ຂປລ
ກຸ່ມທະນາຄານ ການຄ້າ ແຫ່ງໃຫຍ່ ລະດັບຊາດຂອງ ສປຈີນ ຈຳນວນ 6 ແຫ່ງ ເປີດເຜີຍ ລາຍລະອຽດ ກ່ຽວກັບ ມາດຕະການ ປັບຫລຸດ ອັດຕາດອກເບ້ຍ ສິ່ນເຊື່ອເຮືອນ ທີ່ຢູ່ອາໄສ ທີ່ມີຢູ່ແລ້ວ ໃຫ້ສອດຄອງກັບ ນະໂຍບາຍຂອງ ທະນາຄານກາງ
ຂປລ.ສຳນັກຂ່າວ ຊິນຮວາ ຂອງ ສປຈີນ, ກຸ່ມທະນາຄານ ການຄ້າ ແຫ່ງໃຫຍ່ ລະດັບຊາດຂອງ ສປຈີນ ຈຳນວນ 6 ແຫ່ງ ເປີດເຜີຍ ລາຍລະອຽດ ກ່ຽວກັບ ມາດຕະການ ປັບຫລຸດ ອັດຕາດອກເບ້ຍ ສິ່ນເຊື່ອເຮືອນ ທີ່ຢູ່ອາໄສ ທີ່ມີຢູ່ແລ້ວ ໃຫ້ສອດຄອງກັບ ນະໂຍບາຍຂອງ ທະນາຄານກາງ ເພື່ອຮັກສາ ສະຖຽນລະພາບ ຂອງຕະຫລາດອະສັງຫາລິມະຊັບ.
ຖະແຫລງການຈາກກຸ່ມ ທະນາຄານ ການຄ້າ ເບື້ອງຕົ້ນ ໄດ້ແກ່: ທະນາຄານ ເພື່ອອຸດສາຫະກຳ ແລະ ການຄ້າແຫ່ງປະເທດ ສປຈີນ, ທະນາຄານກະສິກຳ ແຫ່ງປະເທດ ສປຈີນ, ທະນາຄານແຫ່ງ ປະເທດ ສປຈີນ, ທະນາຄານເພື່ອການກໍ່ສ້າງແຫ່ງ ປະເທດ ສປຈີນ, ທະນາຄານ ເພື່ອການສື່ສານ ແລະ ທະນາຄານ ເພື່ອການອອມຊັບ ທາງໄປສະນີແຫ່ງປະເທດ ສປຈີນ ລະບຸ ການປັບຫລຸດ ອັດຕາດອກເບ້ຍນີ້ ຈະເລີ່ມຕົ້ນດຳເນີນການ ຕັ້ງແຕ່ວັນທີ 25 ຕຸລານີ້ ເປັນຕົ້ນໄປ.
ອັດຕາດອກເບ້ຍຂອງ ຊິ່ນເຊື່ອເຮືອນ ທີ່ຢູ່ອາໄສ ສຳລັບ ເຮືອນຫລັງທຳອິດ, ເຮືອນຫລັງທີສອງ ແລະ ເຮືອນຫລັງອື່ນໆ ຈະຖືກປັບຫລຸດ ຈົນຕໍ່າກວ່າ ອັດຕາດອກເບ້ຍ ຂອງສິ່ນເຊື່ອເຮືອນ ທີ່ຢູ່ອາໄສ ທີ່ມີຢູ່ແລ້ວ ເມື່ອເດືອນກັນຍາ, ຂະນະທີ່ ສປຈີນ ຕັ້ງເປົ້າໝາຍ ຫລຸດພາລະ ທາງການເງິນ ຂອງເຈົ້າຂອງ ອະສັງຫາລິມະຊັບ. ແຜນດັ່ງກ່າວຂອງທະນາຄານກາງ ຂອງສປຈີນ ມີຂຶ້ນ ຫລັງຈັດ ກອງປະຊຸມ ຄະນະກົມການເມືອງ ສູນກາງພັກ ກອມມູນິດຈີນ (CPC) ເມື່ອວັນທີ 26 ກັນຍາຜ່ານມາ ເພື່ອຮັກສາ ສະຖຽນລະພາບ ຂອງຕະຫລາດ ອະສັງຫາລິມະຊັບພາຍໃນປະເທດ./.
KPL
