ຂປລ. ໃນໂອກາດ ເຄື່ອນໄຫວຢ້ຽມຢາມ ແລະ ຊຸກຍູ້ວຽກງານຢູ່ ແຂວງສາລະວັນ ໃນວັນທີ 3 ກັນຍາ 2024 ນີ້, ສະຫາຍ ນາງ ສີໃສ ລືເດດມູນສອນ ກໍາມະການກົມການເມືອງສູນກາງພັກ, ເລຂາ ທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ໄດ້ເນັ້ນໃຫ້ຄະນະພັກ-ຄະນະນໍາແຂວງ ເພີ່ມທະ ວີຄວາມຮັບຜິດຊອບ ໃນການກະກຽມດໍາເນີນກອງປະຊຸມໃຫຍ່ 3 ຂັ້ນ ເພື່ອຮັບປະກັນດ້ານເນື້ອໃນ, ດ້ານໂຄງປະກອບບຸກຄະລາກອນ ແລະ ດ້ານເວລາ ໃຫ້ມີຄວາມຖືກຕ້ອງ, ສອດຄ່ອງກັບບັນດານິຕິກໍາ ກໍຄື ຄໍາແນະນໍາ ເພື່ອເລືອກເຟັ້ນພະນັກງານ ທີ່ມີມາດຖານເງື່ອນໄຂຄົບຖ້ວນ, ສ້າງພະນັກງານຮຸ່ນໜຸ່ມ ໃຫ້ໜັກແໜ້ນ, ເຂັ້ມແຂງ ເພື່ອຮັບປະກັນການສ້າງ ພະນັກງານສືບທອດປ່ຽນແທນ ໃຫ້ມີຄຸນນະພາບ ແລະ ກຽມດຳເນີນກອງປະຊຸມໃຫຍ່ 3 ຂັ້ນໃຫ້ບັນລຸຜົນສຳເລັດ ຕາມລະດັບຄາດໝາຍ.

ຄຽງຄູ່ກັນນັ້ນ, ກໍໃຫ້ເອົາໃຈໃສ່ເພີ່ມທະວີ ຈັດຕັ້ງປະຕິບັດໜ້າທີ່ການເມືອງ ຢ່າງແຂງແຮງ ເພື່ອສ້າງຂະບວນການໃຫ້ຟົດຟື້ນ ໂດຍສະເພາະວຽກງານວິຊາສະເພາະ ໃນແຕ່ລະຂົງເຂດວຽກງານ, ປະຕິບັດໃຫ້ບັນລຸຕາມແຜນການທີ່ວາງໄວ້ ຕິດພັນກັບການຄົ້ນຄວ້າຢ່າງເລີກເຊິ່ງ ຕໍ່ກັບແຜນພັດທະນາ ຂອງຂະແໜງການ ດ້ວຍເປັນເຈົ້າການ ແລະ ຄວາມຮັບຜິດຊອບສູງ.

ໂອກາດນີ້, ສະຫາຍ ດາວວົງ ພອນແກ້ວ ກໍາມະການສູນກາງພັກ, ເລຂາພັກແຂວງ, ເຈົ້າແຂວງສາລະວັນ  ກໍໄດ້ລາຍງານໂດຍສັງເຂບໃນການນໍາພາ-ຊີ້ນໍາ ວຽກງານທີ່ພົ້ນເດັ່ນຂອງແຂວງ ໃນການຈັດ ຕັ້ງປະຕິບັດວຽກງານຮອບດ້ານ ເປັນຕົ້ນ ການພັດທະນາເສດຖະກິດ ມີການຂະຫຍາຍຕົວ ໃນທ່ວງທ່າດີຂຶ້ນ, ການສຸມໃສ່ປະຕິບັດວຽກງານ ໃນຈຸດສຸມຕ່າງໆ ທີ່ເງື່ອນໄຂດ້ານທ່າແຮງບົ່ມຊ້ອນ ໃນການພັດທະນາເສດຖະກິດ-ສັງຄົມ ໂດຍສະເພາະແມ່ນ ການຊຸກຍູ້ສົ່ງເສີມການຜະລິດເຂົ້າ ເຊິ່ງຈຳນວນໜຶ່ງໄດ້ສົ່ງອອກເປັນສິນຄ້າໄປ ສປ ຈີນ, ການປູກພືດອຸດສາຫະກຳ, ພືດສະບຽງອາຫານ ແລະ ການສົ່ງເສີມການລ້ຽງສັດເປັນຟາມ ແລ ະແບບຄອບຄົວ ມີທ່າອ່ຽງເພີ່ມຂຶ້ນຫລາຍກວ່າເກົ່າ, ສຸມໃສ່ການກະກຽມເປັນເຈົ້າພາບງານມະຫະກໍາ ກິລານັກຮຽນມັດທະຍົມທົ່ວປະເທດ ຄັ້ງທີ VII ແລະ ວຽກງານອື່ນໆ. ສໍາລັບການກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນຂອງພັກພາຍໃນແຂວງ ມາຮອດປັດຈຸບັນ, ໜ່ວຍພັກຮາກຖານບ້ານ ແມ່ນສໍາເລັດການດໍາເນີນກອງປະຊຸມໃຫຍ່ 100%, ຂັ້ນເມືອງສຳເລັດແລ້ວ 8 ຮາກຖານ ເທົ່າກັບ 38,09%, ໜ່ວຍພັກຮາກຖານມີທັງໝົດ 821 ໜ່ວຍພັກ ໄດ້ສໍາເລັດການດໍາເນີນກອງປະຊຸມໃຫຍ່ແລ້ວ 754 ໜ່ວຍພັກ ເທົ່າກັບ 90,24%; ຂັ້ນແຂວງ, ຄະນະພັກຮາກຖານພະແນກ ການ-ອົງການ ໃນຈຳນວນ 17 ຮາກຖານ ພວມກະກຽມຈະດໍາເນີນກອງປະຊຸມໃຫຍ່ ແລະ ໜ່ວຍພັກທີ່ຂຶ້ນກັບ ແມ່ນສໍາເລັດແລ້ວ 18 ໜ່ວຍພັກ ເທົ່າກັບ 8,98%. ຄຽງຄູ່ກັນນັ້ນ, ຄະນະປະຈຳພັກແຂວງສາລະວັນ ກໍໄດ້ເອົາໃຈໃສ່ໃນການຜັນຂະຫຍາຍບັນດາມະຕິ, ຄຳສັ່ງ, ຄໍາແນະນໍາຕ່າງໆໃນການກະກຽມ ແລະດໍຳເນີນກອງປະຊຸມໃຫຍ່ 3 ຂັ້ນຂອງພັກ ຢ່າງເປັນເຈົ້າການ ແລະ ເພື່ອໃຫ້ຖືກຕ້ອງ, ສອດຄ່ອງຕາມລະບຽບຫລັກການ ຂອງພັກ ຕິດພັນກັບການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ໄປພ້ອມກັບການຍົກສູງບົດບາດຄວາມສາມາດນຳພາຂອງພັກ, ຄວາມເປັນແບບຢ່າງນຳໜ້າຂອງສະມາຊິກພັກ ເຮັດໃຫ້ວຽກງານພັກ-ພະນັກງານ ຢູ່ແຂວງສາລະວັນ ເຕີບໃຫຍ່, ເຂັ້ມແຂງທາງດ້ານຈຳນວນ ແລະ ຄຸນນະພາບ.

ຂ່າວ-ພາບ: ວິໄລວອນ ສິດທິໄຊ

KPL