ຂປລ
ໂຄສົກກະຊວງ ຄົມມະນາຄົມ ແລະ ຂົນສົ່ງຈີນ ກ່າວໃນກອງປະຊຸມ ຖະແຫລງຂ່າວວ່າ: ອີງຕາມແຜນ ດຳເນີນງານ ການຍົກລະດັບ ທາງຫລວງ ຊົນນະບົດ ຮອບໃໝ່ ທີ່ປະກາດ ເມື່ອບໍ່ດົນມານີ້
ຂປລ.ວິທະຍຸສາກົນແຫ່ງ ສປ ຈີນ, ທ່ານ ນາງ ຫລີ ຢິງ, ໂຄສົກກະຊວງ ຄົມມະນາຄົມ ແລະ ຂົນສົ່ງຈີນ ກ່າວໃນກອງປະຊຸມ ຖະແຫລງຂ່າວວ່າ: ອີງຕາມແຜນ ດຳເນີນງານ ການຍົກລະດັບ ທາງຫລວງ ຊົນນະບົດ ຮອບໃໝ່ ທີ່ປະກາດ ເມື່ອບໍ່ດົນມານີ້, ເມື່ອຮອດປີ 2027, ສປ ຈີນ ຈະສຳເລັດ ການປັບປຸງ ທາງຫລວງ ຢູ່ຊົນນະບົດ ເພີ່ມໃໝ່ 300.000 ກິໂລແມັດ, ປະຕິບັດ ໂຄງການບຳລຸງຮັກສາ ແລະ ສ້ອມແປງທາງ 300.000 ກິໂລແມັດ, ປະຕິບັດ ໂຄງການປົກປ້ອງ ຄວາມປອດໄພ ແລະ ຊີວິດ 150.000 ກິໂລແມັດ ແລະ ສ້ອມແປງ ຂົວເກົ່າ ແລະ ອັນຕະລາຍ 9.000 ແຫ່ງ, ບ້ານບໍລິຫານ ທີ່ມີລົດເມ ເຂົ້າເຖິງ ຫລາຍກວ່າ 55%. ທ່ານ ນາງ ຫລີຢີງ ກ່າວຕື່ມວ່າ: ແຜນດຳເນີນງານ ດັ່ງກ່າວ ລະບຸວ່າ ຕ້ອງສືບຕໍ່ ປັບປຸງເຄືອຂ່າຍ ທາງຫລວງ ຢູ່ຊົນນະບົດ ໃຫ້ດີຂຶ້ນ, ປະຕິບັດ ວຽກງານສຸດທ້າຍ ກ່ຽວກັບ ທາງຫລວງ ຢູ່ຊົນນະບົດ ຂອງແຜນພັດທະນາ ເສດຖະກິດ ສັງຄົມ ແຫ່ງຊາດ 5 ປີ ຄັ້ງທີ 14 ຂອງ ສປ ຈີນ ໃຫ້ດີທີ່ສຸດ; ເພີ່ມທະວີ ການຮັບປະກັນ ຄວາມປອດໄພ ດ້ານຄົມມະນາຄົມ ຢູ່ຊົນນະບົດ ຢ່າງແທ້ຈິງ; ຍົກລະດັບ ຄຸນນະພາບ ການບໍລິການ ດ້ານການຂົນສົ່ງ ຢູ່ຊົນນະບົດ; ຍົກລະດັບ ຄວາມສາມາດ ບໍລິຫານ ທາງຫລວງ ຢູ່ຊົນນະບົດ ຢ່າງຕໍ່ເນື່ອງ; ເພີ່ມທະວີ ຄຸນນະພາບ ການບຳລຸງ ຮັກສາ ທາງຫລວງ ຢູ່ຊົນນະບົດ ຢ່າງຮອບດ້ານ ແລະ ໃຫ້ບໍລິການ ແກ່ການຊຸກຍູ້ ຄວາມຈະເລີນ ຢ່າງຮອບດ້ານ ຢູ່ຊົນນະບົດ ຢ່າງແຂງແຮງ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
