*ເມືອງວຽງທອງ ແຂວງບໍລິຄຳ ເປັນອີກເມືອງໜຶ່ງທີ່ມີທ່າແຮງ ຫລາຍດ້ານໃນການພັດທະນາເສດຖະກິດ-ສັງຄົມໃຫ້ມີການຂະຫຍາຍຕົວ, ການແກ້ໄຂຄວາມທຸກຍາກຂອງປະຊາຊົນ ແລະ ອື່ນໆ.

       ແນວໃດກໍ່ດີ ເພື່ອເຮັດໃຫ້ຄວາມທຸກຍາກນັບມື້ຫລຸດລົງເທື່ອລະກ້າວນັ້ນ, ການນຳເມືອງດັ່ງກ່າວ ໄດ້ກຳນົດຫລາຍມາດຕະການໃຫຍ່ໃນ ການແກ້ໄຂຄວາມທຸກຍາກຂອງປະຊາຊົນ. ອັນພົ້ນເດັ່ນແມ່ນຕັ້ງໜ້າໂຄສະນາສຶກສາອົບຮົມພໍ່ແມ່ປະຊາຊົນຕື່ນຕົວເຂົ້າໃນການພັດທະນາ, ການພັດທະນາເສດຖະກິດ-ສັງຄົມ, ນະໂຍບາຍແກ້ໄຂຄວາມທຸກຍາກເປັນຕົ້ນຍົກເວັ້ນເກັບພາສີອາກອນ ຫລື ນະໂຍບາຍການປຸກສ້າງທີ່ດິນສະຖານທີ່ຕ່າງໆເຫລົ່ານີ້ເປັນຕົ້ນ.

        ທ່ານ ຄຳມອນ ໄຊພົມມີ ເຈົ້າ ເມືອງວຽງທອງໃຫ້ສຳພາດເມື່ອ ບໍ່ດົນມານີ້ວ່າ: ເມືອງຕົນແມ່ນ ເມືອງໜຶ່ງຢູ່ຊົນນະບົດ ທັງເປັນເມືອງທຸກຍາກຂາດເຂີນ, ແຕ່ອີງໃສ່ແນວທາງນະໂຍບາຍຂອງພັກ-ລັດຖະບານບວກໃສ່ການເອົາໃຈໃສຂອງການນຳທຸກຂັ້ນຂອງເມືອງ, ທຸກຂະແໜງການທີ່ໄດ້ຕັ້ງໜ້າຊຸກຍູ້ ສົ່ງເສີມປະຊາຊົນບັນດາເຜົ່າຈັດຕັ້ງ ປະຕິບັດແຜນພັດທະນາເສດຖະກິດ-ສັງຄົມຂອງເມືອງຕິດພັນກັບການພັດທະນາເສດຖະກິດຄອບຄົວ.

        ສົ່ງຜົນເຮັດໃຫ້ມາຮອດດຽວນີ້, ດ້ານເສດຖະກິດ-ສັງຄົມມີການຂະຫຍາຍຕົວ, ຄວາມທຸກຍາກ, ຊີວິດການເປັນຢູ່ໄດ້ຮັບການປັບປຸງຢ່າງຕັ້ງໜ້າ ແລະ ມີຢູ່ມີກິນ. ແຕ່ເຖິງຢ່າງໃດກໍ່ຕາມ ເພື່ອເຮັດໃຫ້ຄວາມທຸກຍາກນັບມື້ຖືກແກ້ໄຂຫລຸດລົງຢ່າງສິ້ນເຊີງນັ້ນ, ອົງຄະນະພັກເມືອງຕົນກໍ່ໄດ້ມີຫລາຍມາດຕະການແກ້ໄຂໃນຕໍ່ໜ້າ ໂດຍສະເພາະແມ່ນການໂຄສະນາສຶກສາອົບຮົມພໍ່ແມ່ປະຊາຊົນຕື່ນຕົວເຂົ້າຮ່ວມແນວທາງນະໂຍບາຍຂອງພັກ-ລັດ, ກຳນົດເອົາການພັດທະນາເສດຖະກິດ-ສັງຄົມເຂົ້າໃສ່ ແລະ ນະໂຍບາຍທີ່ເອີ້ນວ່າ ແກ້ໄຂຄວາມທຸກຍາກຂອງພໍ່ແມ່ປະຊາຊົນບໍ່ເກັບພາສີອາກອນ ຫລື ວ່ານະໂຍບາຍການປຸກສ້າງສະຖານທີ່ດິນຕ່າງໆຂອງປະຊາຊົນ ແລະ ອື່ນໆ ທີ່ຕິດພັນກັບການ ແກ້ໄຂຄວາມທຸກຍາກ.

       ທ່ານເຈົ້າເມືອງກ່າວຕື່ມວ່າ: ມາຮອດປັດຈຸບັນນີ້, ອີງຕາມດຳລັດ 348 ຂອງລັດຖະບານ ຖືວ່າ ເມືອງວຽງທອງ ຍັງບໍ່ທັນໄດ້ປະກາດເປັນເມືອງພົ້ນທຸກເທື່ອ, ແຕ່ການຈັດຕັ້ງບັນດາມາດຖານພົ້ນທຸກຕ່າງໆນັ້ນ ແມ່ນຍັງເຫລືອພຽງແຕ່ມາດຖານດຽວຄື: ມາດຖານເສັ້ນທາງຄົມມະນາຄົມເຂົ້າໄປເຖິງທຸກບ້ານຍັງເຫລືອ 9 ບ້ານເສັ້ນທາງຍັງບໍ່ທັນໄປເຖິງ. ສ່ວນມາດຖານອື່ນໆແມ່ນສາມາດຈັດຕັ້ງປະຕິບັດໄດ້ຕາມມາດຖານແລ້ວ. ຂະນະທີ່ປັດຈຸບັນ ຍັງເຫລືອບ້ານທຸກຍາກ 9 ບ້ານ ແລະ ບ້ານພົ້ນທຸກມີ 25 ບ້ານ.

      ແນວໃດກໍ່ຕາມສຳລັບບ້ານທີ່ ຍັງທຸກຍາກນັ້ນ ກໍ່ມີແຜນຈະສູ້ຊົນພັດທະນາເສັ້ນທາງໃຫ້ເຂົ້າໄປຮອດໄປເຖິງ ເພື່ອສະດວກສະບາຍໃນການແກ້ໄຂຄວາມທຸກຍາກໃຫ້ຫລຸດໜ້ອຍຖອຍລົງເທື່ອລະກ້າວ.

KPL