽວຕ່າງປະເທດ ເຂົ້າມາທ່ອງທ່ຽວ ຢູ່ນະຄອນຫລວງວຽງຈັນ ໄດ້ທັງໝົດ 1,7 ລ້ານກວ່າເທື່ອຄົນ, ທຽບໃສ່ປີ 2023 ເພີ່ມຂຶ້ນ 30,45%, ສ້າງລາຍຮັບທົ່ວສັງຄົມຈາກການທ່ອງທ່ຽວ ໄດ້ 490 ລ້ານກວ່າໂດລາສະຫະລັດ, ທຽບໃສ່ປີ 2023 ເພີ່ມຂຶ້ນ 39,88%, ໄດ້ກຳນົດກິດຈະກຳສົ່ງເສີມການທ່ອງທ່ຽວ, ບຸນປະເພນີຕ່າງໆລະດັບຊາດ, ລະດັບນະຄອນຫລວງ ແລະ ເມືອງ ເພື່ອສ້າງເປັນປະຕິທິນປີທ່ອງທ່ຽວ ໃນປີທ່ອງທ່ຽວລາວ 2024 ໂດຍກຳນົດ ກິດຈະກຳບຸນປະເພນີ ລະດັບຊາດ  2 ກິດຈະກຳ, ປະຕິບັດໄດ້ 100%, ກິດຈະກຳບຸນປະເພນີ ລະດັບນະຄອນຫລວງ ແລະ ເມືອງ ມີ 8 ກິດຈະກຳ, ທຽບໃສ່ແຜນການ ເພີ່ມຂຶ້ນ 4 ກິດຈະກຳ, ກິດຈະກຳງານນິທັດສະການ ແລະ ວາງສະແດງ ມີ 6 ກິດຈະກຳ, ເພີ່ມຂຶ້ນ 2 ກິດຈະກຳ (ເພີ່ມຂຶ້ນ 50%), ກິດຈະກຳສົ່ງເສີມການທ່ອງທ່ຽວທາງກົງ (ບໍລິການ ແລະ ສົ່ງເສີມການທ່ອງທ່ຽວ) ມີ 6 ກິດຈະກຳ, ເພີ່ມຂຶ້ນ 3 ກິດຈະກຳ, ກິດຈະກຳວາງສະແດງ ຜະລິດຕະພັນການທ່ອງທ່ຽວ ຮ່ວມກັບປະເທດເພື່ອນມິດຍຸດທະສາດ ໄດ້ 2 ຄັ້ງ, ປະສານສົມທົບ ແລະ ຊຸກຍູ້ພາກທຸລະກິດພາຍໃນລົງທຶນພັດທະນາ ແລະ ເປີດແຫລ່ງທ່ອງທ່ຽວໃໝ່ ໄດ້ 2 ແຫ່ງ, ລວມມີ 3 ກິດຈະກຳ. ນອກນີ້, ຍັງໄດ້ຈັດງານ “ວັນມົດສະກູ” ຢູ່ນະຄອນຫລວງວຽງຈັນ. ພ້ອມກັນນີ້, ຍັງໄດ້ປັບປຸງສິ່ງອໍານວຍຄວາມສະດວກຢູ່ສະຖານທີ່ທ່ອງທ່ຽວ, ຫ້ອງນໍ້າສາທາລະນະ, ການຈັດ ການສິ່ງເສດເຫລືອ-ຂີ້ເຫຍື້ອ, ຍົກລະດັບຄຸນນະພາບການບໍລິການ, ເອົາໃຈໃສ່ປະເມີນມາດຕະຖານການທ່ອງທ່ຽວອາຊຽນ, ປະດັບປະດາຮັກສາຄວາມສະອາດບັນດາ ສະຖານທີ່ພັກ ແຮມ-ຮ້ານອາຫານ, ຈັດຕັ້ງຝຶກອົບຮົມໃຫ້ພະນັກງານບໍລິການຢູ່ຮ້ານອາຫານ, ສະຖານທີ່ພັກແຮມ, ສະຖານທີ່ທ່ອງທ່ຽວ ແລະ ພະນັກງານນໍາທ່ຽວໃຫ້ມີຄຸນນະພາບດີ, ພ້ອມທັງໄດ້ເອົາໃຈໃສ່ໂຄສະນາຜ່ານສື່ຕ່າງໆ ຂອງນະ ຄອນຫລວງ, ສື່ຂັ້ນສູນກາງ ແລະ ສື່ສັງຄົມ ຜ່ານຊ່ອງທາງ ວິທະຍຸ, ໂທລະພາບ, ໜັງສືພິມ, ສື່ອອນລາຍ ແລະ ພາບວິດີໂອ ຜ່ານຈໍ LED ເພື່ອໃຫ້ປະຊາຊົນ ນະຄອນຫລວງວຽງຈັນ, ນັກທ່ອງທ່ຽວ ໄດ້ຮັບຮູ້, ພ້ອມກັນເປັນເຈົ້າພາບທີ່ດີຕ້ອນຮັບນັກທ່ອງທ່ຽວທີ່ຈະເຂົ້າມາທ່ອງທ່ຽວ ຢູ່ນະຄອນຫລວງວຽງຈັນ ກໍຄື ເຂົ້າຮ່ວມບັນດາກອງປະຊຸມສໍາຄັນ ຂອງບັນດາປະເທດ ສະມາຊິກອາຊຽນ.

ທ່ານນາງ ວຽງພອນ ແກ້ວຄູນສີ ຍັງໃຫ້ຮູ້ອີກວ່າ: ໃນປີ 2024 ການລົງທຶນເຂົ້າໃນພື້ນຖານໂຄງລ່າງສ້າງສິ່ງຮອງຮັບດ້ານການທ່ອງທ່ຽວ ຂອງນັກລົງທຶນ ພາຍໃນ ແລະ ຕ່າງປະເທດ ມີຈຳນວນ 137 ຫົວໜ່ວຍ, ມູນຄ່າການລົງທຶນ 1.497 ຕື້​ກວ່າກີບ. ສຳລັບ ທິດທາງແຜນການ ໃນປີ 2025 ຈະສຸມໃສ່ ບຸນປະເພນີ ແລະ ກິດຈະກຳສົ່ງເສີມການທ່ອງທ່ຽວ ຕິດພັນກັບວັນສໍາຄັນ ຂອງຊາດ, ຂອງພັກ ທັງໝົດ 16 ກິດຈະກຳ. ໃນນີ້, ບຸນປະເພນີ ແລະ ກິດຈະກຳລະດັບຊາດ 5 ກິດຈະກຳ. ພ້ອມທັງ ຄົ້ນຄວ້າຜະລິດເຄື່ອງທີ່ລະນຶກ ທີ່ເປັນເອກະລັກ ຂອງນະຄອນຫລວງວຽງຈັນ ຕື່ມອີກ.

ຂ່າວ: ທະນູທອງ

ພາບ: ຂັນໄຊ

KPL