*ການສໍາຫລວດພົນ ລະເມືອງ ແລະ ທີ່ຢູ່ອາໄສ ແມ່ນໜຶ່ງວຽກງານທີ່ໃຊ້ເວລາ, ຊັບຊ້ອນ ແລະ ໃຫຍ່ທີ່ສຸດໃນປະເທດ ເຊິ່ງຈະຕ້ອງໄດ້ຮັບການຈັດຕັ້ງປະຕິບັດ ໂດຍຜ່ານການຊ່ວຍເຫລືອທີ່ເປັນບຸລິມະສິດ. ດ້ວຍເຫດນັ້ນ ກ່ອນຈະດໍາເນີນການສໍາຫລວດຕົວຈິ່ງ ຈຶ່ງໄດ້ມີການທົດລອງສໍາຫລວດພົນລະເມືອງ ເນື່ອງຈາກຈະຊ່ວຍໃຫ້ສາມາດທົດສອບບັນ ດາອົງປະກອບຕ່າງໆຂອງການສໍາຫລວດພົນລະເມືອງ ເປັນຕົ້ນແບບສອບຖາມ, ການກະກຽມບຸກຄະລາກອນເກັບກໍາຂໍ້ມູນ, ແຜນການໂຄສະນາພ້ອມທັງສ້າງຄວາມເຂົ້າໃຈ ແລະ ການຮ່ວມມືຂອງພົນລະເມືອງ.

ໃນການສໍາຫລວດ ນັກເດີນສໍາຫລວດ ຈະຖາມຄໍາຖາມກັບຫົວໜ້າຄົວເຮືອນ ກ່ຽວກັບຜູ້ຢູ່ອາໄສປົກກະຕິ ແລະ ຄຸນລັກສະນະດ້ານພົນລະເມືອງ ແລະ ເສດຖະກິດ-ສັງຄົມຂອງພວກເຂົາ, ຈະມີຫລາຍຄໍາຖາມກ່ຽວກັບອາຍຸ, ສະຖານະພາບການແຕ່ງງານ, ສາສະໜາ, ພາສາ, ຄວາມຫຍຸ້ງຍາກດ້ານໜ້າທີ່ການ, ສະຖານທີ່ຢູ່ອາໄສຜ່ານມາ ແລະ ປັດຈຸບັນ, ການສຶກສາ, ການຈ້າງງານ, ຈໍານວນລູກທີ່ເກີດ ແລະ ການເສຍຊີວິດພາຍໃນຄົວເຮືອນ. ນັກເດີນສໍາຫລວດ ຍັງຈະເກັບກໍາຂໍ້ມູນກ່ຽວກັບສະພາບທີ່ຢູ່ອາໄສ, ສິ່ງຂອງເຄື່ອງໃຊ້ຕ່າງໆໃນຄົວເຮືອນ ແລະ ກິດຈະກໍາທາງດ້ານກະສິກໍາ; ທຸກຄົນທີ່ຢູ່ປະຈໍາໃນຄົວເຮືອນປະກອບມີເດັກນ້ອຍ, ເດັກແດງ, ຜູ້ໃຫຍ່, ຜູ້ສູງອາຍຸ ແລະ ຜູ້ທີ່ມີຄວາມຫຍຸ້ງຍາກທາງດ້ານໜ້າທີ່ການ ແມ່ນຈະຕ້ອງໄດ້ຈົດນັບໃນການທົດລອງສໍາຫລວດພົນລະເມືອງ, ທຸກຄົນມີຄວາມສໍາຄັນ ແລະທຸກຄົນໃນຄົວເຮືອນແມ່ນຕ້ອງຈົດນັບເຂົ້າໃນຕອນທ້າຍຂອງການສໍາພາດ, ນັກເດີນສໍາຫລວດຈະຕິດສະຕິກເກີຢູ່ຂ້າງປະຕູເຮືອນ,ເພື່ອຊີ້ບອກເຖິງຜົນສໍາເລັດຂອງການທົດລອງເກັບກໍາຂໍ້ມູນຂອງເຮືອນ ຫລື ທີ່ຢູ່ອາໄສທີ່ຢູ່ໃນເຂດສໍາຫລວດນັ້ນ; ນັກເດີນສໍາຫລວດຈະເກັບກໍາຂໍ້ມູນຂອງຄົວເຮືອນໂດຍນໍາໃຊ້ແທັບເລັດ ແລະ ຈະຮັບປະກັນວ່າຂໍ້ມູນທີ່ບັນທຶກ ໄວ້ຈະຖືກເກັບຮັກສາເປັນຄວາມລັບຢ່າງດີ ໂດຍຂໍ້ມູນທີ່ເກັບກໍາແມ່ນພຽງແຕ່ ເພື່ອຈຸດປະສົງທາງສະຖິຕິເທົ່ານັ້ນ ແລະ ຈະບໍ່ຖືກສົ່ງຕໍ່ ຫລື ເຜີຍແຜ່.

ການສໍາຫລວດພົນລະເມືອງ ແລະ ທີ່ຢູ່ອາໄສທົ່ວປະເທດ ຄັ້ງທີ V ປີ 2025 ແມ່ນການສໍາຫລວດລະດັບຊາດ ທີ່ເປັນແຫລ່ງຂໍ້ມູນໜຶ່ງດຽວທີ່ສໍາຄັນ ໃນການປັບປຸງຖານຂໍ້ມູນພົນ ລະເມືອງແຫ່ງຊາດຂອງ ສປປ ລາວ ຕະຫລອດໄລຍະ 10 ປີຜ່ານມາ; ເປັນຖານຂໍ້ມູນທີ່ຈະປະກອບດ້ວຍຂໍ້ມູນກ່ຽວກັບການຈະເລີນພັນ, ການເສຍຊີວິດ ແລະ ການເຄື່ອນຍ້າຍຂອງພົນລະເມືອງ, ລວມທັງຂໍ້ມູນລະອຽດກ່ຽວກັບຄຸນລັກສະນະຂອງພົນລະເມືອງ,ໂຄງປະກອບດ້ານອາຍຸ, ເພດ, ຊົນເຜົ່າ, ສາສະໜາ, ການຂຶ້ນທະບຽນການເກີດ, ການຖືບັດປະຈໍາຕົວ-ສໍາມະໂນຄົວ, ການສຶກສາ, ການປະກອບອາຊີບ, ເງື່ອນໄຂການດໍາລົງຊີວິດ ແລະ ການເຂົ້າເຖິງການບໍລິການຕ່າງໆ. ການສໍາຫລວດດັ່ງກ່າວ ນີ້ຈະເປັນແຫລ່ງຂໍ້ມູນ ເພື່ອຮັບໃຊ້ໃຫ້ແກ່ການຕິດຕາມ ແລະ ປະເມີນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດຄັ້ງທີ IX ແລະ ການກະກຽມສ້າງແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ X, ສະໜອງໃຫ້ແກ່ການຕິດຕາມເປົ້າ  ໝາຍການພັດທະນາແບບຍືນຍົງແລະ ວິໄສທັດຮອດປີ 2030, ການຫລຸດພົ້ນອອກຈາກປະເທດດ້ອຍພັດທະນາ, ການປັບປຸງນະໂຍບາຍທາງດ້ານພົນລະເມືອງ ກໍຄືຍຸດທະສາດການພັດທະນາຊັບພະຍາກອນມະນຸດແຫ່ງຊາດຂອງ ສ ປປ ລາວ ແລະ ການຕິດຕາມແຜນງານທາງດ້ານພົນລະເມືອງ ໃນລະດັບຊາດ, ພາກພື້ນ ແລະ ສາກົນອີກດ້ວຍ.

ໃນຂະນະທີ່ປະເທດລາວ ກ້າວໄປສູ່ສະຖານະພາບ ຜູ້ມີລາຍຮັບປານກາງໃນປີ 2026, ຂໍ້ມູນ ແລະ ຫລັກຖານຈາກການສໍາຫລວດພົນລະເມືອງ ຈະມີຄວາມສໍາຄັນເປັນຢ່າງຍິ່ງສໍາລັບພາກລັດຖະບານ ແລະ ເອກະຊົນໃນການຕັດສິນໃຈ ໂດຍອີງໃສ່ຫລັກຖານກ່ຽວກັບເສັ້ນທາງກ້າວໄປສູ່ການເຕີບໂຕຂອງເສດຖະກິດ ແລະ ການປ່ຽນແປງທີ່ດີໃນຂະນະທີ່ບໍ່ໄດ້ປະປ່ອຍໃຜໄວ້ທາງຫລັງ.

KPL