ຂປລ
ລັດຖະບານ ບຣາຊິນ ສູ້ຊົນໃຫ້ບັນລຸເປົ້າໝາຍ ຫລຸດການປ່ອຍ ອາຍແກັສເຮືອນແກ້ວລົງ 67% ພາຍໃນປີ 2035, ໂດຍສູງກວ່າ ເປົ້າໝາຍເດີມທີ່ກຳນົດໄວ້ ກ່ອນໜ້ານີ້ ລະດັບ 59% ຈາກປີ 2005.
ຂປລ.ສຳນັກຂ່າວ ເອເອຟພີ, ລັດຖະບານ ບຣາຊິນ ສູ້ຊົນໃຫ້ບັນລຸເປົ້າໝາຍ ຫລຸດການປ່ອຍ ອາຍແກັສເຮືອນແກ້ວລົງ 67% ພາຍໃນປີ 2035, ໂດຍສູງກວ່າ ເປົ້າໝາຍ ເດີມທີ່ກຳນົດໄວ້ ກ່ອນໜ້ານີ້ ລະດັບ 59% ຈາກປີ 2005. ການປ່ຽນແປງດັ່ງກ່າວ ມີເປົ້າໝາຍ ເພື່ອເຮັດໃຫ້ເປົ້າໝາຍ ການປ່ອຍອາຍແກັສ ເຮືອນແກ້ວຂອງບຣາຊິນ ຊຶ່ງເອີ້ນວ່າ “ການມີ ສ່ວນຮ່ວມທີ່ປະເທດກຳນົດ” ຫລື ເອັນດີຊີ ສອດຄອງກັບຂໍ້ຕົກລົງ ປາຣີ ສະບັບປີ 2015.
ເຖິງວ່າຜູ້ລົງນາມໃນຂໍ້ຕົກລົງປາຣີມີເວລາຈົນເຖິງເດືອນກຸມພາປີ 2025 ໃນການປະກາດເປົ້າໝາຍໃໝ່ ຂອງການປ່ອຍອາຍແກັສ ເຮືອນແກ້ວ ແຕ່ບຣາຊິນ ຈະນໍາສະເໜີເປົ້າໝາຍ ເອັນດີຊີ ຂອງຕົນເອງ ໃນກອງປະຊຸມ ດ້ານສະພາບອາກາດ ລະດັບໂລກ “ຄອບ29”ໃນນະຄອນຫລວງ ບາກູ ປະເທດ ອາແຊກໄບຊານ ໄດ້ຈັດຂຶ້ນໃນວັນທີ 11 ພະຈິກນີ້.
ໂດຍເປົ້າໝາຍໃໝ່ຂອງ ບຣາຊິນ ຈະຊ່ວຍຫລຸດການ ປ່ອຍອາຍແກັສກາກບອນ ໄດອອກໄຊປະມານ 850-1.000 ລ້ານໂຕນ ພາຍໃນປີ 2035, ຊຶ່ງຫລຸດລົງຈາກ 2.400 ລ້ານໂຕນ ໃນປີ 2005. ໂດຍເອັນດີຊີໃໝ່ນີ້ ຄວບຄຸມທຸກພາກສ່ວນຂອງ ເສດຖະກິດ ແລະ ສອດຄອງກັບເປົ້າໝາຍ ຂອງຂໍ້ຕົກລົງ ປາຣີ ສະບັບປີ 2015. ພ້ອມທັງ ບຣາຊິນ ຈະບັນລຸເປົ້າໝາຍ ຄວາມເປັນກາງ ດ້ານສະພາບອາກາດ ພາຍໃນປີ 2050 ອີກດ້ວຍ./.
KPL
