*ວັນທີ 29 ພະຈິກ 2024, ທ່ານ ທອງຜ່ານ ສະຫວັັນເພັດ, ຮອງລັດຖະມົນຕີກະຊວງການຕ່າງປະເທດ ໄດ້ນຳພາຄະນະເຂົ້າຮ່ວມກອງປະຊຸມທົບທວນສົນທິສັນຍາ ວ່າດ້ວຍການເກຶຶອດຫ້າມລະເບີດຝັງດີນຕ້ານບຸກຄົນ ຄັ້ງທີ 5 (The Fifth Review Conference of the Anti-Personal Mine Ban Convention), ທີ່ ສຽມລຽບ, ປະເທດ ກຳປູເຈຍ.

    ຈຸດປະສົງຂອງກອງປະຊຸມໃນຄັ້ງນິ້ ແມ່ນເພື່ອທົບທວນຄືນການຈັດຕັ້ງປະຕິບັດສົນທິສັນຍາໃນໄລຍະຫ້າປີຜ່ານມາ, ສົ່ງເສີມການຮ່ວມມືລະຫວ່າງປະເທດໃນການຕ້ານລະເບີດຝັງດີນຕ້ານບຸກຄົນ, ການແກ້ໄຂບັນຫາລະເບີດຝັງດິນ ກໍ່ຄືການກວດກູ້ລະເບີດບໍ່ທັນແຕກທີ່ຕົກຄ້າງ (ລບຕ), ການຊ່ວຍເຫຼືອຜູ້ຖືກເຄາະຮ້າຍ, ການໂຄສະນາສຶກສາທາງຄວາມສ່ຽງໄພຈາກ ລບຕ ແລະ ການສົ່ງເສີມການຮ່ວມມື ແລະ ການຊ່ວຍເຫຼືອສາກົນເພື່ອສືບຕໍ່ຈັດຕັ້ງປະຕິບັດສົນທິສັນຍາ ວ່າດ້ວຍການເກືອດຫ້າມລະເບີດຝັງດິນຕ້ານບຸກຄົນ ຫຼື Ottawa Convention ໃຫ້ບັນລຸຕາມຄາດໝາຍທີ່ວາງໄວ້. ກອງປະຊຸມໃນຄັ້ງນີ້, ໄດ້ມີປະເທດຜູ້ເຂົ້າຮ່ວມທັງໝົດ 164 ປະເທດໃນທົ່ວໂລກ. ເຊິ່ງໃນນັ້ນ, ມີຜູ້ແທນຂັ້ນສູງເຂົ້າຮ່ວມ 14 ປະເທດ ລວມທັງ ສປປ ລາວ (ໃນນາມປະເທດສັງເກດການ).

      ກອງປະຊຸມໃນຄັ້ງນີ້, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ ໄດ້ຂື້ນກ່າວບົດປາໄສໃນພາກກອງປະຊຸມລະດັບສູງ ໂດຍໄດ້ມີຄຳເຫັນໃນນາມປະເທດສັງເກດການສົນທິສັນຍາດັ່ງກ່າວ  ແລະ ແລກປ່ຽນບົດຮຽນການແກ້ໄຂບັນຫາລະເບີດບໍ່ທັນແຕກຂອງ ສປປ ລາວ ທີ່ຍັງເປັນໄພຂົ່ມຂູ່ຕໍ່ຊີວິດຂອງປະຊາຊົນ ແລະ ຂັດຂວາງການພັດທະນາເສດຖະກິດ-ສັງຄົມ. ເຖິງວ່າ ສປປ ລາວ ຍັງບໍ່ທັນເຂົ້າເປັນພາຄີຂອງສົນທິສັນຍາ ວ່າດ້ວຍລະເບີດຝັງດິນຕ້ານບຸກຄົນ ແຕ່ລັດຖະບານລາວ ກໍ່ເລັງເຫັນເຖິງຄວາມສຳຄັນ ແລະ ສະໜັບສະໜູນທາງດ້ານເປົ້າໝາຍລວມຂອງສົນທິສັນຍາກໍ່ຄື ການສະໜັບສະໜູນທາງດ້ານມະນຸດສະທຳ ເພື່ອຮັບປະກັນຊີວິດ ແລະ ການດຳລົງຊີວິດຂອງປະຊາຊົນໃຫ້ປອດໄພຈາກຜົນກະທົບຂອງສິ່ງເສດເຫລືອປາງສົງຄາມ ໂດຍໄດ້ສືບຕໍ່ພະຍາຍາມຈັດຕັ້ງບາງເນື້ອໃນຂອງສົນທິສັນຍາດັ່ງກ່າວ ພ້ອມທັງໄດ້ສົ່ງຜູ້ແທນຂັ້ນສູງ ແລະ ຂັ້ນວິຊາການເຂົ້າຮ່ວມກອງປະຊຸມຕາມການເຊື້ອເຊີນ ຢ່າງສະໝໍ່າສະເໝີ ແລະ ຊ່ວຍໂຄສະນາເຖິງຜົນກະທົບອັນຮ້າຍແຮງຂອງອາວຸດດັ່ງກ່າວເປັນປະຈຳ.

     ນອກຈາກການເຂົ້າຮ່ວມກອງປະຊຸມແລ້ວ, ຄະນະຜູ້ແທນ ສປປ ລາວ ຍັງໄດ້ພົບປະສອງຝ່າຍຮ່ວມກັບຫລາຍພາກສ່ວນ ເພື່ອແລກປ່ຽນທັດສະນະໃນການສົ່ງເສີມວຽກງານການແກ້ໄຂບັນຫາລະເບີດບໍ່ທັນແຕກ, ການຈັດຕັ້ງປະຕິບັດພັນທະຕໍ່ບັນດາສົນທິສັນຍາສາກົນຕ່າງໆ, ແລະ ສືບຕໍ່ຂົນຂວາຍ ຂະຫຍາຍການຮ່ວມມືກັບຄູ່ຮ່ວມພັດທະນາຕ່າງໆໃນການໃຫ້ການຊ່ວຍເຫລືອ ສປປ ລາວ ຈັດຕັ້ງປະຕິບັດການແກ້ໄຂບັນຫາລະເບີດບໍ່ທັນແຕກໃຫ້ມີປະສິດທິພາບ ແລະ ປະສິດທິຜົນດີຂື້ນເປັນກ້າວໆ.