ວັນ​ທີ 1 ຕຸລາ ​ຜ່ານ​ມາ ເປັນ​ວັນສະຖາປະນາ ​ສາທາລະນະ​ລັດ ​ປະຊາຊົນ​ຈີນ ​ຄົບຮອບ 75 ປີ​. 75 ປີ​ທີ່​ຜ່ານ​ມາ, ພັກ​ກອມ​ມູນິດ​ຈີນ ໄດ້​ເຕົ້າໂຮມ ແລະ ​ນຳພາ​ປະຊາຊົນ​ບັນດາ​ເຜົ່າ​ໃນ​ທົ່ວ​ປະ​ເທດຈີນ, ສ້າງ​ສິ່ງ​ມະຫັດສະຈັນ ​ສອງ​ຢ່າງ​ຄື: ເສດຖະກິດພັດທະນາ​ຢ່າງ​ວ່ອງ​ໄວ ​ແລະ ​ສັງຄົມມີຄວາມໝັ້ນຄົງໃນໄລຍະຍາວ,​ ປະເທດຈີນ ມີການປ່ຽນແປງຢ່າງກ້າວກະໂດດ, ການ​ຟື້ນ​ຟູ​ປະ​ເທດ​ຈີນ​ ໄດ້​ເຂົ້າ​ສູ່​ຂະ​ບວນ​ການ​ປະ​ຫວັດ​ສາດ​ທີ່​ປ່ຽນ​ແປງ​ບໍ່​ໄດ້. ໃນ​ການສະແຫວງຫາການ​ພັດ​ທະ​ນາ​ຂອງ​ຕົນ​ເອງ, ປະເທດຈີນ​ ໄດ້ຄໍານຶງເຖິງ​ທົ່ວໂລກຕະຫລອດ, ສະ​ໜອງ​ກາ​ລະ​ໂອ​ກາດ​ໃໝ່​ໃຫ້​ແກ່​ໂລກ​ໃນ​ການ​ພັດ​ທະ​ນາ​ໃໝ່​ຂອງ​ຕົນ, ປະ​ກອບ​ສ່ວນ​ອັນ​ໃຫຍ່​ຫລວງ​ໃຫ້​ແກ່​ສັນ​ຕິ​ພາບ ການ​ພັດ​ທະ​ນາ​ ແລະ ​ຄວາມ​ຈະ​ເລີນ​ຮຸ່ງ​ເຮືອງ​ຂອງ​ໂລກ.​ ໂດຍ​ສະ​ເພາະ ​ນັບ​ແຕ່​ຍຸກສະໄໝ​ໃໝ່, ສະຫາຍ​ເລຂາທິການ​ໃຫຍ່ ປະທານ​ປະ​ເທດ ສີ​ ຈິ້ນ​ຜິ​ງ ​ໄດ້​ສະ​ເໜີ​ສ້າງ​ປະຊາ​ຄົມ​​ຮ່ວມຊາຕາກໍາ​ຂອງ​ມວນ​ມະນຸດຢ່າງເປັນປະດິດສ້າງ, ຮຽກຮ້ອງ​ໃຫ້​ປະຊາຊົນ​ທຸກ​ປະ​ເທດ​ຮ່ວມ​ກັນ, ​ສ້າງ​ໂລກ​ທີ່ມີສັນຕິພາບ​ຍາວນານ ຄວາມ​ໝັ້ນຄົງ​ທົ່ວເຖິງ ວັດທະນາ​ຖາວອນຮ່ວມກັນ ​ເປີດ​ກວ້າງ​ ແລະ ເປັນ​ເອກະ​ພາບ​ກັນ ແລະ ມີຄວາມ​ສະ​ອາດ​​ຄວາມ​ງາມ​. ນີ້​ແມ່ນ​ແຜນການຈີນ ​ຂອງ​ສະຫາຍ​ເລຂາທິການ​ໃຫຍ່ ສີ ​ຈິ້ນ​ຜິ​ງ ​ເພຶ່ອຕອບຄໍາຖາມໃນ​ຍຸກສະໄໝ​ທີ່​ວ່າ "​ເຮົາ​ຄວນ​ສ້າງ​ໂລກ​ແບບ​ໃດ ​ແລະ ຈະ​ສ້າງ​ໂລກ​ນີ້​ແນວ​ໃດ?" ສະຫາຍ​ເລຂາທິການ​ໃຫຍ່ ສີ ​ຈິ້ນ​ຜິ​ງ ຍັງ​ສະເໜີການຫັນເປັນຫລາຍຂົ້ວໃນໂລກທີ່ມີຄວາມສະເໝີພາບ ແລະ ມີສະຖຽນລະພາບ, ການຫັນເປັນ​ໂລກາພິວັດຂອງເສດຖະກິດທີ່ມີ​ຜົນປະໂຫຍດຮ່ວມກັນ, ອັນນີ້ສອດຄ່ອງ​ກັບ​ຄວາມ​ປາຖະໜາ​ຮ່ວມ​ຂອງ​ປະ​ເທດ​ສ່ວນ​ຫລາຍໃນ​ໂລກ​ປັດຈຸ​ບັນ.

ປະເທດຈີນ ​ແລະ ​ປະເທດລາວ ​ມີ​ພູ​ຜາ ​ແລະ ​ແມ່​ນ້ຳ​ຕິດຈອດ​ກັນ, ​ທັງ​ຍຶດ​ໝັ້ນ​ການ​ນຳ​ພາ​ຂອງ​ພັກ​ ແລະ​ເດີນ​ຕາມ​ເສັ້ນ​ທາງ​​ສັງ​ຄົມນິຍົມ, ເປັນຄູ່ຮ່ວມຊາຕາກໍາ ທີມີຄວາມໝາຍ​ຍຸດ​ທະ​ສາດ. ສະຫາຍ​ເລຂາທິການ​ໃຫຍ່ ສີ​ຈິ້ນ​ຜິ​ງ ຊີ້​ໃຫ້ເຫັນ​ວ່າ: ນໍ້າ​ໃຈຄູ່ຮ່ວມຊາຕາກໍາ​ ຈີນ-ລາວ ໄດ້​ຮັບ​ການ​ສ້າງ​ຕັ້ງ​ຂຶ້ນ​ໃນ​ໄລຍະ​​ການ​ຕໍ່ສູ້​ກູ້​ຊາດ​ ແລະ ​ປົດ​ປ່ອຍປະເທດ​ຊາດ. ລູກຫລານນັກປະຕິວັດ 1.074 ຄົນ ໄດ້ໄປອາໄສ ແລະ ສຶກສາຮໍ່າຮຽນຢູ່ໂຮງຮຽນ "67" ທີ່ນະຄອນໜານໜິງ, ເຂດປົກຄອງຕົນເອງເຜົ່າຈວ້າງກວາງຊີ, ຄະນະຊ່ຽວຊານທະຫານຈີນ ໄດ້ແບ່ງປັນຄວາມທຸກຍາກກັບທະຫານ ແລະ ພົນລະເຮືອນລາວ ຢູ່ "ຖ້ຳ" ແຂວງຫົວພັນ, ນີ້​ແມ່ນ​​​ປະຫວັດສາດ​ທີ່​ຈີນ ​ແລະ ​ລາວ ​ຕໍ່ສູ້​ແບບຄຽງ​ບ່າຄຽງໄຫລ່ກັນ​ ແລະ​ ມີໂຊກຊາຕາ​ຮ່ວມ​ກັນ.

ຫລັງຈາກ ສະຫາຍ​ ສີ​ ຈິ້ນ​ຜິ​ງ, ເລຂາທິການ​ໃຫຍ່ ໄດ້ສະເໜີຂໍ້ລິເລີ່ມສ້າງ​ປະຊາ​ຄົມ​​ຮ່ວມຊາຕາກໍາ​ຂອງ​ມວນ​ມະນຸດ, ລາວ ແລະ ຈີນ ໄດ້ມີຄວາມເຫັນເປັນເອກະພາບດ້ານການເມືອງ ກ່ຽວກັບການສ້າງຄູ່ຮ່ວມຊາຕາກໍາ, ທັງໄດ້ເດີນຢູ່ແຖວໜ້າໃນການສ້າງປະຊາຄົນຮ່ວມຊາຕາກໍາມວນມະນຸດ. ປີ 2019, ສະຫາຍ ​ສີ​ ຈິ້ນ​ຜິ​ງ, ເລຂາທິການ​ໃຫຍ່ ກັບການນໍາຝ່າຍລາວ ໄດ້ຮ່ວມກັນລົງນາມແຜນແມ່ບົດ ວ່າດ້ວຍ ການສ້າງຄູ່ຮ່ວມຊາຕາກໍາ ລາວ-ຈີນ, ນີ້ແມ່ນເອກະສານຮ່ວມມື ວ່າດ້ວຍ ຄູ່ຮ່ວມຊາຕາກໍາສະບັບທໍາອິດທີ່ລົງນາມດ້ວຍການນໍາຂອງສອງຝ່າຍ, ເປັນການນໍາພາການສ້າງຄູ່ຮ່ວມຊາຕາກໍາ ລາວ-ຈີນ ຍາດໄດ້ໝາກຜົນຢ່າງໃຫຍ່ຫລວງ. ໃນປີ 2022 ແລະ 2023, ສະຫາຍ ​ສີ​ ຈິ້ນ​ຜິ​ງ, ເລຂາທິການ​ໃຫຍ່ໄດ້ພົບປະກັບ ສະຫາຍ ​ທອງລຸນ ສີສຸລິດ, ເລຂາທິການ​ໃຫຍ່ ເປັນເວລາສອງຄັ້ງ, ໄດ້ພ້ອມກັນກຳນົດການສ້າງຄູ່ຮ່ວມຊາຕາກໍາ ລາວ-ຈີນ ໃຫ້ມີມາດຕະຖານສູງ, ມີຄຸນນະພາບສູງ, ມີລະດັບສູງ. ສືບຕໍ່ລົງນາມແຜນແມ່ບົດສະບັບໃໝ່ທີ່ມີການກໍານົດ 5 ປີ, ເຊິ່ງໄດ້ກາຍເປັນການຊີ້ນໍາໃຫ້ແກ່ການຮ່ວມມືຍຸດທະສາດຮອບດ້ານ ລາວ-ຈີນ ແລະ ການສ້າງຄູ່ຮ່ວມຊາຕາກໍາ ລາວ-ຈີນ ໃນຍຸກໃໝ່.

ຜ່ານການລົງເລິກການຊຸກຍູ້ການສ້າງຄູ່ຮ່ວມຊາຕາກໍາ ລາວ-ຈີນ, ການຮ່ວມມື ລາວ-ຈີນ ກໍໄດ້ຮັບໝາກຜົນແບບບຸກທະລຸຢ່າງຕໍ່ເນື່ອງ. ຈີນໄດ້ກາຍເປັນປະເທດທີ່ລົງທຶນອັນດັບໜຶ່ງຢູ່ລາວ ແລະ ເປັນຄູ່ຄ້າຕົ້ນຕໍມາຫລາຍປີ. ສິນຄ້າກະສິກຳຂອງລາວ ຫລາຍກວ່າ 80% ແມ່ນສົ່ງອອກໄປຈີນ ພ້ອມທັງ ໄດ້​ລົງ​ນາມ​ໃນ​ອະ​ນຸ​ສັນ​ຍາ ສຳລັບ​ຜະ​ລິດ​ຕະ​ພັນ​ກະສິກໍາ ຈໍານວນ 33 ປະ​ເພດ ​ເພື່ອ​ສົ່ງ​ອອກ​ໄປ​ຈີນ​. ປີ 2023, ມູນຄ່າການ​ຄ້າ​ລະ​ຫວ່າງ ​ຈີນ-ລາວ ​ໄດ້​ບັນ​ລຸ 7,1 ຕື້​ໂດ​ລາ​ສະ​ຫະ​ລັດ, ເພີ່ມ​ຂຶ້ນ 26,7% ເມື່ອ​ທຽບ​ໃສ່​ໄລ​ຍະ​ດຽວ​ກັນ​ຂອງ​ປີ 2022, ລາວ ໄດ້​ກາຍ​ເປັນ​ໜຶ່ງໃນປະ​ເທດ​ອາ​ຊຽນ​ທີ່​ມູນຄ່າການຄ້າສອງຝ່າຍກັບຈີນມີ​ການ​ເຕີບ​ໂຕ​ໄວ​ທີ່​ສຸດ​. ເສັ້ນທາງລົດໄຟ ລາວ-ຈີນ ຖືເປັນເສັ້ນທາງແຫ່ງການເຊື່ອມຕໍ່ກັນ, ເສັ້ນທາງແຫ່ງໄຊຊະນະ ແລະ ເສັ້ນທາງແຫ່ງມິດຕະພາບ, ເຮັດໃຫ້ລາວມີອີກທາງເລືອກໜຶ່ງໃນການຂົນສົ່ງທີ່ສຳຄັນຈາກປະເທດທີ່ບໍ່ມີທາງອອກສູ່ທະເລໂດຍກົງ ກາຍເປັນປະເທດທີ່ສາມາດເຊື່ອມຈອດກັບທະເລ, “ເສັ້ນທາງຄໍາ” ທາງດ້ານການຂົນສົ່ງສາກົນທີ່ມີປະສິດທິພາບ ແລະ ສະດວກວ່ອງໄວຖືກສ້າງຂຶ້ນໃນລະຫວ່າງ ລາວ-ຈີນ ແລະ ທົ່ວພາກພື້ນອາຊີຕາເວັນອອກສຽງໃຕ້. ​ໃນ​ແຕ່​ລະ​ມື້, ​ລົດ​ໄຟ​ໂດຍສານ​ສາກົນ “ຟູ​ຊິງ” ຈາກ​ຄຸນ​ໝິງ ​ແລະ “​ລ້ານ​ຊ້າງ” ຈາກ​ນະຄອນຫລວງ​ວຽງ​ຈັນ “​ແລ່ນ​ທັງ​ສອງ​ທິດ”, ໄປມາບໍ່ຂາດສາຍ, ໄດ້ຕິດພັນກັບຊີວິດ​ປະຈຳ​ວັນ​ຂອງ​ປະຊາຊົນ​ສອງ​ປະ​ເທດ​ຢ່າງ​ເລິກ​ເຊິ່ງ, ກາຍເປັນສັນຍະລັກສໍາຄັນແຫ່ງຄູ່ຮ່ວມຊາຕາກໍາ ລາວ-ຈີນ. ເສັ້ນທາງດ່ວນ ລາວ-ຈີນ ຈາກ ວຽງຈັນໄປຫາວັງວຽງ ໄດ້ເປີດໃຊ້ເປັນທາງການ, ຂົງເຂດການຮ່ວມມືດ້ານໄຟຟ້າ, ພະລັງງານ ແລະ ບໍ່ແຮ່ ໄດ້ສືບຕໍ່ຢ່າງຕໍ່ເນື່ອງ ແລະ ລົງເລິກ, ໂຮງໝໍມິດຕະພາບຫລວງພະບາງ, ໂຮງໝໍມະໂຫສົດ ແລະ ວິທະຍາໄລວິຊາຊີບລົດໄຟ ເຊິ່ງເປັນໂຄງການດໍາລົງຊີວິດຂອງປະຊາຊົນໄດ້ນໍາໃຊ້ເປັນທາງການ, ກໍໄດ້ມີ​ບົດບາດ​ອັນ​ຕັ້ງໜ້າ​ໃນ​ການ​ສືບ​ຕໍ່​ຮັດ​ແໜ້ນ​ສາຍ​ພົວພັນ​ມິດຕະພາບ​ທີ່​ເປັນ​ມູນ​ເຊື້ອ​ລະຫວ່າງ​ ຈີນ​-ລາວ ​ໃຫ້​ເລິກ​ເຊິ່ງ ​ແລະ ມີ​ຜົນ​ດີ​ຕໍ່​ປະຊາຊົນ​ສອງ​ປະ​ເທດ.

ພ້ອມດຽວກັນ, ການແລກປ່ຽນວັດທະນະທໍາ ແລະ ສັງຄົມກໍ່ໄດ້ໃກ້ຊິດກວ່າ​​ເກົ່າ, ໂດຍສະເພາະພາຍຫລັງເສັ້ນທາງລົດໄຟ ລາວ-ຈີນ ໄດ້ເປີດບໍລິການແລ້ວ, ຜູ້ໂດຍສານສາມາດໄປຄຸນໝິງ ກິນເຂົ້າປຸ້ນໃນຕອນເຊົ້າແລ້ວອອກເດີນທາງ, ຕອນບ່າຍ ກໍສາມາດໄປຫລວງພະບາງ ຊົມຫໍພິພິທະພັນພະລາດຊະວັງ, ໄປວຽງຈັນດື່ມເບຍລາວໃນຕອນແລງ. ໃນ 6 ເດືອນຕົ້ນປີນີ້, ນັກທ່ອງທ່ຽວຈີນທີ່ເຂົ້າມາລາວມີ 560.000 ຄົນ, ຫລາຍກວ່າກ່ອນການເກີດໂລກລະບາດຂອງພະຍາດໂຄວິດ-19. ຊາວໜຸ່ມຂອງສອງປະເທດກໍ່ມີຄວາມໃກ້ຊິດກັນຫລາຍຂຶ້ນ, ຝ່າຍຈີນ ໄດ້ສົ່ງຊາວໜຸ່ມອາສາສະໝັກ 12 ຊຸດມາລາວ, ນັກສຶກສາຈີນ ຫລາຍຮ້ອຍຄົນຮຽນຢູ່ລາວ ແລະ ນັກສຶກສາລາວ ຫລາຍພັນຄົນໄດ້ໄປຮຽນຢູ່ຈີນ. ພາສາຈີນ ແມ່ນສາຂາວິຊາໜຶ່ງທີ່ໄດ້ຮັບຄວາມນິຍົມຫລາຍທີ່ສຸດໃນການສຶກສາຮ່ຳຮຽນຢູ່ມະຫາວິທະຍາໄລແຫ່ງຊາດລາວ. ຄອບຄົວຄົນຈີນ ແລະ ຄົນລາວ ສ່ວນຫລາຍໄດ້ນຳໃຊ້ຕິກຕ໋ອກ (TIKTOK) ແລະ ໄດ້ກາຍເປັນຂົວເຊື່ອມຕໍ່່ລະຫວ່າງ ຈີນກັບລາວ.

ສປປ ລາວ ເປັນປະທານໝູນວຽນ ຂອງອາຊຽນໃນປີນີ້ ແລະ ມີບົດບາດສຳຄັນໃນການຊຸກຍູ້ການຮ່ວມມື ຈີນ-ອາຊຽນ. ຝ່າຍຈີນ ຈະສືບຕໍ່ສະໜັບສະໜູນລາວຢ່າງເຕັມທີ່ໃນການປະຕິບັດໜ້າທີ່ປະທານໝູນວຽນຂອງອາຊຽນ ແລະ ຈັດກອງປະຊຸມຜູ້ນຳໃຫ້ໄດ້ດີ, ຈີນ ແລະ ອາຊຽນ ເປັນບ້ານໃກ້ເຮືອນຄຽງ ແລະ ຄູ່ຮ່ວມມືສະໜິດແໜ້ນທີ່ຊ່ວຍເຫລືອເຊິ່ງກັນ ແລະ ກັນ. ຈີນແມ່ນປະເທດລ່ວງໜ້າທີ່ໄດ້ເຊັນສັນຍາ TAC, ເຈລະຈາກັບອາຊຽນ ເພື່ອສ້າງເຂດການຄ້າເສລີ, ສ້າງການພົວພັນຄູ່ຮ່ວມມືຍຸດທະສາດຮອບດ້ານກັບອາຊຽນ, ສະໜັບສະໜູນຖານະໃຈກາງຂອງອາຊຽນໃນການຮ່ວມມືພາກພື້ນ ແລະ ໄດ້ສະແດງຄວາມສົນໃຈໃນເຊັນບົດສັນຍາ SEANWFZ.

ໃນປີ 2021, ສະຫາຍ ສີຈິ້ນຜິງ, ປະທານປະເທດ ແຫ່ງ ສປ ຈີນ ແລະ ສະຫາຍ ທອງລຸນ ສີສຸລິດ, ປະທານປະເທດແຫ່ງ ສປປ ລາວ ກັບການນຳບັນດາປະເທດອາຊຽນ ພ້ອມກັນປະກາດສ້າງສາຍພົວພັນຄູ່ຮ່ວມມືຍຸດທະສາດຮອບດ້ານລະຫວ່າງ ຈີນ-ອາຊຽນ, ສະເໜີຮ່ວມກັນສ້າງວົງຄະນາຍາດທີ່ມີຄວາມສັນຕິພາບ, ຄວາມສະຫງົບ, ຄວາມຈະເລີນຮຸ່ງເຮືອງ, ຄວາມສວຍງາມ ແລະ ມິດຕະພາບ, ໄດ້ຊີ້ທິດເຍືອງທາງໃຫ້ແກ່ການພັດທະນາສາຍພົວພັນລະຫວ່າງຈີນ-ອາຊຽນ ໃນອະນາຄົດ. ມາຮອດປັດຈຸບັນ, ປະເທດຈີນກັບຫລາຍປະເທດອາຊຽນ ໄດ້ມີຄວາມຮັບຮູ້ເປັນເອກະພາບກັນ ກ່ຽວກັບການສ້າງປະຊາຄົມຮ່ວມຊາຕາກຳລະຫວ່າງ ຈີນ-ອາຊຽນ, ການໄວ້ເນື້ອເຊື່ອໃຈທາງດ້ານການເມືອງລະຫວ່າງສອງຝ່າຍ ນັບມື້ນັບແໜ້ນແຟ້ນຂຶ້ນ. ປະເທດຈີນ ເປັນຄູ່ຮ່ວມການຄ້າໃຫຍ່ອັນດັບໜຶ່ງຂອງອາຊຽນ 15 ປີລຽນຕິດ, ອາຊຽນ ເປັນເປັນຄູ່ຮ່ວມການຄ້າໃຫຍ່ອັນດັບໜຶ່ງຂອງຈີນ 4 ປີ ລຽນຕິດ, ການເຈລະຈາສ້າງເຂດການຄ້າເສລີ ຈີນ-ອາຊຽນ ສະບັບ 3,0 ໄດ້ຮັບຄວາມຄືບໜ້າຢ່າງຕັ້ງໜ້າ. ທາງລົດໄຟ ຈີນ-ລາວ, ທາງລົດໄຟຄວາມໄວສູງຈາກາຕາ-ບັນດຸງ, ຂະບວນລົດຂ້າມຊາດ ຈີນ-ລາວ-ໄທ-ມາເລເຊຍ, ຊ່ອງທາງໃໝ່ການຄ້າທາງບົກ ແລະ ທາງທະເລສາກົນ ແລະ ໝາກຜົນຂອງການສ້າງ "ໜຶ່ງແລວ ໜຶ່ງເສັ້ນທາງ" ໄດ້ເສີມຂະຫຍາຍບົດບາດນັບມື້ນັບຫລາຍຂຶ້ນ. ປີນີ້ແມ່ນປີແລກປ່ຽນວັດທະນະທຳລະຫວ່າງ ຈີນ-ອາຊຽນ, ສອງຝ່າຍ ໄດ້ຈັດ 100 ກວ່າກິດຈະກຳ ເພື່ອສະເຫລີມສະຫລອງ, ໂດຍມີກິດຈະກຳໃນທຸກອາທິດ ແລະ ມີຈຸດເດັ່ນໃນທຸກເດືອນ, ໄດ້ຊຸກຍູ້ການໄປມາຫາສູ່ກັນລະຫວ່າງປະຊາຊົນ ແລະ ການແລກປ່ຽນ ແລະ ການຮ່ວມມືໃນຂົງເຂດຕ່າງໆ. ສາມາດເວົ້າໄດ້ວ່າ ຈີນກັບອາຊຽນ ໄດ້ກາຍເປັນຕົວແບບທີ່ມີຜົນສຳເລັດ ແລະ ມີຊີວິດຊີວາຫລາຍກວ່າໝູ່ໃນການຮ່ວມມືອາຊີປາຊິຟິກ ແລະ ຕົວແບບຕົວຈິງໃນແກ່ການສ້າງປະຊາຄົມຮ່ວມຊາຕາກຳ ຂອງມວນມະນຸດ.

ການຈັດຕັ້ງປະຕິບັດກໍ່ສ້າງຄູ່ຮ່ວມຊາຕາກຳ ຈີນ-ລາວ ແລະ ຈີນ-ອາຊຽນ ໄດ້ຢືນຢັນໃຫ້ໂລກວ່າ: ການກໍ່ສ້າງຄູ່ຮ່ວມຊາຕາກຳມີຄວາມເປັນໄປໄດ້ ມີຄວາມເຊື່ອໃຈ ແລະ ມີອະນາຄົດຢ່າງໃຫຍ່ຫລວງ. ຖ້າປະຊາຊົນທຸກປະເທດຮ່ວມມືກັນ, ຍຶດໝັ້ນການກໍ່ສ້າງຮ່ວມກັນ ແລະ ໄດ້ຮັບຜົນປະໂຫຍດຮ່ວມກັນ, ແນ່ນອນຈະສ້າງອະນາຄົດທີ່ມີຄວາມສິວິໄລໃຫ້ແກ່ສັງຄົມຂອງມວນມະນຸດໄດ້. ໃນປັດຈຸບັນນີ້, ປະຊາຊົນຈີນ ກຳລັງຊຸກຍູ້ການສ້າງສາປະເທດທີ່ເຂັ້ມແຂງ ແລະ ພາລະກິດອັນຍິ່ງໃຫຍ່ແຫ່ງການຟື້ນຟູຄວາມຈະເລີນຮຸ່ງເຮືອງຂອງຊົນຊາດຢ່າງຮອບດ້ານດ້ວຍຄວາມທັນສະໄໝແບບຈີນ. ກອງປະຊຸມຄົບຄະນະ ຄັ້ງທີ 3 ຂອງຄະນະກຳມະການສູນກາງພັກກອມມູນິດຈີນ ສະໄໝທີ XX ໄດ້ກຳນົດມາດຕະການດ້ານການລົງເລິກການປະຕິຮູບຢ່າງຮອບດ້ານຕື່ມອີກ ເພື່ອຊຸກຍູ້ຄວາມທັນສະໄໝແບບຈີນ. ຝ່າຍຈີນ ຍິນດີຖືເອົາກາລະໂອກາດໃໝ່ກັບປະເທດລາວ ແລະ ປະເທດອາຊຽນອື່ນ, ເປີດກວ້າງການຮ່ວມມືກັນໃນຂະແໜງການໃໝ່, ເພີ່ມກຳລັງແຮງເຂົ້າໃນການພັດທະນາຂອງຕົນເອງ ແລະ ການກໍ່ສ້າງຄູ່ຮ່ວມຊາຕາກຳຮ່ວມກັນ, ສ້າງຜົນປະໂຫຍດຕົວຈິງໃໝ່ໃຫ້ແກ່ປະຊາຊົນຂອງພາກພື້ນນີ້.

ໃນເມື່ອການລົງນາມແຜນແມ່ບົດກໍ່ສ້າງຄູ່ຮ່ວມຊາຕາກຳ ລາວ-ຈີນ ສະບັບໃໝ່ ຄົບຮອບ 1 ປີນັ້ນ, ອີງຕາມການເຊື້ອເຊີນຂອງ ທ່ານນາຍົກລັດຖະມົນຕີ ສອນໄຊ ສີພັນດອນ, ນາຍົກລັດຖະມົນຕີ ຫລີ ສຽງ ຈະເດີນທາງມາເຂົ້າຮ່ວມກອງປະຊຸມສຸດຍອດ ຈີນ-ອາຊຽນ ຄັ້ງທີ 27, ກອງປະຊຸມສຸດຍອດ ອາຊຽນ-ຈີນ-ຍິ່ປຸ່ນ ແລະ ສ.ເກົາຫລີ ຄັ້ງທີ 27 ແລະ ກອງປະຊຸມສຸດຍອດອາຊີຕະເວັນອອກຄັ້ງທີ 19 ແລະ ຖືໂອກາດນີ້ ດໍາເນີນການຢ້ຽມຢາມ ສປປ ລາວ ຢ່າງເປັນທາງການ. ເຊິ່ງນີ້ ເປັນການມາເຂົ້າຮ່ວມກອງປະຊຸມ ແລະ ຢ້ຽມຢາມທາງການອີກຄັ້ງໜຶ່ງ ຂອງນາຍົກລັດຖະມົນຕີຈີນ ພາຍຫລັງ ປີ 2016, ມີຄວາມໝາຍສໍາຄັນຕໍ່ ຈີນ-ລາວ ຮ່ວມປົກປັກຮັກສາທິດທາງທີ່ຖືກຕ້ອງ ຂອງການຮ່ວມມືອາຊີຕາເວັນອອກ ແລະ ລົງເລິກການກໍ່ສ້າງຄູ່ຮ່ວມຊາຕາກຳ.

ໃນກອງປະຊຸມສຸດຍອດການຮ່ວມມືອາຊີຕາເວັນອອກຄັ້ງນີ້, ນາຍົກລັດຖະມົນຕີ ຫລີ ສຽງ ຈະແລກປ່ຽນຄຳຄິດເຫັນໃນຫົວຂໍ້ສຳຄັນຂອງການຮ່ວມມືພາກພື້ນ, ເພີ່ມທະວີຄວາມສາມັກຄີ ແລະ ປະສານງານກັນ, ຮ່ວມນຳໃຊ້ໂອກາດການພັດທະນາ, ຮ່ວມຮັບມືຕໍ່ສິ່ງທ້າທາຍ, ສົມທົບກຳລັງແຮງເຂົ້າໃນການກໍ່ສ້າງປະຊາຄົມອາຊຽນ ເພື່ອປະກອບສ່ວນອັນຍິ່ງໃຫຍ່ກ່ວາເກົ່າ ເຂົ້າໃນການກໍ່ສ້າງຄູ່ຮ່ວມຊາຕາກຳ ຈີນ-ອາຊຽນ ທີ່ແໜັ້ນແຟ້ນຍິ່ງໆຂຶ້ນ ແລະ ຊຸກຍູ້ສັນຕິພາບ ແລະ ຄວາມຈະເລີນຮຸ່ງເຮືອງຂອງພາກພື້ນ. ໃນໄລຍະຢ້ຽມຢາມລາວ ຢ່າງເປັນທາງການ, ນາຍົກລັດຖະມົນຕີ ຫລີ ສຽງ ຈະແລກປ່ຽນຄໍາຄິດເຫັນຢ່າງເລິກເຊິ່ງກັບຜູ້ນໍາຝ່າຍລາວ ກ່ຽວກັບການສືບຕໍ່ຈັດຕັ້ງຜັນຂະຫຍາຍບັນດາຂໍ້ຕົກລົງເປັນເອກະພາບກັນຂອງຜູ້ນຳສູງສຸດ ຈີນ-ລາວ ລາວ-ຈີນ ໃນໄລຍະຜ່ານມາ, ລົງເລິກການຮ່ວມມືຍຸດທະສາດຮອບດ້ານ ແລະ ກໍ່ສ້າງຄູ່ຮ່ວມຊາຕາກຳ ລາວ-ຈີນ ແລະ ເປັນຜູ້ສັກຂີພິຍານຕໍ່ການລົງນາມເອກະສານຮ່ວມມືສອງຝ່າຍ. ຝ່າຍຈີນເຊື່ອວ່າ: ພາຍໃຕ້ຄວາມພະຍາຍາມຮ່ວມກັນຂອງສອງຝ່າຍ, ການມາເຂົ້າຮ່ວມກອງປະຊຸມ ແລະ ຢ້ຽມຢາມຂອງນາຍົກລັດຖະມົນຕີ ຫລີ ສຽງ ຄັ້ງນີ້, ແນ່ນອນຈະໄດ້ຮັບຜົນປະໂຫຍດຢ່າງຈົບງາມ, ເສີມຂະຫຍາຍການພົວພັນຮ່ວມມືສອງຝ່າຍ ຈີນ-ລາວ ລາວ-ຈີນ ແລະ ການກໍ່ສ້າງຄູ່ຮ່ວມຊາຕາກຳ ຈີນ-ອາຊຽນ.ໂດຍ: ສະຫາຍ ຟັ່ງຫົງ, ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປ ຈີນ ປະຈໍາ ສປປ ລາວ

KPL