ຂປລ
ຂປລ. ກອງປະຊຸມລັດຖະມົນຕີແຮງງານ ລາວ-ມຽນມາ ຈັດຂຶ້ນໃນວັນທີ 21 ຕຸລາ 2024 ຢູ່ນະຄອນຫລວງວຽງຈັນ ໂດຍການເປັນປະທານຮ່ວມຂອງ ທ່ານ ນາງ ໃບຄຳ ຂັດທິຍະ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ແຫ່ງ ສປປ ລາວ ແລະ ທ່ານ ອູ ມິນ ນອງ (U Myint Naung) ລັດຖະມົນຕີ ກະຊວງແຮງງານ ແຫ່ງ ສສ ມຽນມາ, ມີ ທ່ານ ອອງ ໂກ (Aung KO) ເອກອັກຄະລັດຖະທູດຜູ້ມີອໍານາດເຕັມ ແຫ່ງ ສສ ມຽນມາ ປະຈໍາ ສປປ ລາວ ແລະ ຄະນະຜູ້ແທນທີ່ກ່ຽວຂ້ອງ ຂອງສອງຝ່າຍ ລາວ ແລະ ມຽນມາ ເຂົ້າຮ່ວມ.
ຂປລ. ກອງປະຊຸມລັດຖະມົນຕີແຮງງານ ລາວ-ມຽນມາ ຈັດຂຶ້ນໃນວັນທີ 21 ຕຸລາ 2024 ຢູ່ນະຄອນຫລວງວຽງຈັນ ໂດຍການເປັນປະທານຮ່ວມຂອງ ທ່ານ ນາງ ໃບຄຳ ຂັດທິຍະ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ແຫ່ງ ສປປ ລາວ ແລະ ທ່ານ ອູ ມິນ ນອງ (U Myint Naung) ລັດຖະມົນຕີ ກະຊວງແຮງງານ ແຫ່ງ ສສ ມຽນມາ, ມີ ທ່ານ ອອງ ໂກ (Aung KO) ເອກອັກຄະລັດຖະທູດຜູ້ມີອໍານາດເຕັມ ແຫ່ງ ສສ ມຽນມາ ປະຈໍາ ສປປ ລາວ ແລະ ຄະນະຜູ້ແທນທີ່ກ່ຽວຂ້ອງ ຂອງສອງຝ່າຍ ລາວ ແລະ ມຽນມາ ເຂົ້າຮ່ວມ. ທັງນີ້, ກໍເພື່ອເປັນການເສີມສ້າງສາຍພົວພັນ ຮ່ວມມືດ້ານແຮງງານ ລະຫວ່າງສອງກະຊວງ ໃຫ້ກ້າວສູ່ການຮ່ວມມືທີ່ເປັນຮູບປະທໍາ.
ທ່ານ ນາງ ໃບຄຳ ຂັດທິຍະ ໄດ້ມີຄໍາເຫັນວ່າ: ກອງປະຊຸມ ໄດ້ຕີລາຄາສູງຕໍ່ ຜົນສໍາເລັດຂອງສອງຝ່າຍ ທີ່ໄດ້ມີຄວາມພະຍາຍາມ ໃນການປະສານສົມທົບກັນເປັນຢ່າງດີ ໃນຕະຫລອດໄລຍະຜ່ານມາ ເຮັດໃຫ້ສອງກະຊວງ ສາມາດຍາດໄດ້ຜົນສໍາເລັດອັນຈົບງາມ ໂດຍສະເພາະແມ່ນ ການລົງເລິກຮ່ວມມື ດ້ານແຮງງານ ລາວ-ມຽນມາ ຊຶ່ງຖືວ່າເປັນບາດກ້າວທີ່ດີ ໃຫ້ແກ່ແຮງງານຂອງສອງປະເທດ ຈະໄດ້ຮັບການປົກປ້ອງສິດ ແລະ ຜົນປະໂຫຍດຕາມກົດໝາຍ; ໄດ້ຕີລາຄາສູງຕໍ່ຜົນສຳເລັດທີ່ຍາດມາໄດ້ ໂດຍສະເພາະ ສອງຝ່າຍໄດ້ມີຄວາມພະຍາຍາມ ໃນການປະສານສົມທົບ ກັນຢ່າງໃກ້ສິດ, ມີການປຶກສາຫາລື ແລະ ແລກປ່ຽນຂໍ້ມູນຂ່າວສານ ເສີມສ້າງສາຍພົວພັນຮ່ວມມື ໂດຍສະເພາະດ້ານແຮງງານ ລາວ-ມຽນມາ ໃຫ້ກ້າວສູ່ການຮ່ວມມື ທີ່ເປັນຮູບປະທໍາ ແລະ ໄດ້ຮັບການຈັດຕັ້ງປະຕິບັດ ຢ່າງມີປະສິດທິຜົນສູງ ແນໃສ່ປົກປ້ອງສິດ ແລະ ຜົນປະໂຫຍດຂອງແຮງງານ ສອງປະເທດ ຕາມກົດໝາຍ ແລະ ລະບຽບການກຳນົດ.
ກອງປະຊຸມໄດ້ເປັນເອກະພາບ ແລະ ຮ່ວມລົງນາມໃສ່ບົດບັນທຶກຄວາມເຂົ້າໃຈ ວ່າດ້ວຍການຮ່ວມມືດ້ານແຮງງານ ລາວ-ມຽນມາ ແລະ ບົດບັນທຶກກອງປະຊຸມ ລັດຖະມົນຕີແຮງງານ ລາວ-ມຽນມາ ເພື່ອເປັນບ່ອນອີງໃຫ້ແກ່ສອງຝ່າຍ ນໍາໄປຈັດຕັ້ງຜັນຂະຫຍາຍ ໃຫ້ປະກົດຜົນເປັນຈິງ. ພ້ອມນັ້ນ, ກອງປະຊຸມຍັງໄດ້ປຶກສາຫາລື ຕໍ່ກັບແຜນການຮ່ວມມື ຂອງສອງກະຊວງ ໃນຕໍ່ໜ້າ ຊຶ່ງໄດ້ເອກະພາບຮ່ວມກັນ ໃນບາງເນື້້ອໃນຕົ້ນຕໍຄື: ສອງຝ່າຍ ຈະແຕ່ງຕັ້ງຄະນະວິຊາການ ເພື່ອປະສານສົມທົບຄົ້ນຄວ້າ ກົນໄກການປະສານງານ ແລະ ກົນໄກການເຮັດວຽກຮ່ວມກັນຢ່າງໃກ້ຊິດ ແນໃສ່ເຮັດໃຫ້ການຈັດຕັ້ງ ຜັນຂະຫຍາຍເນື້ອໃນຂອງບົດບັນທຶກ ຄວາມເຂົ້າໃຈວ່າດ້ວຍການຮ່ວມມື ດ້ານແຮງງານ ລາວ-ມຽນມາ ໄດ້ຮັບການປະຕິບັດ ຢ່າງເປັນຮູບປະທໍາ ແລະ ມີຜົນສໍາເລັດສູງ; ສະເໜີໃຫ້ສອງຝ່າຍ ລົງເລິກສ້າງຮ່າງຂໍ້ຕົກລົງ ການຮ່ວມມືກັນ ເປັນອັນສະເພາະ ຂອງແຕ່ລະວຽກ ທີ່ເອກະພາບກັນ ຊຶ່ງເປັນວຽກຮີບດ່ວນ ໂດຍສະເພາະ ການຜັນຂະຫຍາຍເນື້້ອໃນພາຍໃຕ້ ມາດຕາ 5 ແລະ ມາດຕາ 8 ເພື່ອນໍາໄປສູ່ການແກ້ໄຂບັນຫາແຮງງານ ທີ່ເຂົ້າມາເຄື່ອນໄຫວບໍ່ຖືກຕ້ອງຢູ່ ສປປ ລາວ ໂດຍສະເພາະ ຢູ່ເຂດເສດຖະກິດພິເສດສາມ ຫລ່ຽມຄໍາ ເມືອງຕົ້ນເຜິ້ງ ແຂວງບໍ່ແກ້ວ ດ້ວຍການດໍາເນີນການຂຶ້ນທະບຽນຮັບຮູ້ ແລະ ຢັ້ງຢືນຈາກສອງຝ່າຍ ເພື່ອປົກປ້ອງສິດ ແລະ ຜົນປະໂຫຍດຂອງເຂົາເຈົ້າຕາມກົດໝາຍ.
ໂອກາດນີ້, ທ່ານ ນາງ ໃບຄຳ ຂັດທິຍະ ຍັງຕີລາຄາສູງ ຕໍ່ຜົນສຳເລັດກອງປະຊຸມ ແລະ ການພົວພັນຮ່ວມມືທີ່ ທັງສອງກະຊວງຍາດມາໄດ້ ແລະ ພ້ອມສະໜັບສະໜູນ ແຜນການຮ່ວມມື ໃນຕໍ່ໜ້າ ແລະ ເພີ່ມທະວີການປະສານງານຢ່າງໃກ້ສິດ ເພື່ອສາມາດຍາດໄດ້ຜົນສໍາເລັດ ຂອງການຮ່ວມມື ຫລາຍກວ່າເກົ່າ ແລະ ເພື່ອເປັນການປະກອບສ່ວນເຂົ້າໃນ ການເສີມສ້າງ ສາຍພົວພັນມິດຕະພາບ ແລະ ການຮ່ວມມືຖານບ້ານໃກ້ເຮືອນຄຽງທີ່ດີ ລະຫວ່າງສອງປະເທດ ລາວ-ມຽນມາ ແລະ ມຽນມາ-ລາວ.
ຂ່າວ-ພາບ: ສົມຫວັງ
KPL