ຂປລ. ກົງສຸນໃຫຍ່ ແຫ່ງ ຣາຊານະຈັກໄທ ປະຈໍາແຂວງສະຫວັນນະເຂດ ແລະ ບໍລິສັດພັດທະນາແຫ່ງທ່ອງທ່ຽວນໍ້າຕົກຕາດເຍືອງ ຫລັກ 40 ເມືອງປາກຊ່ອງຈໍາກັດ ຈັດພິທີມອບ-ຮັບ ຕູ້ຟັກໄຂ່, ວັກຊິນ ແລະ ອຸປະກອນລ້ຽງໄກ່ນ້ອຍ ໃຫ້ 5 ເມືອງຂອງແຂວງສາລະວັນ ພາຍໃຕ້ໂຄງການຂະຫຍາຍ ຜົນຂອງສູນພັດທະນາ ແລະ ບໍລິການກະສິກໍາ-ປ່າໄມ້ໜອງເຕົ່າ (ແຂວງສະຫວັນນະເຂດ). ພ້ອມທັງ ຈັດກອງປະຊຸມຊຸກຍູ້ສົ່ງເສີມ ກຸ່ມຜູ້ປະກອບການລ້ຽງໄກ່ ໃນວັນທີ 4 ກັນຍາ 2024 ຢູ່ເມືອງຄົງເຊໂດນ ແຂວງສາລະວັນ ເຊິ່ງມອບໂດຍ ທ່ານ ປັດ ປັດທະມະຈິດ ກົງສູນໃຫຍ່ ແຫ່ງ ຣາຊານະຈັກໄທ ປະຈໍາແຂວງສະຫວັນນະເຂດ ແລະ ຕາງໜ້າຮັບໂດຍ ທ່ານ ສະໄໝ ໂພທິສານ ເຈົ້າເມືອງຄົງເຊໂດນ, ມີ ທ່ານ ບຸນທົງ ຄໍາມະນີວົງ ຮອງເຈົ້າແຂວງ, ຜູ້ຊີ້ນໍາວຽກງານເສດຖະ ກິດ ແຂວງສາລະວັນ, ທ່ານ ນາງ ສອນທິດາ ອຸນາພົມ ປະທານບໍລິສັດ ພັດທະນາຕາດເຍືອງ ຫລັກ 40 ເມືອງປາກຊ່ອງ ຈໍາກັດ, ທ່ານ ຕໍ່ພົງ ປະເສີດສັງ ສັດຕະວະແພດ ສູນພັດທະນາ ແລະ ການບໍລິການກະສິກໍາ-ປ່າໄມ້ໜອງເຕົ່າ, ມີເຈົ້າເມືອງ, ຮອງເຈົ້າເມືອງ ແລະ ຜູ້ປະກອບການລ້ຽງໄກ່ ເຂົ້າຮ່ວມ.

ທ່ານ ປັດ ປັດທະມະຈິດ ໄດ້ມີຄໍາເຫັນໃນພິທີວ່າ: ເຄື່ອງທີ່ນໍາມາມອບໃນຄັ້ງນີ້, ມີຕູ້ຟັກໄຂ່ ຈໍານວນ 5 ຕູ້ ແລະ ອຸປະກອນລ້ຽງໄກ່ນ້ອຍ ລວມມູນຄ່າທັງໝົດ 125.900 ບາດ ໂດຍມອບໃຫ້ 5 ເມືອງຄື: ເມືອງຄົງເຊໂດນ, ເມືອງລະຄອນເພັງ, ເມືອງຕຸ້ມລານ, ເມືອງວາປີ ແລະ ເມືອງເລົ່າງາມ ເມືອງລະ 1 ຕູ້ເພື່ອໃຫ້ຜູ້ປະກອບການ ກໍຄື ສູນເພາະແນວພັນໄກ່ ໃຫ້ປະຊາຊົນລ້ຽງໄກ່ນໍາໄປໃຊ້ໃນການເພາະ ພັນແນວພັນໄກ່, ທີ່ລ້ຽງໄກ່ລາດພື້ນເມືອງເປັນສິນຄ້າ ໃຫ້ໄດ້ລົງມືປະຕິບັດຢ່າງເປັນຮູບປະທໍາ ເພື່ອຕອບສະໜອງຄວາມຕ້ອງການວັດຖຸດິບ (ໄກ່ລາດພື້ນເມືອງ) ໃຫ້ຮ້ານປິ້ງໄກ່ນາປົ່ງ ເຊິ່ງເປັນຜະລິດຕະພັນເປັນເອກະລັກ ແລະ ມີຊື່ສຽງຂອງແຂວງສາລະວັນ.

ໂອກາດນີ້, ທ່ານ ສະໄໝ ໂພທິສານ ໄດ້ໃຫ້ຮູ້ວ່າ: ເມືອງຄົງເຊໂດນ ມີທ່າແຮງຂອງການລົງທຶນ ໃນຫລາຍຂະແໜງການ ເປັນຕົ້ນ ອຸດສາຫະກໍາການທ່ອງທ່ຽວ ແລະ ບໍລິການ, ອຸດສາຫະກໍາການຜະ ລິດ ຈາກກະສິກໍາ ແລະ ເຄື່ອງຈັກສານ, ກິດຈະການທີ່ກ່ຽວຂ້ອງອື່ນໆ. ປັດຈຸບັນ, ຄະນະກໍາມະການ ການລົງທຶນ ໄດ້ກໍານົດເອົາບັນຊີການລົງທຶນໃນຫລາຍໂຄງການ ໂດຍຖືເອົາຂົງເຂດປູກຝັງ-ລ້ຽງສັດ, ພັດ ທະນາຂົງເຂດການຄ້າ, ການລົງທຶນ, ບໍລິການທາງຜ່ານ ແລະ ການທ່ອງທ່ຽວທໍາມະຊາດ-ວັດທະນະທໍາ. ສໍາລັບ ຕູ້ຟັກໄຂ່ ແລະ ອຸປະກອນການລ້ຽງໄກ່ນ້ອຍ ທີ່ໄດ້ຮັບໃນຄັ້ງນີ້, ແມ່ນມີຄວາມສໍາຄັນຫລາຍ ໃນການເພາະພັນໄກ່ນ້ອຍ ຂອງຜູ້ປະກອບການລ້ຽງໄກ່ເປັນສິນຄ້າ ເພື່ອສະໜອງໃຫ້ພໍ່ແມ່ປະຊາຊົນ ໃຫ້ບັນດາເມືອງເພື່ອລ້ຽງໄກ່ລາດພື້ນເມືອງ ສະໜອງໃຫ້ຮ້ານປີ້ງໄກ່ນາປົ່ງ. ທັງນີ້, ກໍເພື່ອເຮັດໃຫ້ການຈັດຕັ້ງປະຕິບັດຮ່ວມມືຂອງສອງ ປະເທດລາວ-ໄທ  ໂດຍສະເພາະ ລະຫວ່າງ ເມືອງຄົງເຊໂດນ ແຂວງສາລະວັນ ກັບແຂວງມຸກດາຫານ ຣາຊະອານາຈັກໄທ ໃຫ້ດີຂຶ້ນເປັນກ້າວໆ ແລະ ຫວັງຢ່າງຍິ່ງວ່າ ຈະມີການສືບຕໍ່ຮ່ວມອັນໃໝ່ ໃນຕໍ່ໜ້າ.

ຂ່າວ: ວີລະວັນ

ພາບ: ຄັດທະນາມ

KPL