ຂປລ
ຂປລ. ລະຫວ່າງວັນທີ 19-21 ຕຸລາ 2024 ຜ່ານມາ, ບັນດາພັນລະຍາຂອງຫົວໜ້າຄະນະ ຜູ້ແທນລັດຖະສະພາ ຈາກ ບັນດາປະເທດສະມາຊິກອາຊຽນ ແລະ ປະເທດອື່ນໆ ທີ່ເດີນທາງມາເຂົ້າຮ່ວມກອງປະຊຸມ ສະມັດຊາໃຫຍ່ລັດຖະສະພາ ລະຫວ່າງຊາດອາຊຽນ ຫລື ໄອປາ (AIPA) ຄັ້ງທີ 45 ແລະ ກອງປະຊຸມປິ່ນອ້ອມ ທີ່ ສປປ ລາວ ເປັນເຈົ້າພາບ
ຂປລ. ລະຫວ່າງວັນທີ 19-21 ຕຸລາ 2024 ຜ່ານມາ, ບັນດາພັນລະຍາຂອງຫົວໜ້າຄະນະ ຜູ້ແທນລັດຖະສະພາ ຈາກ ບັນດາປະເທດສະມາຊິກອາຊຽນ ແລະ ປະເທດອື່ນໆ ທີ່ເດີນທາງມາເຂົ້າຮ່ວມກອງປະຊຸມ ສະມັດຊາໃຫຍ່ລັດຖະສະພາ ລະຫວ່າງຊາດອາຊຽນ ຫລື ໄອປາ (AIPA) ຄັ້ງທີ 45 ແລະ ກອງປະຊຸມປິ່ນອ້ອມ ທີ່ ສປປ ລາວ ເປັນເຈົ້າພາບ ໄດ້ເຄື່ອນໄຫວຢ້ຽມຊົມ ສະຖານທີ່ທ່ອງທ່ຽວສໍາຄັນ ດ້ານວັດທະນະທຳ ຢູ່ນະຄອນຫລວງວຽງຈັນ(ນວ) ເຊິ່ງນໍາພາໂດຍ ທ່ານ ນາງ ວິພາວັນ ພົມວິຫານ ພັນລະຍາ ທ່ານ ປະທານສະພາແຫ່ງຊາດລາວ, ປະທານໄອປາ 45.
ພາຍຫລັງເຂົ້າຮ່ວມພິທີເປີດ ກອງປະຊຸມສະມັດຊາໃຫຍ່ ລັດຖະສະພາລະຫວ່າງຊາດອາຊຽນ ຄັ້ງທີ 45 ຢ່າງເປັນທາງການ, ບັນດາພັນລະຍາຫົວໜ້າຄະນະຜູ້ແທນໄອປາ ໄດ້ໄປຢ້ຽມຊົມຫ້ອງມູນເຊື້ອ ແລະ ຫ້ອງປະຊຸມສະພາແຫ່ງຊາດ, ສະຖາປັດຕະຍະກຳເກົ່າແກ່ ພະທາດຫລວງວຽງຈັນ, ສູນວາງສະແດງຫັດຖະກຳສິນຄ້າໂອດັອບ ຈໍາປາລ້ານຊ້າງ, ສູນວາງສະແດງ ແຜ່ນແພພື້ນເມືອງລາວ (ເຮືອນຂາວ ຂ້າງຫໍຄໍາ). ຈາກນັ້ນ, ໄປຢ້ຽມຊົມຫໍວາງສະແດງສິນສາຍໄໝ ຢູ່ບ້ານຊຽງຍືນ ເມືອງຈັນທະບູລີ ເຊິ່ງເປັນອີກສະຖານທີ່ໜຶ່ງ ທີ່ສູນກາງສະຫະພັນແມ່ຍິງລາວ ໄດ້ສ້າງຕັ້ງຂຶ້ນ ເພື່ອສົ່ງເສີມ ແລະ ປົກປັກຮັກສາມູນເຊື້ອ ດ້ານຫັດຖະກຳຕ່ຳຫູກ-ທໍໄໝຂອງແມ່ຍິງລາວ ທີ່ຮູ້ປູກມອນ, ລ້ຽງມ້ອນຜະລິດເສັ້ນໄໝຍ້ອມສີທຳມະຊາດ ແລະ ຕໍ່າເປັນລວດລາຍຫລາກຫລາຍ ມາເປັນເວລາຢ່າງໜ້ອຍ 5 ພັນປີ. ດັ່ງນັ້ນ, ໃນປີ 1992 ສູນກາງສະຫະພັນແມ່ຍິງລາວ ຈຶ່ງໄດ້ດຳເນີນໂຄງ ການອະນຸລັກ ແລະ ສົ່ງເສີມສິນສາຍໄໝ ເພື່ອສົ່ງເສີມ ແລະ ພື້ນຟູການລ້ຽງ ມ້ອນສາວໄໝ, ອາຊີບເຮັດຫູກທໍໄໝ ແລະ ຫັດຖະກຳອື່ນໆ ຂອງແມ່ຍິງລາວ, ທັງເປັນບ່ອນສະສົມຜ້າອາພອນ ທີ່ມີດອກດວງລວດລາຍອັນປານີດ ທີ່ໄດ້ມາຈາກສີໄມ້ລາຍມື ອັນເປັນເອກະລັກຂອງ ແມ່ຍິງລາວບັນ ດາເຜົ່າ.
ໃນໂອກາດນີ້, ທ່ານ ນາງ ວິພາວັນ ພົມວິຫານ ພ້ອມດ້ວຍຄະນະພັນລະຍາ ການນຳສະພາແຫ່ງຊາດ ແຫ່ງ ສປປ ລາວ ຍັງໄດ້ຈັດພິທີບາສີສູ່ຂວັນ ຕາມຮີດຄອງປະເພນີລາວ ແລະ ງານລ້ຽງອາຫານທ່ຽງ ຢູ່ໂຮງແຮມ ດັບເບິນທຣີ ບາຍ ຮິວຕັນ ເພື່ອເປັນສິລິມຸງຄຸນແກ່ ຄະນະພັນລະຍາ ຜູ້ແທນຕ່າງປະເທດນໍາອີກ.
ຂ່າວ: ໄຊໂສພາພອນ ມິ່ງມຸງຄຸນ
KPL