*ສປປ ລາວ ແມ່ນໜຶ່ງໃນບັນດາ 10 ປະເທດສະມາຊິກອາຊຽນ ທີ່ໄດ້ຮັບການຊ່ວຍເຫລືອຈາກບັນດາປະເທດບ້ານໄກ້ເຮືອນຄຽງ, ເພື່ອນມິດສາກົນ ແລະ ອົງການຈັດຕັ້ງຕ່າງໆ ເພື່ອປະກອບສ່ວນເຂົ້າໃນການພັດທະນາເສດຖະກິດ- ສັງ ຄົມ, ສ້າງວຽກເຮັດງານທໍາ ແລະ ແກ້ໄຂຄວາມທຸກຍາກຢ່າງຕັ້ງໜ້າ. ຫລ້າສຸດ ປະເທດຍີ່ປຸ່ນກຳລັງເພີ່ມຄວາມພະຍາຍາມໃນການສະໜອງສະບຽງອາຫານສຸກເສີນ ເພື່ອໃຊ້ໃນການບັນເທົາທຸກໃຫ້ແກ່ ເຂດພື້ນທີ່ມີຄວາມສ່ຽງໄພພິບັດໃນ ສປປ ລາວ ຊຶ່ງໄດ້ລົງນາມໃນຂໍ້ຕົກລົງວ່າດ້ວຍການສະໜັບສະໜູນທ່ີຈຳເປັນ ໂດຍສະບຽງອາຫານສຸກເສີນຈະຖືກມອບໃຫ້ແກ່ກະຊວງແຮງງານ ແລະ ສະຫວັດດີການສັງຄົມ (ຮສສ) ໃນຖານະທີ່ເປັນອົງການແຫ່ງຊາດຮັບຜິດຊອບ ໃນການຄຸ້ມຄອງການບັນເທົາທຸກຈາກໄພພິບັດ ແລະ ປັບປຸງສະຫວັດດີການສັງຄົມ ຜ່ານອົງການອາຫານ ໂລກແຫ່ງສະຫະປະຊາຊາດ (WFP) ປະຈໍາ ສປປ ລາວ ເປັນຜູ້ປະສານງານການກໍານົດເປົ້າໝາຍ ແລະ ການແຈກຢາຍໃນເວລາສຸກເສີນ.

    ພິທີລົງນາມຂໍ້ຕົກລົງວ່າດ້ວຍການສະໜັບສະໜູນທີ່ຈໍາເປັນຕ່ໍການບັນເທົາທຸກຈາກໄພພິບັດ ແລະ ຄວາມໝັ້ນຄົງທາງດ້ານສະບຽງອາຫານຂອງ ສປປ ລາວ ເພື່ອເປັນບ່ອນອີງໃນການຈັດຕັ້ງປະຕິບັດວຽກງານຂ້າງເທິງນັ້ນ ໄດ້ຈັດຂຶ້ນໃນວັນທີ 4 ທັນວານີ້ ທີ່ສຳນັກງານ WFP ປະຈໍາ ສປປ ລາວ ໂດຍການລົງນາມລະຫວ່າງ ທ່ານ ຊຸໂຕມຸ ໂກອິຊູມິ ເອກອັກຄະຣາຊະທູດວິສາມັນຜູ້ມີອຳນາດເຕັມ ແຫ່ງ ຣາຊະອານາຈັກຍີ່ປຸ່ນ ປະຈໍາ ສປປ ລາວ ແລະ ທ່ານ ມາກ-ອານເດຣ ໂປຣສ ຜູ້ຕາງໜ້າອົງການອາຫານໂລກ ປະຈຳ ສປປ ລາວ ຊຶ່ງມີ ທ່ານ ລີປາວຢາງ ຮອງລັດຖະມົນຕີກະຊວງ ຮສສ ເປັນສັກຂີພິຍານ ໂດຍມີທຸກພາກສ່ວນທີ່ກ່ຽວຂ້ອງ ເຂົ້າຮ່ວມ. ການລົງນາມຂໍ້ຕົກລົງຄັ້ງນີ້ມີຄວາມໝາຍສຳຄັນຫລາຍ ຊຶ່ງເປັນການສືບຕໍ່ຈາກການຈັດຕັ້ງປະຕິບັດໂຄງການຊ່ວຍເຫລືອໃຫ້ແກ່ຜູ້ດ້ອຍໂອກາດ ແລະ ຜູ້ປະສົບໄພພິບັດ ທີ່ຍັງບໍ່ທັນສາມາດເຂົ້າເຖິງໂຄງການສະບຽງອາຫານໃນປີຜ່ານມາ; ການຊ່ວຍເຫລືອດັ່ງກ່າວນີ້ ກໍເປັນການປະກອບສ່ວນໃຫ້ແກ່ການຈັດຕັ້ງປະຕິບັດເປົ້າໝາຍທີ 4 ແລະ ແຜນວຽກຈຸດສຸມທີ 3 ຂອງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX (2021-2025) ແລະ ເປັນການປະກອບສ່ວນການຈັດຕັ້ງປະຕິບັດເປົ້າໝາຍຍຸດທະສາດການຫລຸດຜ່ອນຄວາມສ່ຽງໄພພິບັດແຫ່ງຊາດ (2021-2030) ເວົ້າລວມ, ເວົ້າສະເພາະແມ່ນເປັນການຊ່ວຍເຫລືອໂດຍກົງ ໃຫ້ແກ່ປະຊາຊົນທີ່ປະສົບໄພພິບັດໃນປີຜ່ານມາ ໃຫ້ສາມາດປັບປຸງຊີວິດການເປັນຢູ່ຂອງເຂົາເຈົ້າ ໄດ້ກັບສູ່ສະພາບປົກກະຕິໂດຍໄວ.

    ການຊ່ວຍເຫລືອດ້ານສະບຽງອາຫານສຸກເສີນ ແລະ ການຟື້ນຟູໃຫ້ແກ່ຊຸມຊົນທີ່ມີຄວາມສ່ຽງທີ່ໄດ້ຮັບຜົນກະທົບຈາກວິກິດການຕ່າງໆ ເຊັ່ນ ໄພນໍ້າຖ້ວມ ແລະ ການຂາດແຄນສະບຽງອາຫານ ເນື່ອງມາຈາກການເພີ່ມຂຶ້ນຂອງອັດຕາເງິນເຟີ້ ແລະ ການອ່ອນຄ່າລົງຂອງເງິນຕາພາຍໃນ ຊ່ຶງອົງການອາຫານໂລກມີແຜນທີ່ຈະຈັດຊື້ເຂົ້າສານຈຳນວນ 440 ໂຕນ ແລະ ປາກະປ໋ອງ 90 ໂຕນ ທີ່ຜະລິດຢູ່ຍີ່ປຸ່ນ ແລະ ສົມທົບກັບທາງການລາວ ເພື່ອແຈກຢາຍສະບຽງອາຫານໃຫ້ແກ່ປະຊາຊົນປະມານ 38.000 ຄົນ ທີ່ຖືກຜົນກະທົບຈາກໄພພິບັດ. ຍີ່ປຸ່ນມີສ່ວນສະໜັບສະໜູນຄວາມພະຍາຍາມຂອງ ສປປ ລາວ ໃນການກຽມຄວາມພ້ອມ ແລະ ຕອບສະໜອງສະຖານະການສຸກເສີນຢູ່ສະເໝີ ຊຶ່ງລວມເຖິງການຕອບສະໜອງຄວາມ ຕ້ອງການຮີບດ່ວນຂອງຊຸມຊົນທີ່ໄດ້ຮັບຜົນກະທົບຈາກໄພພິບັດ. ເງິນທຶນຈາກໂຄງການຊ່ວຍເຫລືອດ້ານສະບຽງອາຫານຂອງລັດຖະບານຍີ່ປຸ່ນ ເພື່ອຂໍ້ລິເລີ່ມນີ້ມີປະມານ 1,3 ລ້ານໂດລາ.

KPL