*ວັນທີ 2-3 ມັງກອນ 2025 ພະແນກຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ແຂວງຈໍາປາສັກ ສົມທົບພາກສ່ວນກ່ຽວຂ້ອງຂອງເມືອງໂພນທອງ, ບ້ານນາຫວ້າ ຮ່ວມກັບທີມງານວິຊາການຈາກບໍລິສັດ Green Discovery ແລະ ນັກຖ່າຍພາບໂຄສະ ນາການທ່ອງທ່ຽວ ໄດ້ຮ່ວມເດີນທາງສຳຫລວດ ແລະ ເກັບກຳຂໍ້ມູນເຂດພູມະໂລງ ເມືອງໂພນທອງ ແຂວງຈຳປາສັກ ເຂົ້າຮ່ວມເດີນທາງໃນຄັ້ງນີ້ໂດຍມີ  ທ່ານ ປອ ວັນນະໄຊ ຊາດຕະກຸນ ກຳມະການພັກແຂວງ ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງຈຳປາສັກ. 

   ຈຸດປະສົງເພືອເປັນການສຳຫລວດ ແລະ ເກັບກຳຂໍ້ມູນເບື້ອງຕົ້ນ ໃນການຂຽນແຜນພັດທະນາເສັ້ນທາງຍ່າງປ່າເຂດພູມະໂລງ ເມືອງໂພນທອງ ແຂວງຈຳປາສັກ ເພື່ອຈະກຳນົດເປັນກິດຈະກຳ ການທ່ອງທ່ຽວຍ່າງປ່າທຳມະຊາດ ແບບປະຊາຊົນມີສ່ວນຮ່ວມ ສຳລັບກຸ່ມທ່ອງທ່ຽວສະເພາະທີ່ມັກການທ່ອງທ່ຽວໃນຮູບແບບດັ່ງກ່າວ. 

    ເຊິ່ງໄດ້ກຳນົດເອົາເສັ້ນທາງຈາກບ້ານນາຫວ້າ ເມືອງໂພນທອງ ເປັນຈຸດເລີ່ມຕົ້ນການເດີນທາງໃນໄລຍະທາງໄປ-ກັບທັງໝົດ 15,4 ກິໂລແມັດ ກຳນົດເວລາ 2 ວັນ 1 ຄືນ ຜ່ານການເດີນທາງເຫັນວ່າເສັ້ນທາງດັ່ງກ່າວມີປ່າໄມ້ຫລາຍປະເພດ ທີ່ຍັງຄົງຄວາມອຸດົມສົມບູນ ມີຫ້ວຍນໍ້າທຳມະຊາດທີ່ສວຍງາມຫລາຍສາຍ, ມີພື້ນທີ່ສຳລັບເປັນບ່ອນຕັ້ງເຕັ້ນນອນທີ່ເໝາະສົມ ແລະ ມີຈຸດຊົມວິວຫລາຍບ່ອນທີ່ສວຍງາມ ໂດຍສະເພາະຈຸດສູງສຸດຂອງຈອມພູມະໂລງ ສາມາດແນມເຫັນທິວທັດທີ່ສວຍງາມຂອງນະຄອນປາກເຊ ແລະ ມູມ 360 ອົງສາຂອງແຂວງຈໍາປາສັກ  ໂດຍເຫັນວ່າເສັ້ນທາງທ່ອງທ່ຽວພູມະໂລງນີ້ ມີຄວາມເປັນໄປໄດ້ໃນການເປີດໃຫ້ ບໍລິການນັກທ່ອງທ່ຽວກຸ່ມນັກຍ່າງປ່າພະຈົນໄພ  ທັງຍັງເປັນທ່າແຮງທີ່ສາມາດຈັດກິດຈະກຳທ່ອງທ່ຽວພິຊິດຈອມພູມະໂລງ ທີ່ໄກ້ກັບເທດສະບານຂອງແຂວງຈໍາປາສັກທີ່ສຸດ ທີ່ສາມາດກໍານົດເປັນລາຍການທ່ອງທ່ຽວຍ່າງປ່າທຳມະຊາດອີກແຫ່ງໜື່ງຢູ່ແຂວງຈຳປາສັກ ໂດຍການມີສ່ວນຮ່ວມຂອງປະຊາຊົນໃນຊຸມຊົນ ໃນເຂດບ້ານນາຫວ້າ ແລະ ບ້ານໃກ້ຄຽງໄດ້ໃນອະນາຄົດ.

    ເຊິ່ງຈະສ້າງລາຍຮັບ ແລະ ມີຜົນປະໂຫຍດໃຫ້ແກ່ປະຊາຊົນໃນເຂດດັ່ງກ່າວ ທັງເປັນການປູກຈິດສຳນຶກໃຫ້ປະຊາຊົນຮັກ ແລະ ປົກປັກຮັກສາປ່າໄມ້ທີ່ອຸດົມສົມບູນ ທີ່ເປັນຊັບພະຍາກອນທາງທໍາມະຊາດທີ່ສວຍງາມນີ້ໄວ້ຄຽງຄູ່ກັບການຊຸກຍູ້ສົ່ງເສີມສ້າງວຽກເຮັດງານທຳເປັນພະນັກງານນໍາທ່ຽວ ແລະ ບໍລິການປິ່ນອ້ອມການທ່ອງທ່ຽວໄລຍະຍາວ.  ອັນຈະເປັນການໂຄສະນາສົ່ງເສີມການທ່ອງທ່ຽວທາງທໍາມະຊາດ ທັງແຂກພາບໃນ ແລະ ຕ່າງປະເທດຫລາຍຂຶ້ນ ປະກອບສ່ວນອັນສຳຄັນໃນການປະຕິບັດວາລະຂອງແຂວງ ວ່າດ້ວຍການແກ້ໄຂຄວາມຫຍຸ້ງຍາກ ໃນການພັດທະນາການທ່ອງທ່ຽວ ປີ 2024-2025 ໃຫ້ມີຜົນສຳເລັດຕາມຄາດຫມາຍ.