ຂປລ
ວັນທີ 7 ຕຸລາ ແມ່ນວັນຄູແຫ່ງ ຊາດ ເຊິ່ງມີປະຫວັດຄວາມເປັນມາສໍາຄັນ ພົວພັນເຖິງບົດບາດຂອງຜູ້ມີອາຊີບສິດສອນໃຫ້ຄວາມຮູ້ກໍ່ຄືຄູ.
*ວັນທີ 7 ຕຸລາ ແມ່ນວັນຄູແຫ່ງຊາດ ເຊິ່ງມີປະຫວັດຄວາມເປັນມາ ສໍາຄັນ ພົວພັນເຖິງບົດບາດຂອງຜູ້ ມີອາຊີບສິດສອນໃຫ້ຄວາມຮູ້ ກໍ່ຄືຄູ. ພັກເຮົາ ຖືເອົາການສ້າງເສດຖະກິດ ເປັນໜ້າທີ່ໃຈກາງແມ່ນເພື່ອສ້າງເງື່ອນໄຂ ແລະ ເພີ່ມຂີດຄວາມສາມາດໃນການພັດທະນາຄົນ ແລະ ການພັດທະນາສັງຄົມ (ສຶກສາ, ກິລາ, ສາທາລະນະສຸກ, ວັດທະນະ ທໍາ, ແຮງງານ-ສະຫວັດດີການ, ການປະດິດສ້າງ ແລະ ການຮັກສາສິ່ງແວດລ້ອມ...) ເຊິ່ງເນື້ອແທ້ ແມ່ນການສ້າງຄວາມຈະເລີນດ້ານວັດຖຸ ແລະ ການສ້າງຄວາມສີວິໄລທາງດ້ານຈິດໃຈໄປພ້ອມໆກັນ.
ຕະຫຼອດໄລຍະທີ່ຜ່ານມາ ພາຍໃຕ້ການນໍາພາຂອງພັກ ແລະ ລັດ ຖະບານບວກໃສ່ກັບຄວາມເອົາໃຈໃສ່ພະຍາຍາມຂອງຜູ້ບໍລິຫານການສຶກສາ ແລະ ກິລາ, ຄູ-ອາຈານ ແລະ ການປະກອບສ່ວນຢ່າງຕັ້ງໜ້າຂອງ ທຸກພາກສ່ວນໃນສັງຄົມທັງພາກລັດ ແລະ ພາກເອກະຊົນ, ພາຍໃນ ແລະ ຕ່າງປະເທດ ໂດຍສະເພາະແມ່ນຄູ່ຮ່ວມພັດທະນາຕໍ່ການພັດທະນາການສຶກສາ ແລະ ກິລາກໍ່ຄື ການພັດທະນາຖັນແຖວຄູ-ອາຈານ ເຮັດໃຫ້ເຂົາເຈົ້າມີໂອກາດໄດ້ພັດທະນາຕົນເອງຫລາຍຂຶ້ນ ແລະ ກາຍເປັນກໍາລັງແຮງທີ່ສໍາຄັນໜຶ່ງໃນການພັດທະນາການສຶກສາ ແລະ ກິລາໃຫ້ມີການຫັນປ່ຽນໃໝ່ທີ່ດີ ຂຶ້ນເປັນລໍາດັບທີ່ເປັນຮູບປະທໍານັບທັງດ້ານປະລິມານ ແລະ ຄຸນະພາບ, ເຊິ່ງສະແດງອອກໃນສະຖານການສຶກສາລະດັບຕ່າງໆໂດຍສະເພາະສາຍສາມັນສຶກສາທັງພາກລັດ ແລະ ພາກເອກະຊົນໄດ້ເພີ່ມຂຶ້ນ ໃນແຕ່ລະປີ ເປັນການສ້າງເງື່ອນໄຂ ແລະ ໂອກາດໃຫ້ປະຊາຊົນລາວບັນດາເຜົ່າໄດ້ເຂົ້າເຖິງການສຶກສາຫລາຍຂຶ້ນ.
ເຖິງຢ່າງໃດກໍ່ດີ, ຕິດພັນການພັດທະນາຊັບພະຍາກອນມະນຸດ ສໍາຄັນອັນໜຶ່ງກໍ່ແມ່ນວຽກງານຄູ, ສະນັ້ນ ຈຶ່ງຂໍຍົກເອົາບາງເນື້ອໃນຈິດໃຈ ທິດຊີ້ນໍາຂອງທ່ານ ທອງ ລຸນ ສີສຸລິດ ເລຂາທິການໃຫຍ່, ປະທານປະເທດຕໍ່ກອງປະຊຸມຜູ້ບໍລິຫານການສຶກສາທົ່ວປະເທດ ເມື່ອບໍ່ດົນນີ້ມາພ້ອມກັນທົບທວນແລກປ່ຽນຄໍາເຫັນນໍາກັນວ່າ ຈະເຮັດແນວໃດ ເພື່ອຈະເຮັດໃຫ້ແນວຄິດຊີ້ນໍາບັນລຸຜົນຕາມເງື່ອນໄຂຕົວຈິງໄດ້ ໃນນັ້ນ ເພິ່ນໄດ້ເນັ້ນໜັກວ່າ: “...ໃນຕໍ່ໜານີ້ ຕ້ອງວາງແຜນກໍ່ສ້າງ, ບໍາລຸງຖັນແຖວຄູອາຈານ ທັງໃນໄລຍະສັ້ນ ແລະ ໄລຍະຍາວ ເພື່ອສູ້ຊົນເຮັດໃຫ້ໂຮງຮຽນມີຄູພຽງພໍຕາມເກນ ທີ່ວາງໄວ້; ຄູເປັນແມ່ພິມຂອງຊາດ, ເປັນຜູ້ມີບົດບາດສໍາຄັນຕໍ່ການສຶກສາ, ຕ້ອງປັບປຸງນະໂຍບາຍຊຸກຍູ້, ສົ່ງເສີມທີ່ຖືກຕ້ອງ, ເໝາະສົມຕໍ່ຄູ, ສອດຄ່ອງກັບສະພາບເສດຖະກິດ-ສັງຄົມ (ລະບອບເງິນເດືອນ, ເງິນອຸດໜູນ, ສະຫວັດດີການ, ສິດທິປະໂຫຍດອື່ນໆ...); ດຶງນັກຮຽນເກັ່ງໄປຮຽນວິຊາຄູຕາມທິດນາຍຄູເກັ່ງ ລູກສິດຈຶ່ງເກັ່ງ; ສຸມໃສ່ສ້າງຖັນແຖວຄູ-ອາຈານ ໃຫ້ໄດ້ມາດຕະຖານດ້ານວິຊາການ ແລະ ມີຈັນຍາບັນໜັກແໜ້ນ ເພື່ອສະໜອງໃຫ້ການສຶກສາທຸກລະດັບ; ເອົາໃຈໃສ່ຄັດເລືອກ, ເລືອກເຟັ້ນ, ສອບບັນຈຸຄູທີ່ຮັບປະກັນມາດຕະຖານ; ຄະນະພັກ, ອັງການປົກຄອງ, ຜູ້ບໍລິຫານການສຶກສາ, ຄູຕ້ອງເຂົ້າແກັບ-ເຂົ້າເກຍ ແລະ ໄປລວງດຽວໃນການປະຕິບັດທິດນໍາ, ນະໂຍບາຍດ້ານການສຶກສາໂດຍສະເພາະແກ້ໄຂບັນຫາຄູອາສາ ແລະ ການຂາດແຄນຄູສອນຢູ່ຊົນນະບົດຫ່າງໄກສອກຫລີກ, ຢູ່ ຮາກຖານບ້ານ; ປະຕິບັດນະໂຍບາຍ ນໍາໃຊ້ຄູຈາກຫລາຍພາກສ່ວນ ໂດຍສະເພາະເອົາທະຫານ, ຕໍາຫລວດ ໄປເປັນຄູ ຫລື ເອົາຄູອາສາເຂົ້າເປັນທະຫານ, ເປັນຕໍາຫລວດ...”.
ສະຫລຸບວ່າ ຄູແມ່ນຜູ້ມີບົດບາດ ຕໍ່ການພັດທະນາຊັບພະຍາກອນມະນຸດ ເຊິ່ງເນື້ອແທ້ກໍ່ແມ່ນການພັດທະນາຄົນ, ພວກເຮົາບໍ່ອາດປ່ອຍປະເປັນໄປຕາມມີຕາມເກີດ, ແນ່ນອນຕ້ອງສຸມທຸກກໍາລັງແຮງ ກໍ່ຄືທ່າແຮງທີ່ເຮົາມີ ເພື່ອສ້າງ ແລະ ພັດທະນາຄູ ໃຫ້ສົມຄູກັບການພັດທະນາແຕ່ລະໄລຍະ. ຜູ້ທີ່ເປັນຄູແລ້ວ ກໍ່ຕ້ອງບືນຕົວ ຝຶກຝົນຫລໍ່ຫລອມຕົນເອງຢູ່ສະເໝີ ເພື່ອໃຫ້ທັນສະພາບແຫ່ງ ຄວາມຕ້ອງການຕົວຈິງ.
ໂດຍ: ຄ້ອງໃໝ່
KPL