*ກອງບັນຊາການປກສແຂວງເຊກອງໄດ້ຍົກສູງປະສິດທິພາບດ້ານການຄຸ້ມຄອງ, ຊີ້ນໍາ-ບັນຊາການຈັດຕັ້ງປະຕິບັດຮອບດ້ານ ໃນວຽກງານແກ້ໄຂບັນຫາຢາເສບຕິດ ໂດຍຍຶດໝັ້ນ 3 ຫລັກການ ຄື: ຄວາມເດັດຂາດ, ໂປ່ງໃສ ແລະ ເປັນມືອາຊີບ. ທ່ານ ພົນຈັດຕະວາ ຄໍາບານ ພົມມະນີວົງ ຫົວໜ້າກອງບັນຊາການ ປກສ ແຂວງເຊກອງ ລາຍຕໍ່ກອງປະສະໄໝສາມັນ ເທື່ອທີ 8 ຂອງສະພາປະຊາຊົນ ແຂວງເຊກອງ ຊຸດທີ II ເມື່ອບໍ່ດົນມານີ້ວ່າ:ໃນປີ 2024 ຜ່ານມາ, ສາມາດເລີກຮື້ແກ້ໄຂມ້າງລາຍຄະດີຢາເສບຕິດໄດ້ 59 ເລື່ອງ, ຈັບຜູ້ຖືກຫາໄດ້ 59 ຄົນ ແລະ ຢຶດຂອງກາງປະເພດຢາບ້າໄດ້ 46.264 ເມັດ.ພ້ອມນັ້ນ ຍັງໄດ້ສ້າງບ້ານປ້ອງກັນຄວາມສະຫງົບດີ ໄດ້ 122 ບ້ານ, ບ້ານປອດຢາເສບຕິດ 48 ບ້ານ, ຄອບຄົວປອດຢາເສບຕິດ 1.111 ຄອບຄົວ ແລະ ສ້າງໂຮງຮຽນປອດຢາເສບຕິດ 248 ແຫ່ງ.

      ນອກນີ້, ຍັງໄດ້ເຄື່ອນໄຫວເກັບກໍາຂໍ້ມູນ, ຂຶ້ນບັນຊີເປົ້າໝາຍຄ້າ-ຂາຍຢາເສບຕິດລາຍຍ່ອຍ, ລາຍກາງ ແລະ ລາຍໃຫຍ່, ເຄື່ອນໄຫວເຜີຍແຜ່ກົດໝາຍ ແລະ ຜົນຮ້າຍຢາເສບຕິດຕາມສະຖານການສຶກສາ ຮ່ວມມືກັບປະເທດເພື່ອນມິດຍຸດທະສາດ ສສ ຫວຽດນາມ ໂດຍສະເພາະ ບັນດາແຂວງທີ່ມີຊາຍແດນຕິດຈອດ ແລະ ນໍາເອົາກໍາລັງ ປກສ ແຂວງ-ປກສ ເມືອງໄປປະຈໍາຢູ່ຈຸດຫລໍ່ແຫລມຕ່າງໆຂອງແຂວງ.

   ທ່ານ ພົນຈັດຕະວາ ຄໍາບານ ພົມມະນີວົງ ໃຫ້ຮູ້ອີກວ່າ: ເພື່ອເຮັດໃຫ້ການປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດໃນຕໍ່ໜ້າມີປະສິດທິພາບ ແລະ ປະສິດທິຜົນ, ປກສ ແຂວງ ຈະເອົາໃຈໃສ່ປັບປຸງກົງຈັກການຈັດຕັ້ງກຳລັງ ປກສ ແຕ່ລະຂັ້ນ ໃຫ້ມີຄວາມເຂັ້ມແຂງ ຕິດພັນກັບການສຶກສາອົບຮົມການເມືອງ-ແນວຄິດ, ມີຈັນຍາບັນ-ຈັນຍາທຳ ແລະ ເຮັດໜ້າທີ່ດ້ວຍຄວາມເສຍສະຫລະ ເພື່ອຊາດ-ເພື່ອປະຊາຊົນ, ສືບຕໍ່ໂຄສະນາເຜີຍແຜ່ກົດໝາຍ, ຜົນຮ້າຍ ແລະ ຄວາມອັນຕະລາຍຂອງຢາເສບຕິດໃຫ້ທົ່ວສັງຄົມໄດ້ຮັບຮູ້, ເຂົ້າໃຈ ແລະ ເຫັນໄດ້ຄວາມອັນຕະລາຍຮ້າຍແຮງ ຂອງຢາເສບຕິດ ພ້ອມທັງປຸກລະດົມອົງການປົກຄອງທ້ອງຖິ່ນ ກໍຄືປະຊາຊົນບັນດາເຜົ່າສ້າງຄວາມເຂັ້ມແຂງໃຫ້ສະຖາບັນຄອບຄົວເປັນເຈົ້າການເຂົ້າຮ່ວມ ໃນການແກ້ໄຂບັນຫາຢາເສບຕິດ, ສ້າງຄອບຄົວ-ບ້ານປອດຢາເສບຕິດ ໃຫ້ໄດ້ຕາມມາດຖານເງື່ອນໄຂ ແລະ ເປົ້າໝາຍແຜນການທີ່ວາງໄວ້.

ບົດ+ພາບໂດຍ: ສັນຍາ

KPL