ຂປລ. ໃນວັນທີ 12 ຕຸລາ 2024 ຜ່ານມາ, ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ແລະ ທ່ານ ຫລີ ສຽງ ນາຍົກລັດຖະມົນຕີ ແຫ່ງ ສປ ຈີນ ໄດ້ໃຫ້ກຽດເຂົ້າຮ່ວມ ພິທີເປີດປ້າຍ ຜົນສຳເລັດການກໍ່ສ້າງອາຄານໂຮງໝໍມະໂຫສົດ ຢູ່ນະຄອນຫລວງວຽງຈັນ ໂດຍການຊ່ວຍເຫລືອລ້າ ຈາກລັດຖະບານ ສປ ຈີນ, ມີບັນດາລັດຖະມົນຕີ, ຮອງລັດຖະມົນຕີ, ຫົວໜ້າກົມ, ຮອງກົມ ຈາກກະຊວງ ທີ່ກ່ຽວຂ້ອງ ພ້ອມດ້ວຍ ທູດຈີນ ປະຈຳລາວ ແລະ ແຂກຖືກເຊີນ ທັງຝ່າຍ ລາວ ແລະ ຈີນ ເຂົ້າຮ່ວມ.

ໂອກາດດັ່ງກ່າວ, ທ່ານ ສອນໄຊ ສີພັນດອນ ໄດ້ຕາງໜ້າໃຫ້ ພັກ, ລັດຖະບານ ແລະ ປະຊາຊົນລາວບັນດາເຜົ່າ ສະແແດງຄວາມຂອບໃຈ ມາຍັງພັກ, ລັດຖະບານ ແລະ ປະຊາຊົນຈີນ ທີ່ໄດ້ໃຫ້ການຊ່ວຍເຫລືອ ອັນລໍ້າຄ່າໃນການກໍ່ສ້າງ ປັບປຸງ ແລະ ຍົກລະດັບໂຮງໝໍມະໂຫສົດ ແຫ່ງນີ້ ເຊິ່ງໄດ້ວາງສີລາລຶກໂຄງການ ໃນເດືອນ ພະຈິກ 2017 ໂດຍການເຂົ້າຮ່ວມຂອງ ສະຫາຍ ສີ ຈິ້ນຜິງ ເລຂາທິການໃຫຍ່ ປະທານປະເທດແຫ່ງ ສປ ຈີນ ແລະ ສະຫາຍ ບຸນຍັງ ວໍລະຈິດ ເລຂາທິການໃຫຍ່ ປະທານປະເທດ ແຫ່ງ ສປປ ລາວ ໃນເວລານັ້ນ. ພ້ອມນີ້, ທ່ານ ຍັງ ສະແດງຄວາມຫວັງວ່າ ພາຍຫລັງໂຄງການສໍາເລັດ ຈະກາຍເປັນສະຖານທີ່ປິ່ນປົວ, ຮັກສາຄົນເຈັບ ທີ່ທັນສະໄໝທີ່ສຸດ, ມີລະບົບວິທະຍາການປິ່ນປົວທີ່ຄົບຊຸດທີ່ສຸດ, ທັງມີປະສິດທິຜົນສູງທີ່ສຸດ ໃນການຮັບໃຊ້ປະຊາຊົນ, ທັງກາຍເປັນສັນຍາລັກແຫ່ງ ມິດຕະພາບ ແລະ ຄວາມຮ່ວມມື ຂອງສອງຊາດ ລາວ-ຈີນ ນໍາອີກ ແລະ ຫວັງວ່າ: ລັດຖະບານຈີນ ຈະສືບຕໍ່ສະໜັບສະໜູນ ຊ່ວຍເຫລືອການພັດທະນາ ເສດຖະກິດ-ສັງຄົມ ຂອງ ສປປ ລາວ ໃນຖານະທີ່ເປັນຄູ່ຮ່ວມມື ຍຸດທະສາດຮອບດ້ານ ບົນຈິດໃຈ 4 ດີ ແລະ ການເປັນຄູ່ຮ່ວມຊາຕາກໍາ ລາວ-ຈີນ ຮ່ວມກັນ. ສະເພາະວຽກງານ ສາທາລະນະສຸກ ນອກຈາກການຍົກລະດັບ ດ້ານໂຄງລ່າງພື້ນຖານ ແລະ ອຸປະກອນເຄື່ອງມີແລ້ວ ການຍົກລະດັບຂີດຄວາມສາມາດ ດ້ານບຸກຄະລາກອນການແພດ ໃຫ້ສົມຄູ່ ຍັງແມ່ນບັນຫາສໍາຄັນ ທີ່ຕ້ອງໄດ້ເອົາໃຈໃສ່ ສະນັ້ນ, ເພື່ອຮັບປະກັນການ ປົກປັກຮັກສາ ແລະ ນໍາໃຊ້ ຢ່າງມີປະສິດທິຜົນສູງ ແລະ ຍືນຍົງນັ້ນ ຫວັງວ່າ ຈະໄດ້ຮັບການສະໜັບສະໜູນ ຈາກສະຫາຍຈີນຕື່ມອີກ ລວມທັງໃຫ້ໂຮງໝໍຕ່າງໆ ຂອງສອງປະເທດ ໃຫ້ມີໂອກາດໃນການຮ່ວມມືກັນ ດ້ານວິຊາການ, ຍົກລະດັບບຸກຄະລາກອນ ການຄຸ້ມຄອງ ແລະ ເຕັກນິກການປິ່ນປົວຮັກສາ ໃຫ້ນັບມືນັບຫລາຍຂຶ້ນ.

ພ້ອມດຽວກັນນີ້, ທ່ານ ຫລີ ສຽງ ຍັງໄດ້ສະແດງຄວາມຊົມເຊີຍມາຍັງຜົນສຳ ເລັດ ຂອງການກໍ່ສ້າງອາຄານໂຮງໝໍມະໂຫສົດ ເຊິ່ງໃນປີ 2017 ການນຳສູງສຸດຂອງຈີນ ແລະ ລາວ ໄດ້ຮ່ວມວາງສີລາລຶກໂຄງການ ດ້ວຍຄວາມເອົາໃຈໃສ່ ຂອງສອງປະເທດ, ຜ່ານຜ່າຄວາມຫຍຸ້ງຍາກນາງໆປະການ ມາຮອດປັດຈຸບັນ ເຮັດໃຫ້ການກໍ່ສ້າງອາຄານ ໂຮງໝໍມະໂຫສົດສຳເລັດ ຕາມເປົ້າໝາຍ ເຊິ່ງໂຮງໝໍແຫ່ງນີ້, ໄດ້ກາຍມາເປັນໂຮງໝໍກວມລວມ ແລະ ມີຄວາມທັນສະໄໝ ເປັນບ່ອນສຶກສາການແພດທີ່ໃຫຍ່ທີ່ສຸດ ແລະ ເງື່ອນໄຂດີທີ່ສຸດໃນທົ່ວປະເທດລາວ, ມີບົດດບາດສຳຄັນ ໃນການປິ່ນປົວ ແລະ ສ້າງຜົນປະໂຫຍດຫລາຍສຸດ ໃຫ້ປປະຊາຊົນລາວບັນດາເຜົ່າ, ອາຄານໂຮງໝໍມີຄວາມສວຍງາມ ປະສົມປະສານກັບວັດທະ ນະທຳ ລາວ-ຈີນ ແລະ ສະແດງໃຫ້ເຫັນເຖິງມິດຕະພາບ ລາວ-ຈີນ ຈົ່ງໝັ້ນຍືນ, ເປັນໜຶ່ງໃນໂຄງການຮ່ວມມື ໜຶ່ງແລວໜຶ່ງເສັ້ນທາງ ລະຫວ່າງ ຈີນ-ລາວ.

ໃນໄລຍະຜ່ານມາ ພາຍໃຕ້ການຊີ້ນຳແຜນຍຸດທະສາດ ຂອງສະຫາຍ ສີ ຈິ້ນຜິງ ເລຂາທິການໃຫຍ່, ປະທານປະເທດຈີນ ແລະ ສະຫາຍ ທອງລຸນ ສີສຸລິດ ເລຂາທິການໃຫຍ່ ປະທານປະເທດລາວ ໄດ້ພ້ອມກັນສ້າງສາຄູ່ຮ່ວມຊາຕາກຳ ຈີນ-ລາວ ແລະ ລາວ-ຈີນ ທີ່ໄດ້ມາດຕະຖານສູງ, ຄຸນນະພາບສູງ ແລະ ລະດັບສູງ, ໄດ້ເພີ່ມທະວີການເຊື່ອມໂຍງ ທາງດ້ານຍຸດທະສາດ, ສ້າງໂຄງການພື້ນຖານໂຄງລ່າງ ເປັນຈຳນວນຫລາຍ ເຊິ່ງໄດ້ປະກອບສ່ວນ ເຂົ້າໃນການຊຸກຍູ້ພັດທະນາເສດຖະກິດ ແລະ ຍົກລະດັບຊີວິດ ການເປັນຢູ່ຂອງປະຊາຊົນ.

KPL