ຂປລ
ທ່ານ ວາງຢີ້, ກຳມະການ ກົມການເມືອງ ສູນກາງພັກ ກອມມູນິດຈີນ, ຫົວໜ້າຫ້ອງວ່າການ ຄະນະກຳມະການ ວຽກງານ ການຕ່າງປະເທດ ຂອງຄະນະກຳມະການ ສູນກາງພັກ ກອມມູນິດຈີນ ແລະ ທ່ານ ເຊີເກ ຊອຍກູ ເລຂາທິການ ສະພາຄວາມໝັ້ນຄົງ ແຫ່ງສະຫະພັນ ຣັດເຊຍ ໄດ້ຮ່ວມກັນ ເປັນປະທານ ກອງປະຊຸມປຶກສາຫາລື ຄວາມໝັ້ນຄົງ ຍຸດທະສາດຈີນ-ຣັດເຊຍ ຄັ້ງທີ 19.
ຂປລ.ວິທະຍຸ ສາກົນ ແຫ່ງ ສປ ຈີນ, ວັນທີ 12 ພະຈິກນີ້, ທ່ານ ວາງຢີ້, ກຳມະການ ກົມການເມືອງ ສູນກາງພັກ ກອມມູນິດຈີນ, ຫົວໜ້າຫ້ອງວ່າການ ຄະນະກຳມະການ ວຽກງານ ການຕ່າງປະເທດ ຂອງຄະນະກຳມະການ ສູນກາງພັກ ກອມມູນິດຈີນ ແລະ ທ່ານ ເຊີເກ ຊອຍກູ ເລຂາທິການ ສະພາຄວາມໝັ້ນຄົງ ແຫ່ງສະຫະພັນ ຣັດເຊຍ ໄດ້ຮ່ວມກັນ ເປັນປະທານ ກອງປະຊຸມປຶກສາຫາລື ຄວາມໝັ້ນຄົງ ຍຸດທະສາດຈີນ-ຣັດເຊຍ ຄັ້ງທີ 19. ທ່ານ ວາງຢີ້ ໄດ້ກ່າວເນັ້ນຕືມວ່າ: ການຊີ້ນຳ ນຳພາ ຂອງປະມຸກລັດ ສອງປະເທດ ແມ່ນທ່າແຮງ ທາງດ້ານການເມືອງໃຫຍ່ ທີ່ສຸດ ແລະ ການຮັບປະກັນ ຂັ້ນພື້ນຖານ ຂອງການພັດທະນາ ສາຍພົວພັນ ລະຫວ່າງ ສປ ຈີນ-ຣັດເຊຍ ທີ່ມີຄຸນນະພາບສູງ. ພ້ອມທັງ ສະແດງ ຄວາມຍິນດີ ຮ່ວມກັບ ຣັດເຊຍ ສຸມໃສ່ຕິດຕາມການຜັນແປ ຂອງສະພາບການສາກົນ, ດຳເນີນການແລກປ່ຽນ ແລະ ການປະສານງານຢ່າງໃກ້ຊິດ, ເພີ່ມທະວີ ການປະສານງານ ຫລາຍຝ່າຍ, ຮ່ວມກັນ ປົກປັກ ຮັກສາ ສະຖຽນລະພາບ ດ້ານຍຸດທະສາດ ໃນທົ່ວໂລກ. ຈາກນັ້ນ ທ່ານ ເຊີເກ ຊອຍກູ ກ່າວວ່າ: ທ່ານ ສີ ຈິ້ນຜິງ ປະທານ ປະເທດຈີນ ໄດ້ເດີນທາງ ໄປເຂົ້າຮ່ວມ ກອງປະຊຸມສຸດຍອດ ຜູ້ນຳປະເທດ ບຣິກສ ຢູ່ນະຄອນ ຄາຊານຂອງ ຣັດເຊຍ ໃນຫວ່າງມໍ່ໆມານີ້, ຊຶ່ງເປັນການສະໜັບ ສະໜູນ ອັນໃຫຍ່ຫລວງ ທີ່ສຸດຕໍ່ ຣັດເຊຍ ທີ່ເປັນ ປະເທດ ປະທານ ໝູນວຽນ ພ້ອມທັງ ໄດ້ປະກອບສ່ວນ ສຳຄັນເຂົ້າໃນ ຜົນສຳເລັດ ຂອງກອງປະຊຸມ ສຸດຍອດ ຄາຊານ ແລະ ເພີ່ມທະວີການຮ່ວມມື ລະຫວ່າງ ປະເທດເຂດໂລກໃຕ້. ຣັດເຊຍ ຍິນດີຮ່ວມກັບ ສປ ຈີນ ເພີ່ມທະວີ ການປະສານ ສົມທົບກັນ ຜ່ານກົນໄກ ຫລາຍຝ່າຍຄື: ອົງການ ສະຫະ ປະຊາຊາດ, ອົງການຮ່ວມມືຊຽງໄຮ້ ແລະ ບຣິກສ ເປັນຕົ້ນ./.
(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
