ຂປລ
ຂປລ. ກອງປະຊຸມວຽກງານ ປົກປ້ອງຂໍ້ມູນເອເລັກໂຕຣນິກ ແລະ ຂໍ້ມູນສ່ວນບຸກຄົນ ອາຊຽນ ຄັ້ງທີ 7 ຈັດຂຶ້ນຢ່າງເປັນທາງການ ໃນວັນທີ 22 ຕຸລາ 2024 ຢູ່ນະຄອນຫລວງວຽງຈັນ ໂດຍມີເຈົ້າໜ້າທີ່ ຕາງໜ້າ 10 ປະເທດອາຊຽນເຂົ້າຮ່ວມ ເຊິ່ງເປັນໜຶ່ງໃນກອງປະຊຸມຍ່ອຍ ຂອງກອງປະຊຸມເຈົ້າໜ້າທີ່ອາວຸໂສດີຈິຕອນ ອາຊຽນ (ADGSOM) ທີ່ຈັດຂຶ້ນຢູ່ນະຄອນຫລວງວຽງຈັນ ໃນລະຫວ່າງ ວັນທີ 21-25 ຕຸລາ 2024.
ຂປລ. ກອງປະຊຸມວຽກງານ ປົກປ້ອງຂໍ້ມູນເອເລັກໂຕຣນິກ ແລະ ຂໍ້ມູນສ່ວນບຸກຄົນ ອາຊຽນ ຄັ້ງທີ 7 ຈັດຂຶ້ນຢ່າງເປັນທາງການ ໃນວັນທີ 22 ຕຸລາ 2024 ຢູ່ນະຄອນຫລວງວຽງຈັນ ໂດຍມີເຈົ້າໜ້າທີ່ ຕາງໜ້າ 10 ປະເທດອາຊຽນເຂົ້າຮ່ວມ ເຊິ່ງເປັນໜຶ່ງໃນກອງປະຊຸມຍ່ອຍ ຂອງກອງປະຊຸມເຈົ້າໜ້າທີ່ອາວຸໂສດີຈິຕອນ ອາຊຽນ (ADGSOM) ທີ່ຈັດຂຶ້ນຢູ່ນະຄອນຫລວງວຽງຈັນ ໃນລະຫວ່າງ ວັນທີ 21-25 ຕຸລາ 2024. ໃນນັ້ນ ສປປ ລາວ ນຳພາໂດຍ ທ່ານ ທະວີສັກ ມະໂນທັມ ຫົວໜ້າສູນບໍລິຫານລັດດີຈິຕອນ ໂດຍຜູ້ເຂົ້າຮ່ວມໄດ້ສຸມໃສ່ປຶກສາຫາລື ກ່ຽວກັບການປະຕິບັດ ຫລັກການປົກຂໍ້ມູນ ແລະ ເພື່ອອຳນວຍຄວາມສະດວກ ໃຫ້ແກ່ການແລກ ປ່ຽນຄວາມຮູ້ ແລະ ການປະຕິບັດທີ່ດີທີ່ສຸດ ສຳລັບວຽກງານປົກປ້ອງຂໍ້ມູນ ເອເລັກໂຕຣນິກ ແລະ ຂໍ້ມູນສ່ວນບຸກຄົນ ລະຫວ່າງບັນດາປະເທດສະມາຊິກອາຊຽນ.
ກອງປະຊຸມຄັ້ງນີ້, ໄດ້ປຶກສາຫາລື ແລະ ລາຍງານຄວາມຄືບໜ້າ ຂອງການຈັດຕັ້ງປະຕິບັດວຽກງານ ປົກປ້ອງຂໍ້ມູນ ຂອງແຕ່ລະປະເທດ ສະມາຊິກອາຊຽນ ທັງດ້ານນິຕິກຳ, ເຫດການຕ່າງໆ ແລະ ການແກ້ໄຂສິ່ງທ້າທາຍໃນ ວຽກງານປົກປ້ອງຂໍ້ມູນ. ໃນນີ້, ທ່ານ ສຸເນດໂຕ ຊາພັກດີ, ຮອງຫົວໜ້າກົມຄວາມປອດໄພໄຊເບີ, ກະຊວງເຕັກໂນໂລຊີ ແລະ ການສື່ສານ ລາຍງານວຽກງານປົກປ້ອງຂໍ້ມູນ ຂອງ ສປປ ລາວ, ຈາກນັ້ນ ປະເທດສິງປະໂປ ໄດ້ລາຍງານເພີ່ມຕື່ມກ່ຽວກັບແຜນຈັດຕັ້ງປະຕິບັດ ຂອບການຮ່ວມມືອາຊຽນ ທາງດ້ານຂໍ້ມູນລັດຖະບານ, ຂອບຮ່ວມມືສໍາລັບ ການໂອນຍ້າຍຂໍ້ມູນສ່ວນບຸກຄົນຂ້າມແດນ. ນອກຈາກນັ້ນ, ຜູ້ແທນຈາກປະເທດກໍາປູເຈຍ ໃນນາມປະທານຂອງກອງປະຊຸມໄດ້ລາຍງານບັນດາຂໍ້ລິເລີ່ມ ພາຍໃຕ້ແຜນງານທີ່ຈະຕ້ອງ ໄດ້ຈັດຕັ້ງປະຕິບັດໃນຕໍ່ໜ້າ.
ໃນຕອນບ່າຍວັນດຽວກັນ ກໍໄດ້ມີການຈັດສຳມະນາ ພາຍໃນຫົວຂໍ້ ເຕັກໂນໂລຊີໃໝ່ ໃນການປົກປ້ອງຂໍ້ມູນເອເລັກໂຕຣນິກ ແລະ ຂໍ້ມູນສ່ວນບຸກຄົນ’’ ໂດຍມີການນໍາສະເໜີ ຈາກອົງການປົກປ້ອງຂໍ້ມູນເອເລັກໂຕຣນິກ ຂອງປະເທດຍີ່ປຸ່ນ, ພາກສ່ວນທຸລະກິດ ຈາກບັນດາປະເທດອາຊຽນ. ນອກຈາກນັ້ນ, ກໍມີການແລກປ່ຽນຄຳເຫັນ ກ່ຽວກັບ ຄວາມກັງວົນຕໍ່ກັບ ມາດຕະຖານປົກປ້ອງຂໍ້ມູນ ສ່ວນບຸກຄົນ ຂອງພາກທຸລະກິດ, ການແບ່ງປັນຂໍ້ມູນຂອງພາກລັດໃນແບບຂໍ້ມູນເປີດ, ລວມທັງການນຳໃຊ້ຂໍ້ມູນ ເພື່ອຕໍ່ຍອດໃຫ້ແກ່ເຕັກໂນໂລຊີໃໝ່.
ກອງປະຊຸມຄັ້ງນີ້, ຜູ້ເຂົ້າຮ່ວມໄດ້ສະແດງຄວາມຫວັງ ໃນອະນາຄົດຂອງການປົກປ້ອງຂໍ້ມູນ ໃນພາກພື້ນອາຊຽນ ຊຶ່ງໄດ້ຍົກໃຫ້ເຫັນເຖິງຄວາມມຸ້ງໝັ້ນ ລວມຂອງບັນດາປະເທດສະມາຊິກ ເພື່ອເສີມສ້າງກົນໄກ ການປົກປ້ອງຂໍ້ມູນສ່ວນບຸກຄົນ ແລະ ສົ່ງເສີມວັດທະນະທໍາ ຄວາມເປັນສ່ວນຕົວ ທີ່ສອດຄ່ອງກັບຄວາມຕ້ອງການ ຂອງພົນລະເມືອງ ແລະ ທຸລະກິດ.
ຂໍ້ມູນ: ຂ່າວສານ ເຕັກໂນໂລຊີ ແລະ ການສື່ສານ
KPL