ຂປລ.ຕາມຂ່າວຈາກ ສິງກະໂປ, ນັບແຕ່ວັນທີ 1ກັນຍານີ້ ສິງກະໂປ ຈະບັງຄັບໃຊ້ ການລົງໂທດ ທີ່ຮຸນແຮງຂືຶ້ນ ລວມທັງ ການປັບໄໝ ທີ່ສູງຂຶ້ນ ສຳລັບ ຜູ້ໃຊ້ຢາສູບໄຟຟ້າ ແລະ ການຖືກຕີ ຜູ້ທີ່ລັກ ລອບ ນຳເຂົ້າ ຢາສູບໄຟຟ້າ ທີ່ປະສົມ ຢາໂທມິເດດ(etomidate) ຫລັງຈາກ ທ່ານ ອອງເຢີ ຄັງ, ລັດຖະມົນຕີ ກະຊວງ ສາທາລະນະສຸກ ສິງກະໂປ ຖະແຫລງ ກົດໝາຍໃໝ່ ກ່ຽວກັບ ການເພີ່ມບົດລົງໂທດ ຈາກການສູບຢາໄຟຟ້າ ໃນສິງກະໂປ ຈະບັງຄັບໃຊ້ ຕົ້ນເດືອນກັນຍານີ້ ໂດຍຜູ້ເຮັດຜິດ ຄັ້ງທຳອິິດ ຫາກຍັງ ມີອາຍຸບໍ່ເກີນ 18 ປີ ຕ້ອງກຳນົດໂທດ ປັບໄໝ 500 ໂດລາສິງກະໂປ ຫາກມີອາຍຸ ຫລາຍກວ່າ 18ປີ ຕ້ອງກຳນົດໂທດປັບໄໝ 700ໂດລາສິງກະໂປ ຫາກພົບວ່າ ມີການເຮັດຜິດ ເປັນຄັ້ງທີ 2 ບຸກຄົນ ດັ່ງກ່າວ ຕ້ອງເຂົ້າໂຄງການຟື້ນຟູ ເປັນເວລາ 3ເດືອນ ຊຶ່ງຈະເປັນການບຳບັດ 6ຄັ້ງ ຫາກປະຕິເສດເຂົ້າຮ່ວມ ຫລື ຢູ່ບໍ່ຄົບໂຄງການ ຈະຖືກດຳເນີນຄະດີ ຕາມກົດໝາຍ ເພີ່ມອີກ. ສຳລັບ ການເຮັດຜິດ ຄັ້ງທີ 3 ຫລື ຫລາຍກວ່ານັ້ນ ຜູ້ເຮັດຜິດ ຈະຖືກດຳເນີນຄະດີ ພາຍໃຕ້ກົດໝາຍ ການຄວບຄຸມ ການຂາຍ ແລະ ການໂຄສະນາຢາສູບ ຊຶ່ງມີບົດລົງໂທດ ປັບໄໝ ສູງເຖິງ 2.000 ໂດລາສິງກະໂປ ແລະ ໃນກໍລະນີ ເປັນຊາວຕ່າງປະທດ ອາດຖືກ ເນລະເທດ ແລະ ຫ້າມເດີນທາງ ກັບ ເຂົ້າມາ ໃນສິງກະໂປ ອີກດ້ວຍ. ຂະນະທີ່ ບຸກຄົນ ທີ່ລັກລອບ ນຳເຂົ້າ ຜະລິດຕະພັນ ຢາສູບໄຟຟ້າ ທີ່ປະສົມສານ ເອໂທມີເດດ ຕ້ອງຖືກໂທດ ຕິດຄຸກ ຂັ້ນຕ່ຳ 3 ປີ ແລະ ຖືກຕີ 5 ຄັ້ງ ສ່ວນການລົງໂທດ ຕິດຄຸກ 20ປີ ແລະ ຖືກຕີ 15ຄັ້ງ ແມ່ນຜູ້ຈຳໜ່າຍ ຫລື ສົ່ງຕໍ່ສານດັ່ງກ່າວ ຈະຕ້ອງຕິດຄຸກ ຢ່າງໜ້ອຍ 2 ປີ ແລະ ຖືກຕີ 2 ຄັ້ງ ໂດຍການລົງໂທດ ຕິດຄຸກ ຍາວນານ ສູງສຸດ 10ປີ ແລະ ຖືກຕີ ອີກ 5 ຄັ້ງ.ປັດຈຸບັນ ລັດຖະບານ ສິງກະໂປ ກຳນົດ ບົດລົງໂທດ ລະຫວ່າງ ຜູ້ຂາຍ ກັບຜູ້ໃຊ້ຢາສູບ ໄຟຟ້າ ແຕກຕ່າງກັນ ໂດຍຜູ້ຂາຍ ຕ້ອງຮັບໂທດ ຮຸນແຮງກວ່າ ເນື່ອງຈາກ ເປັນການຫາເງິນ ແລະ ກຳໄລ ຈາກຄວາມທຸກ ຂອງຜູ້ອື່ນ./.

(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ

KPL