ຂປລ. ກອງປະຊຸມສະພາເຂດ ການຄ້າເສລີອາຊຽນ ຄັ້ງທີ 38 ຈັດ​ຂຶ້ນໃນວັນທີ 16 ກັນຍາ 2024 ຢູ່ນະຄອນຫລວງວຽງຈັນ ໂດຍການເປັນປະທານຂອງ ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກໍາ ແລະ ການຄ້າ ແຫ່ງ ສປປ ລາວ, ມີ ທ່ານ ກາວ ກິມ ຮຸນ ເລຂາທິການໃຫຍ່ອາຊຽນ, ມີບັນດາລັດຖະມົນຕີສະພາເຂດການຄ້າເສລີອາຊຽນ, ລັດຖະມົນຕີ ກະຊວງການຄ້າ ແລະ ອຸດສາຫະກໍາ ຈາກປະເທດ ຕີ​ມໍ​ແລັດສະ​ເຕ, ມີຫົວໜ້າຄະນະຜູ້ແທນຂອງປະເທດສະມາຊິກອາຊຽນ ເຂົ້າຮ່ວມ.

ທ່ານ ມະໄລທອງ ກົມມະສິດ ໄດ້ມີ​ຄຳ​ເຫັນ​ວ່າ: ກອງປະຊຸມຄັ້ງນີ້, ສະແດງເຖິງຄວາມໝາຍໝັ້ນ ຂອງປະເທດສະມາຊິກ ທີ່ຈະສືບຕໍ່ຮ່ວມກັນເພື່ອສ້າງໃຫ້ອາຊຽນ ກາຍເປັນຖານການຜະລິດໜຶ່ງດຽວ ທີ່ມີຄວາມສາມາດດ້ານການແຂ່ງຂັນໃນພາກພື້ນ ເຊິ່ງກອງປະຊຸມຄັ້ງນີ້, ຈະໄດ້ສືບຕໍ່ເພີ່ມທະວີ ການເຊື່ອມໂຍງ ການຄ້າດ້ານສິນຄ້າ ໃນພາກພື້ນຂອງພວກເຮົາ ໃຫ້ກວ້າງຂວາງ ແລະ ເລິກເຊິ່ງຕື່ມອີກ, ພ້ອມທັງ ຈະໄດ້ສຸມໃສ່ປຶກສາຫາລື, ພິຈາລະນາ ແລະ ຮັບຮອງເອົາ ບົດລາຍງານຂອງ ຄະນະເຈົ້າໜ້າທີ່ອາວຸໂສເສດຖະກິດອາຊຽນ, ບົດລາຍງານຄະນະເຈລະຈາ ຍົກລະດັບສັນຍາການຄ້າ ດ້ານສິນຄ້າອາຊຽນ ແລະ ຖະແຫລງການຮ່ວມຂອງກອງປະຊຸມ ສະພາເຂດການຄ້າເສລີອາຊຽນ ຄັ້ງທີ 38.

ນັບແຕ່ອາຊຽນ ໄດ້ສ້າງຕັ້ງເຂດການຄ້າເສລີອາຊຽນ ໃນປີ 1992 ເປັນຕົ້ນມາ, ພາກພື້ນອາຊຽນ ໄດ້ມີການພັດທະນາຢ່າງຕໍ່ເນື່ອງ ໂດຍສະເພາະ ການຫລຸດຜ່ອນ ແລະ ລົບລ້າງອັດຕາພາສີ, ການສ້າງຄວາມສະດວກທາງດ້ານການຄ້າ ແລະ ການຫັນເປັນທັນສະໄໝ ດ້ານການເຊື່ອມໂຍງ ລະບົບແຈ້ງພາສີ ແລະ ອື່ນໆ. ມາຮອດປັດຈຸບັນ, ອາຊຽນ ໄດ້ລົບລ້າງອັດຕາພາສີເກືອບ ໝົດທຸກລາຍການສິນຄ້າ ກວມເອົາ 98,6% ຂອງລາຍການອັດຕາພາສີທັງໝົດ ແລະ ສືບຕໍ່ພັດທະນາລະບົບແຈ້ງພາສີ ປະຕູດຽວອາຊຽນຢ່າງຕໍ່ເນື່ອງ ເຊິ່ງເປັນການຫລຸດຜ່ອນຕົ້ນທຶນການຄ້າ ແລະ ອໍານວຍຄວາມສະດວກ ແກ່ພາກທຸລະກິດ ໃນພາກພື້ນຂອງພວກເຮົາ. ບັນດາຜົນສໍາເລັັດດັ່ງກ່າວ ໄດ້ຊຸກຍູ້ການຄ້າພາຍໃນອາຊຽນ ໃຫ້ມີການຂະຫຍາຍຕົວ, ສະແດງອອກ ໃນປີ 2023 ມູນຄ່າການຄ້າພາຍໃນອາຊຽນ ສາມາດບັນລຸໄດ້ 759 ຕື້ ໂດລາສະຫະລັດ, ກວມເອົາ 21,5 % ຂອງມູນຄ່າການຄ້າທັງໝົດຂອງອາຊຽນ.

ທ່ານ ມະໄລທອງ ກົມມະສິດ ຍັງ​ໃຫ້​ຮູ້ອີກວ່າ: ໃນປີຜ່ານມາ, ພວກເຮົາໄດ້ຈັດຕັ້ງປະຕິບັດບັນ ດາແຜນວຽກກ່ຽວກັບ ການສ້າງເຂດການຄ້າເສລີອາຊຽນ ໄດ້ບັນລຸຕາມເປົ້າໝາຍຫລາຍດ້ານ ໂດຍສະເພາະ ພວກເຮົາສາມາດແກ້ໄຂ ບັນດາຂໍ້ຄົງຄ້າງ ທີ່ເກີດຈາກການຈັດຕັ້ງປະຕິບັດ ສັນຍາການຄ້າດ້ານສິນ ຄ້າອາຊຽນ ແລະ ການນໍາໃຊ້ການແລກປ່ຽນບັນດາເອກະສານ ການຄ້າແບບເອເລັກໂຕຣນິກ ຜ່ານລະບົບບໍລິການແຈ້ງ ພາສີປະຕູດຽວອາຊຽນ. ພ້ອມນັ້ນ, ຂໍສະແດງຄວາມຊົມເຊີຍ ຕໍ່ຄວາມຄືບໜ້າຂອງ ການເຈລະຈາຍົກລະດັບສັນຍາ ການຄ້າດ້ານສິນຄ້າອາຊຽນ ແລະ ຫວັງຢ່າງຍິ່ງວ່າ ການເຈລະຈາຍົກລະດັບສັນຍາດັ່ງກ່າວ ຈະສາມາດສຳເລັດໃນປີ 2025 ຕາມທີ່ໄດ້ກໍານົດໄວ້.

ຂ່າວ: ສົມຫວັງ

ພາບ: ເກດສະໜາ

KPL