ຂປລ.ວິທະຍຸ ກະຈາຍສຽງ ຫວຽດນາມ, ທ່ານ ຟ້າມມິງຈິງ, ນາຍົກລັດຖະມົນຕີ ຫວຽດນາມ ແລະ ທ່ານ ຈີຣີ ບຣາວລີ(Gerry Brownlee),ປະທານ ສະພາແຫ່ງຊາດ ນູແວນເຊລັງ ໄດ້ພົບປະກັນ ໃນວັນທີ 28 ສິງຫາ ຢູ່ນະຄອນຫລວງ ຮ່າໂນ້ຍ ໂດຍທັງສອງຝ່າຍ ຕົກລົງເຫັນດີ ສູນຊົນນຳວົງເງິນການຄ້າສອງສົ້ນ ໃຫ້ບັນລຸ 3 ຕື້ໂດລາສະຫະລັດ ໃນປີ 2026.ນອກນີ້ ການນຳສອງຝ່າຍ ຍັງໄດ້ເຫັນດີ ເປັນເອກະພາບ ເຮັດໃຫ້ການພົວພັນ ຮ່ວມມື ສສ ຫວຽດນາມ - ນູແວນເຊລັງ ເລິກເຊິ່ງ ກວ່າອີກ ໃນທຸກຂົງເຂດຄື: ການເມືອງ, ການທູດ, ແລກປ່ຽນ ຄະນະຜູ້ແທນ ແລະ ການພົບປະຂັ້ນສູງ, ຮັກສາບັນດາກົນໄກ ຮ່ວມມື ສອງຝ່າຍ, ວາງອອກຍຸດທະສາດ ເຊື່ອມຕໍ່ ສອງພື້ນຖານ ເສດຖະກິດໂດຍໄວ, ຊູກຍູ້ການລົງນາມ ບັນດາຂໍ້ຕົກລົງ ຮ່ວມມື ກ່ຽວກັບ ເສດຖະກິດ, ການຄ້າ ແລະ ການລົງທຶນ, ສ້າງຄວາມສະດວກ ໃຫ້ການເປີດປະຕູຕະຫລາດ ຕໍ່ບັນດາຜະລິດ ຕະພັນ ກະສິກຳຂອງກັນ, ມຸ່ງໄປເຖິງເປົ້າໝາຍ ຫັນລະບົບ ສະໜອງ ເປັນຫລາຍຮູບ ຫລາຍແບບ. ພ້ອມກັນນັ້ນ, ຜັນຂະຫຍາຍ ບັນດາ ຂົງເຂດໃໝ່ຄື: ເສດຖະກິດສີຂຽວ, ເສດຖະກິດ ດີຈີຕອນ, ການຫັນເປັນ ດີຈີຕອນ, ວິທະຍາສາດ ເຕັກໂນໂລຢີ ແລະ ນະວັດຕະກຳ, ການຮັບມືກັບ ການປ່ຽນແປງ ຂອງດິນຟ້າອາກາດ, ສືບຕໍ່ຍູ້ແຮງການຮ່ວມມື ດ້ານປ້ອງກັນຊາດ-ປ້ອງກັນຄວາມສະຫງົບ ແລະ ໃນບັນດາການເຄື່ອນໄຫວ ຮັກສາສັນຕິພາບ ຂອງ ສປຊ. ພ້ອມທັງ ເພີ່ມທະວີ ການຮ່ວມມື ດ້ານການສຶກສາ, ບຳລຸງສ້າງ, ພິຈາລະນາ ເປີດເສັ້ນທາງໂດຍກົງ ເຊື່ອມຕໍ່ສອງປະເທດ ເພື່ອແນໃສ່ຊຸກຍູ້ ການພົບປະແລກປ່ຽນ ປະຊາຊົນ ແລະ ການຮ່ວມມື ເສດຖະກິດ, ການຄ້າ ກໍ່ຄື ການຮ່ວມມື ລະຫວ່າງ ບັນດາທ້ອງຖິ່ນ, ສ້າງຄວາມສະດວກ ໃຫ້ແກ່ ບັນດາວິສາຫະກິດ ສອງປະເທດ ຊອກຫາໂອກາດ ດຳເນີນທຸລະກິດ ແລະ ລົງທຶນ. ຕີລາຄາ ກ່ຽວກັບ ຖານະບົດບາດ ແລະ ທີ່ຕັ້ງຂອງ ຫວຽດນາມ.ຈາກນັ້ນ ທ່ານ ປະທານສະພາແຫ່ງຊາດ ນູແວນເຊລັງ ຢັ້ງຢືນວ່າ ສສ ຫວຽດນາມ ແມ່ນຄູ່ຮ່ວມມືສຳຄັນ, ລັດຖະບານ ແລະ ສະພາແຫ່ງຊາດ ນິວຊີແລັນ ໃຫ້ບຸລິມະສິດ ເພີ່ມທະວີ ການພົວພັນກັບ ສສ ຫວຽດນາມ ໃນນະໂຍບາຍ ການຕ່າງປະເທດ ສັງລວມຂອງ ນູແວນເຊລັງ ຢູ່ພາກພື້ນ ແລະ ນູແວນເຊລັງ ໃຫ້ຄຳໝັ້ນສັນຍາ ສະໜັບ ສະໜູນ ການຊຸກຍູ້ ການຮ່ວມມື ກັບ ສສ ຫວຽດນາມ ໃນທຸກຂົງເຂດ ຢ່າງເຂັ້ມແຂງ./.

(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ

KPL