ຂປລ. ແຫລ່ງຂ່າວຈາກ ແຂວງບໍ່ແກ້ວ ໃຫ້ຮູ້ວ່າ: ກອງປະຊຸມຜູ້ບໍລິຫານການສຶກສາ, ວິທະຍາສາດ ແລະ ກິລາ ທົ່ວເມືອງຜາອຸດົມ ປະຈໍາສົກຮຽນ 2024-2025 ໄຂຂຶ້ນໃນວັນທີ 27 ສິງຫາ 2025 ທີ່ສະໂມສອນຂອງເມືອງ ໂດຍການເປັນປະທານ ຂອງທ່ານ ເພັງມະນີ ລໍມະນີ ຫົວໜ້າຫ້ອງການສຶກສາທິການ ແລະ ກິລາເມືອງ, ມີທ່ານ ສົມຊາຍ ສີສະຫວັດ ຮອງຫົວໜ້າພະແນກສຶກສາທິການ ແລະ ກິລາ ແຂວງບໍ່ແກ້ວ, ທ່ານ ສົມນິດ ໄຊທະວົງສິດ ຮອງປະທານ ຄະນະກຳມະການປົກຄອງເມືອງ ມີຜູ້ບໍລິຫານງານສຶກສາທົ່ວເມືອງ ພ້ອມດ້ວຍຫ້ອງການທີ່ກ່ຽວຂ້ອງເຂົ້າຮ່ວມ.

    ກອງປະຊຸມໄດ້ຮັບຟັງບົດລາຍງານຜົນສໍາເລັດການຈັດຕັ້ງປະຕິບັດແຜນພັດທະນາ ຂະແໜງການສຶກສາ ແລະ ກິລາ ສົກຮຽນ 2024-2025, ເຊິ່ງທົ່ວເມືອງຜາອຸດົມ ມີໂຮງຮຽນລ້ຽງເດັກ ແລະ ອະນຸບານ 42 ແຫ່ງ, 78 ຫ້ອງ ມີນັກຮຽນ 2.085 ຄົນ ຍິງ 1.011 ຄົນ, ນັກຮຽນຫລຸດລົງ 51 ຄົນ; ໂຮງຮຽນປະຖົມ ມີ 56 ແຫ່ງ ມີນັກຮຽນຊັ້ນປະຖົມ 5.646 ຄົນ ຍິງ 2.767 ຄົນ ນັກຮຽນເພີ່ມຂຶ້ນ 58 ຄົນ ທຽບໃສ່ສົກຮຽນຜ່ານມາ ໂຮງຮຽນຍຸບ 1 ແຫ່ງ (ມູນລະປະຖົມ ສີບູນເຮືອງ); ໂຮງຮຽນມັດທະຍົມ 11 ແຫ່ງ ໃນນີ້, ມີໂຮງຮຽນມັດທະຍົມຕອນຕົ້ນ 8 ແຫ່ງ, ໂຮງຮຽນມັດທະຍົມສົມບູນ 3 ແຫ່ງ, ນັກຮຽນຊັ້ນມັດທະຍົມມີ 3.722 ຄົນ ຍິງ 1.875 ຄົນ ເພີ່ມຂຶ້ນ 410 ຄົນ, ອັດຕາເຂົ້າຮຽນໃໝ່ສຸດທິຊັ້ນປະຖົມສຶກສາເພີ່ມຈາກ 96% ມາເປັນ 97,5%, ອັດຕາປະລະຂອງນັກຮຽນຊັ້ນປະຖົມ ຫລຸດລົງຈາກ 7,7% ມາເປັນ 3,4%, ອັດຕາເຂົ້າຮຽນລວມມັດທະຍົມຕອນຕົ້ນ ເພີ່ມຈາກ 61,6% ມາເປັນ 78,5%, ອັດຕາປະລະຂອງນັກຮຽນຊັ້ນມັດທະຍົມຕອນຕົ້ນຫລຸດລົງຈາກ 15,3% ມາເປັນ 9,4%, ອັດຕາເຂົ້າຮຽນລວມມັດທະຍົມຕອນປາຍເພີ່ມຈາກ 20,5% ມາເປັນ 31,5%, ອັດຕາປະລະຂອງນັກຮຽນຊັ້ນມັດທະຍົມຕອນປາຍ ຫລຸດລົງຈາກ 21,4% ມາເປັນ 5,6%. ສຳລັບການຈັດຕັ້ງປະຕິບັດ 15 ຄາດໝາຍທີ່ສະພາປະຊາຊົນແຂວງຮັບຮອງ ມີ 12 ຄາດໝາຍທີ່ສາມາດບັນລຸໄດ້ຕາມແຜນ ແລະ ຜົນການສອບເສັງຈົບຊັ້ນສາຍສາມັນສຶກສາ ສົກຮຽນ 2024-2025 ຊັ້ນປະຖົມສຶກສາ ປ1-ປ5 ເສັງໄດ້ 97,08% ຍິງ 98,28% ເສັງຕົກ 2,92%; ຊັ້ນມັດທະຍົມສຶກສາຕອນຕົ້ນ ມ1-ມ4 ເສັງໄດ້ 98,81% ຍິງ 99,03%, ເສັງຕົກ 0,88%; ຊັ້ນມັດທະຍົມສຶກສາຕອນປາຍ ມ5-ມ7 ເສັງໄດ້ 99,39%, ຍິງ 99,51%, ເສັງຕົກ 0,61%.

   ໃນກອງປະຊຸມ ຜູ້ເຂົ້າຮ່ວມຍັງຈະໄດ້ພ້ອມກັນປະກອບຄຳຄິດ-ຄຳເຫັນ, ແລກປ່ຽນບົດຮຽນໃນການຈັດຕັ້ງປະຕິບັດໜ້າທີ່ວຽກງານໄລຍະຜ່ານຕາມຄຳຖາມເຈາະຈີ້ມ ເພື່ອຍົກໃຫ້ເຫັນດ້ານດີຜົນງານ, ດ້ານອ່ອນຂໍ້ຄົງຄ້າງ, ຊອກຫາວິທີແກ້ໄຂ ໃນການຈັດຕັ້ງປະຕິບັດໜ້າທີ່ວຽກງານສຶກສາໃນສົກຮຽນໃໝ່ ໃຫ້ມີຜົນສຳເລັດຕາມແຜນທີ່ໄດ້ກຳນົດໄວ້.

ຂ່າວ-ພາບ: ພອນສະຫວັນ ມະນີສີ 013, 014

KPL