ຂປລ. ໃນວັນທີ 18 ຕຸລາ 2024 ຜ່ານມາ, ສະຫາຍ ທອງສະຫວັນ ພົມວິຫານ ກຳມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ (ຄຕພ) ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແລະ ເຮັດວຽກ ຢູ່ນະຄອນຫລວງມົດສະກູ, ສະຫະພັນຣັດເຊຍ ເພື່ອສ້າງສະພາບແວດລ້ອມທີ່ເອື້ອອຳນວຍ ໃຫ້ແກ່ການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ມີມູນເຊື້ອອັນດີງາມ ລະຫວ່າງ ສປປ ລາວ ແລະ ສະຫະພັນຣັດເຊຍ ກໍຄື ລະຫວ່າງ ພັກ ປປ ລາວ ແລະ ພັກກອມມູນິດສະຫະພັນຣັດເຊຍ ໃຫ້ແໜ້ນແຟ້ນເລິກເຊິ່ງຍິ່ງຂຶ້ນ.

ການເຄື່ອນໄຫວຢ້ຽມຢາມ ແລະ ເຮັດວຽກ ຢູ່ ສ ຣັດເຊຍ ໃນຄັ້ງນີ້, ສະຫາຍ ທອງສະຫວັນ ພົມວິຫານ ໄດ້ຕາງໜ້າໃຫ້ລັດຖະບານ ແຫ່ງ ສປປ ລາວ ປະດັບຫລຽນໄຊມິດຕະພາບ ໃຫ້ແກ່ ສະຫາຍ ເກນນາດີ ຊູການົບ ປະທານຄະນະບໍລິຫານງານ ສູນກາງພັກກອມມູນິດ ສະຫະພັນຣັດເຊຍ ທີ່ມີຜົນງານດີເດັ່ນ ໃນການປະກອບສ່ວນຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນເປັນມູນເຊື້ອ ລະຫວ່າງ ຣັດເຊຍ-ລາວ ກໍຄື ລະຫວ່າງ ພັກກອມມູນິດສະຫະພັນຣັດເຊຍ ແລະ ພັກປະຊາຊົນ ປະຕິວັດລາວ ຕະຫລອດໄລຍະຫລາຍປີຜ່ານມາ.

ໂອກາດດັ່ງກ່າວ, ສະຫາຍ ເກນນາດີ ຊູການົບ ໄດ້ສະແດງຄວາມຮູ້ບຸນຄຸນຢ່າງສູງມາຍັງພັກ, ລັດ ແຫ່ງ ສປປ ລາວ ທີ່ໄດ້ຕີລາຄາສູງຕໍ່ຜົນງານທີ່ສະຫາຍ ໄດ້ປະກອບສ່ວນເຂົ້າໃນ ການຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງ ຣັດເຊຍ ແລະ ສປປ ລາວ ໃນໄລຍະຜ່ານມາ ໂດຍໄດ້ມອບຫລຽນໄຊມິດຕະພາບ ໃຫ້ໃນຄັ້ງນີ້, ພ້ອມທັງ ຕີລາຄາສູງຕໍ່ການຢ້ຽມ ຢາມຂອງ ຄະນະຜູ້ແທນ ພັກ ປປ ລາວ ໃນຄັ້ງນີ້ ແລະ ເຫັນດີກັບ ຝ່າຍລາວ ຕໍ່ກັບການຕີລາຄາສະພາບ ການພົວພັນຮ່ວມມື ລະຫວ່າງ ພັກ ປປ ລາວ ແລະ ພັກກອມມູນິດ ສະຫະພັນຣັດເຊຍ; ຝ່າຍຣັດເຊຍ ເຫັນດີທີ່ຈະຊູກຍູ້ ການພົວພັນຮ່ວມມື ໃນດ້ານຕ່າງໆກັບ ສປປ ລາວ ໃຫ້ມີປະສິດທິຜົນຍິ່ງຂຶ້ນ ແລະ ຍິນດີທີ່ຈະຢ້ຽມຢາມ ສປປ ລາວ ໃນເວລາທີ່ເໝາະສົມ.

ໃນໄລຍະການຢ້ຽມຢາມ, ສະຫາຍ ທອງສະຫວັນ ພົມວິຫານ ໄດ້ພົບປະກັບ ສະຫາຍ ດີມີຕຣີ ໂນວິກກົບ ຮອງປະທານພັກກອມມູນິດສະຫະພັນຣັດເຊຍ, ຮອງປະທານກໍາມາທິການຕ່າງປະເທດຂອງສະພາດູມາ ແຫ່ງ ສະຫະພັນຣັດເຊຍ ເຊິ່ງການພົບປະດັ່ງກ່າວ, ສອງຝ່າຍ ໄດ້ຕີລາຄາສູງ ຕໍ່ການພົວ ພັນຮ່ວມມື ດ້ານລັດ ແລະ ດ້ານພັກ ລະຫວ່າງ ສອງປະເທດ, ໄດ້ມີການພົບປະແລກປ່ຽນ ລະຫວ່າງ ການນໍາຂັ້ນສູງຂອງສອງປະເທດ. ໃນນີ້, ສະຫາຍ ທອງສະຫວັນ ໄດ້ຕີລາຄາສູງ ແລະ ສະແດງຄວາມຮູ້ບຸນຄຸນ ຕໍ່ການຊ່ວຍເຫລືອອັນລໍ້າຄ່າຂອງ ສະຫະພາບໂຊວຽດ ໃນໄລຍະການ ຕໍ່ສູ້ປະຕິວັດ ເພື່ອປົດປ່ອຍປະເທດລາວ ໃນເມື່ອກ່ອນ ກໍຄື ໃນການປົກປັກຮັກສາ ແລະ ພັດທະນາ ສປປ ລາວ ໃນໄລຍະໃໝ່; ໄດ້ຍົກໃຫ້ເຫັນເຖິງ ການພົວພັນທາງດ້ານການເມືອງ ທີ່ໄດ້ຮັບການຮັດແໜ້ນ, ເລິກເຊິ່ງຍິ່ງໆຂຶ້ນ ແລະ ດ້ານອື່ນໆ ໄດ້ຮັບການຊຸກຍູ້ ເສີມຂະຫຍາຍຢ່າງຕັ້ງໜ້າ ອັນພົ້ນເດັ່ນທາງ ດ້ານການສຶກສາ ແມ່ນໄດ້ເລີ່ມໃຫ້ມີ ການສອນພາສາຣັດເຊຍ ຢູ່ໂຮງຮຽນ ທີ່ນະຄອນຫລວງວຽງຈັນ ເຖິງ 6 ແຫ່ງ; ໄດ້ແຈ້ງສະ ພາບໂດຍສັງເຂບກ່ຽວກັບ ສປປ ລາວ ໂດຍສະເພາະ ການສືບຕໍ່ຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ ຄັ້ງທີ XI ຂອງພັກ ໃນທ້າຍສະໄໝ, ແຜນພັດທະນາ ເສດຖະກິດ-ສັງຄົມ 5 ປີ ຄັ້ງທີ IX, ການ ຈັດຕັ້ງປະຕິບັດ 2 ວາລະແຫ່ງຊາດ, ຜົນສໍາເລັດຂອງການເປັນເຈົ້າພາບ ຈັດກອງປະຊຸມສຸດຍອດອາຊຽນ ແລະ ກອງປະຊຸມປິ່ນອ້ອມອື່ນໆ ໃນປີ 2024.

ສະຫາຍ ດີມີຕຣີ ໂນວິກກົບ ກໍໄດ້ແຈ້ງສະພາບພາຍໃນຣັດເຊຍ, ສະພາບການເຄື່ອນໄຫວ ແລະ ບົດບາດ ຂອງພັກກອມມູນິດ ໃນໄລຍະຜ່ານມາ ໂດຍສະເພາະ ການເຄື່ອນໄຫວເພື່ອປົກປ້ອງຜົນປະ ໂຫຍດຊາວຣັດເຊຍ; ການເຂົ້າຮ່ວມການເລືອກຕັ້ງບັນດາເຈົ້າແຂວງ ແລະ ສະພາທ້ອງຖິ່ນ ໃນເດືອນ ກັນຍາ 2024 ທີ່ຜ່ານມາ; ໄດ້ຕີລາຄາສູງຕໍ່ການພົວພັນຮ່ວມມື ລະຫວ່າງສອງພັກ ເຊິ່ງມັນສະແດງໃຫ້ເຫັນ ການມອບລາງວັນແຫ່ງຊາດອັນສູງສົ່ງ ໃຫ້ແກ່ ປະທານພັກກອມມູນິດ ສະຫະພັນຣັດເຊຍ. ນອກນີ້, ສະຫາຍ ຍັງໄດ້ສະເໜີໃຫ້ມີການຊຸກຍູ້ ແລະ ເສີມຂະຫຍາຍການຮ່ວມມື ດ້ານການໂຄສະນາຂໍ້ມູນຂ່າວ ສານຮ່ວມກັນຢ່າງຕັ້ງໜ້າ ໂດຍອີງໃສ່ທ່າແຮງຂອງສອງຝ່າຍ ເພື່ອເປັນການໂຄສະນາກ່ຽວກັບ ປະເທດລາວ ແລະ ພັກປະຊາຊົນ ປະຕິວັດລາວ, ເພື່ອເຮັດໃຫ້ຊາວຣັດເຊຍ ຮູ້ຈັກ ສປປ ລາວ ຫລາຍຂຶ້ນ, ທັງເປັນການສົ່ງເສີມ ດ້ານການທ່ອງທ່ຽວນໍາກັນ.

ຂ່າວ-ພາບ: ຄຕພ

KPL