ຂປລ. ໃນວັນທີ 19-27 ພຶດສະພາ 2025, ຄະນະຜູ້ແທນ ແຫ່ງ ສປປ ລາວ ທີ່ປະກອບດ້ວຍຄະນະ ຈາກສຳ​ນັກ​ງານຜູ້​ຕາງ​ໜ້າ​ຖາ​ວອນ ແຫ່ງ ສ​ປ​ປ ລາວ ປະ​ຈຳຫ້ອງ​ການ​ສະ​ຫະ​ປະ​ຊາ​ຊາດ ແລະ ອົງ​ການ​ຈັດ​ຕັ້ງ​ສາ​ກົນ​ອື່ນໆ ທີ່ເຊີ​ແນວ ແລະ ກະຊວງສາທາລະນະສຸກ ໄດ້ເຂົ້້າຮ່ວມກອງປະຊຸມໃຫຍ່ ຄັ້ງທີ 78 ຂອງ ອົງການ ອະນາໄມໂລກ ພາຍໃຕ້ຄຳຂວັນ “ໂລກດຽວ ເພື່ອສຸຂະພາບ-One World for Health”.

ໃນກອງປະຊຸມພາກລະດັບສູງໃນວັນທີ 20 ພຶດສະພາ 2025, ບັນດາຜູ້ນຳໂລກຈຳນວນຫນຶ່ງ ໄດ້ກ່າວປາ ໄສໃນກອງປະຊຸມ ແລະ ຜ່ານການບັນທຶກວີດີໂອ, ລວມທັງ ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ກໍໄດ້ກ່າວປາໄສ ກ່ຽວກັບຄວາມພະຍາຍາມຂອງລັດຖະບານ ໂດຍການຮ່ວມມືຢ່າງໃກ້ຊິດກັບອົງການ ອະນາໄມໂລກ ໃນຂົງເຂດວຽກງານສຸຂະພາບແມ່ ແລະ ເດັກ, ການໃຫ້ວັກຊີນກັນພະຍາດ, ການຄວບຄຸມພະຍາດ ຕິດຕໍ່, ການຍົກສູງຂີດຄວາມສາມາດ ຂອງພະນັກງານແພດໝໍ ແລະ ຄຸນນະພາບການບໍລິການສາທາລະນະສຸກ, ວຽກງານສົ່ງເສີມສຸຂະພາບ ແລະ ຂົງເຂດອື່ນໆ ເຊິ່ງໄດ້ເຮັດໃຫ້ປະຊາຊົນລາວ ມີສຸຂະພາບດີຂຶ້ນ ແລະ ຍັງໄດ້ຊ່ວຍ ສ້າງຜົນງານອັນພົ້ນເດັ່ນຫລາຍຢ່າງ ເຊັ່ນ: ການປະກາດລົບລ້າງພະຍາດໂປລິໂອ ໃນປີ 2000, ລົບລ້າງພະຍາດຕາ ສານ ໃນປີ 2017 ແລະ ລົບລ້າງພະຍາດຂາຊ້າງ ຢ່າງເປັນທາງການ ໃນປີ 2023, ອັດຕາການເສຍຊີວິດຂອງແມ່ລະ ຫວ່າງການຖືພາ ແລະ ການເກີດລູກ ໄດ້ຫລຸດລົງຫລາຍກວ່າ 80% ແຕ່ປີ 2000 ຫາປີ 2023 ເຊິ່ງເປັນໜຶ່ງໃນອັດ ຕາທີ່ຫລຸດລົງໄວທີ່ສຸດໃນໂລກ. ພ້ອມກັນນັ້ນ,​ ທ່ານຍັງໄດ້ເວົ້າເຖິງເປົ້າໝາຍ ແລະ ທິດທາງໃນຕໍ່ໜ້າ ກໍຄື ຄວາມ ສຳຄັນຂອງອົງການອະນາໄມໂລກ ທີ່ຈຳເປັນຕ້ອງມີຊັບພະຍາກອນທີ່ເໝາະສົມ ແລະ ຍືນຍົງ ແລະ ສັນຍາ ວ່າດ້ວຍ ການລະບາດຂອງພະຍາດ ທີ່ຈະເປັນເຄື່ອງມືອັນໜຶ່ງ ໃນການບັນລຸເປົ້າໝາຍຮ່ວມກັນ.

ໃນໂອກາດເຂົ້າຮ່ວມກອງປະຊຸມໃຫຍ່ຄັ້ງນີ້, ຄະນະຜູ້ແທນ ແຫ່ງ ສປປ ລາວ ນຳໂດຍ ທ່ານ ດາວວີ ວົງໄຊ ເອກອັກຄະລັດຖະທູດ, ຜູ້ຕາງໜ້າຖາວອນ ກໍໄດ້ປະກອບຄຳເຫັນໃນກອງປະຊຸມຄະນະກຳມະການ ແລະ ກອງປະ ຊຸມພາກຄົບຄະນະ ພ້ອມທັງ ເຂົ້າຮ່ວມລົງຄະແນນສຽງ ເພື່ອຮັບຮອງບາງຍັດຕິທີ່ສຳຫລາຍ ຂອງຄະນະກຳມະການ ຕ່າງໆ ນອກຈາກນັ້ນ, ຄະນະຜູ້ແທນລາວ ຍັງໄດ້ເຂົ້າຮ່ວມກອງປະຊຸມປິ່ນອ້ອມ ເພື່ອເປັນການຂົນຂວາຍຜູ້ໃຫ້ທຶນ ແລະ ຄູ່ຮ່ວມພັດທະນາ ເປັນຕົ້ນ ປະເທດອົດສະຕາລີ, ອົງການ GAVI ເພື່ອໃຫ້ການຊ່ວຍເຫລືອທາງດ້ານເຕັກນິກ-ວິຊາການ ແລະ ທຶນເຂົ້າໃນການປັບປຸງວຽກ ສາທາລະນະສຸກ ຂອງ ສປປ ລາວ.

ຜົນສຳເລັດທີ່ເປັນປະຫວັດສາດ ຂອງກອງປະຊຸມໃຫຍ່ ອົງການອະນາໄມໂລກ ຄັ້ງນີ້ ແມ່ນການພິຈາລະນາ ຮັບຮອງເອົາສັນຍາ ວ່າດ້ວຍການລະບາດ ຂອງພະຍາດ (Pandemic Agreement) ຢ່າງເປັນເອກະສັນ ໃນວັນທີ 19 ພຶດສະພາ 2025 ທີ່ຜ່ານມາ ເຊິ່ງບັນດາປະເທດສະມາຊິກ ໄດ້ເລີ່ມຂະບວນການເຈລະຈາ ແຕ່ກາງປີ 2021 ເປັນຕົ້ນມາ. ຈຸດ​ປະ​ສົງຂອງສັນ​ຍ​າສະ​ບັບ​ດັ່ງ​ກ່າວ ເພື່ອ​ປະ​ຕິ​ຮູບ​ລະ​ບົບ​ການ​ຕິດ​ຕາມ, ການ​ປ້ອງ​ກັນ ແລະ ຮັບ​ມື​ກັບ​ການ​ລະ​ບາດ ຂອງພະ​ຍາດ​ ຢ່າງ​ຮອບ​ດ້ານ, ສົ່ງ​ເສີມ​ການ​ຄົ້ນ​ຄ້​ວາ ແລະ ການ​ແບ່ງ​ປັນ​ຜ​ະ​ລິດ​ຕະ​ພັນ​ສຸ​ຂະ​ພາບ ​ທີ່​ກ່ຽວ​ຂ້ອງກັບ​ການ​ລະ​ບາດ ​ຂອງ​ ພະ​ຍາດ, ປັບ​ປຸງ​ລະ​ບົບ​ບໍ​ລິ​ຫານ​ ດ້​ານ​ສາ​ທາ​ລະ​ນະ​ສຸກ​ໃນ​ທົ່ວ​ໂລກ​ ໃຫ້​ສົມ​ບູນຂຶ້ນ​ຕື່ມ ແລະ  ຮ່ວມມື​ກັນ​ເພື່ອ​ກຽມ​ພ້ອມ​ຮັບ​ມື​ກັບສິ່ງ​ທ້າ​ທາ​ຍ ແລະ ສົ່ງເສີມຄວາມ​ສະ​ເໝີ​ພາບ ​​ໃນ​ການ​ພັດ​ທະ​ນາ​ວຽກ​ງານ​ສຸ​ຂະ​ພາບ​ໃນ​ທົ່ວ​ໂລກ. ພາຍ​ຫລັງການ​ຮັບ​ຮອງ​ຄັ້ງນີ້, ອົງ​ການອະນາໄມໂລກ ຈະເລີ່ມ​ຂະບວນການ​ສ້​າງ​ຕັ້ງ​ຄະ​ນະ​ເຮັດ​ວຽກ​ແບບ​ເປີດ​ກວ້​າງ (an open-ended International Working Group-IGWG) ເຊິ່ງ​ຈະ​ເປັນ​ໜ່ວຍ​ງານ​ສໍາຄັນ​ທີ່ຮັບ​ຜິດ​ຊອບ​ການ​ກຳ​ນົດກົນ​ໄກ, ແບບ​ແຜນ​ການ​ເຮັດ​ວຽກ,  ຈັດ​ຕັ້ງ​ປະ​ຕິ​ບັດ​ເອ​ກ​ະ​ສານ​ເຈ​ລະ​ຈາ​ສະບັບ​ດັ່ງ​ກ່າວ ແລະ ຂັ້ນ​ຕອນອື່ນ​ໆ, ພ້ອ​ມ​ທັງ ຈະ​ເປີດ​ໃຫ້​ປະ​ເທດ​ສະ​ຊິກ ແລະ ພາກ​ສ່ວນ​ກ່ຽວ​ຕ່າງໆ ພິ​ຈາ​ລະ​ນາເຂົ້າ​ຮ່ວມຂອງ​ຮ່າງ​ເຈ​ລະ​ຈາ​ສະ​ບັບ​ດັ່ງ​ກ່າວ ແລະ ສະ​ເໜີ​ໃຫ້​ປະ​ເທ​ດ​ສະ​ມາ​ຊິກ ​ພິ​ຈາ​ລະ​ນາ​ລົງ​ນາມໃຫ້​ສັດ​ຕະ​ຍາ​ບັນ​ໃຫ້​ໄວ​ທີ່​ສຸດ.

KPL